Pagpupugay sa magigiting

Pagpupugay sa magigiting

Araw ng kagitingan sa kasaysayan ng bansa
Rebelyon laban sa mananakop at pagbabanta
Araw ng pagbagsak ng Bataan at mandirigma
Wari'y larangan sa dugo ng Pinoy ay nagbaha

Nakibaka sila, nakibakang mga bayani
Ginawa ang wasto, naglingkod, sa bayan nagsilbi
Kalayaan ang adhikain, di nag-atubili
Ang nangalugmok sa digma'y dapat ipagmalaki

Gising ang bayan, lumaban para sa kalayaan
Inisip ang kinabukasan ng mahal na bayan
Tumimo ang aral nito sa ating kabataan
Ipaglaban ang laya mula sa tuso't dayuhan

Nag-alay ng buhay ang bunying henerasyon nila
Grupong Huk, kawal Pilipino, lumaban sa gera
Ang sakripisyo nila'y pasalamatan tuwina
Nagpapasalamat kami sa mga nakibaka

- gregbituinjr.
04.09.2020

Ang sipag sa paggawa

ANG SIPAG SA PAGGAWA

"Ang sipag sa paggawa na iyong ikabubuhay ay siyang tunay na sanhi ng pag-ibig, pagmamahal sa sarili, sa iyong asawa't mga anak, sa iyong kapatid at mga kababayan." ~ bilang ikasiyam (IX) ng Katungkulang Gagawin ng mga Anak ng Bayan (Dekalogong sinulat ni Andres Bonifacio)

mabuhay ang lahat ng nagtatrabaho't dalita

dahil sa inyong sipag, daigdig ay pinagpala

nilikha ng manggagawa'y ekonomya ng bansa

dukha'y kaysipag ngunit isang kahig, isang tuka

mag-ipon, magtipid, isang aral ng COVID-19

umibig, magmahal, kahit community quarantine

huwag lang umasa sa sahod, maging malikhain

habang ginagabayan ng prinsipyo't adhikain

magtanim ng kamote, talbos man nito'y pang-ulam

masisipag ang manggagawa, tulad din ng langgam

ika nga, hirap natitiis, dusa'y napaparam

maaabot pa rin ang pangarap na inaasam

kolektibong magkaisa, makipagkapitbisig

sa bawat manggagawa't maralitang makakabig

upang itayo ang lipunang lahat ay may tinig

at di pinagsasamantalahan ng mapanlupig

itatatag ang isang pantay-pantay na lipunan

para sa sambayanan at tuluyang wawakasan

ang pribadong pag-aaring ugat ng kahirapan

at kapitalismong ugat ng laksang kasamaan

- gregbituinjr.

Bahaginan ang kapwa sa panahon ng lockdown

Bahaginan ang kapwa sa panahon ng lockdown 

"Bahaginan mo ng iyong makakayanan ang sino mang mahirap at kapus-palad." ~ bilang ikawalo (VIII) ng Katungkulang Gagawin ng mga Anak ng Bayan (Dekalogong sinulat ni Andres Bonifacio)

prinsipyo palang taglay ng dakilang Katipunan

na yaong nagdaralita'y atin ding bahaginan

ng anupamang mayroon tayo'y makakayanan

ito nga'y tunay na pakikipagkapwa sa bayan

lalo na ngayong lockdown pa't nasa bahay lang tayo

dahil nananalasa ang COVID-19 na ito

basahin natin ang Dekalogo ni Bonifacio

tiyak na may bagong aral na mapupulot tayo

luma man ang mensahe, bago sa ating panahon

habang naka-kwarantina't kayraming nagugutom

maralita'y panay ang paghihigpit ng sinturon

kahit panggitnang uri'y nauubusan din ngayon

gawin nang minimum wage ang sahod ng kongresista

senador, ehekutibo, sundalo't huwes, sana

ay mangyari't makaahon ang ating ekonomya

tigilan na nilang negosyohin ang pulitika

pagpupugay sa Sanlakas at Bulig Pilipinas

nangalap ng pondo, nagluto ng ulam at bigas

at namigay ng pagkain sa dukhang nasa labas

sa iba't ibang lungsod na gutom ang dinaranas

halimbawa nila'y tunay na magandang hangarin

sa ganyan nakikita ang tapat na adhikain

bilin ni Gat Andres na magbahaginan ay gawin

upang kapwa natin, pati dukha'y makaraos din

- gregbituinjr.

Sa saliw ng awiting "Always Somewhere"

Sa saliw ng awiting "Always Somewhere"

nagninilay habang "Always Somewhere" ang inaawit
na sa balikat ay tatu ng makatang marikit
na saanman, adhika'y tumulong sa maliliit
na maunawaan ang sistemang dulot ay ngitngit

tumitindi ang galit sa sistemang mapanghusga
na akala ito'y daigdig lang ng elitista
na sa maliliit ay laging nagsasamantala
uring api'y dapat ang sistemang ito't mapurga

aangkinin ang lugar, magsasaka'y mawawalan
magdedemolis, dukha'y mawawalan ng tahanan
pribadong pag-aari'y pinauso ng iilan
imbes na kolektibong pangasiwaan ng bayan

always somewhere, kahit saan daw nakikita ako
dahil organisador ng maralita't obrero
matapos lang ang lockdown, patuloy ang labang ito
kikilos at itatayo'y lipunang makatao

"Always somewhere" ika nga, "I'll be back to love you again!"
babalik-balikan pa rin ang prinsipyo't layunin
habang nabubuhay pa, pakikibaka'y gagawin
hanggang sa huling sandali'y gagampan ng tungkulin

- gregbituinjr.

Social distancing din muna kahit sa mag-asawa

Social distancing din muna kahit sa mag-asawa

social distancing din muna kahit sa mag-asawa
dapat daw ay isang metrong distansya o higit pa
pag kumain nga kami, tigisa kaming lamesa
at pag natulog, ako'y sa banig, siya'y sa kama

kung maglalakad sa lansangan, may social distancing
bawal din ang paghalik, ngipin muna'y sipilyuhin
ang tinga'y alisin, loob ng bibig ay linisin
pag hininga'y mabaho pa rin, mag-social distancing

bawal yumakap lalo'y ilang araw walang ligo
kapos pa sa tubig, punas muna ng bimpo't panyo
di muna nag-ahit, bigote't balbas na'y kaylago
mag-aahit lang pag kwarantinang ito'y naglaho

social distancing din habang nasa labas ng bahay
ganyan din habang sa Enkantadia'y nakaantabay
at kumakatha pa rin ang diwang di mapalagay
dahil sa kwarantinang nagpapatuloy pang tunay

- gregbituinjr.

Di ako tumambay sa kabila ng lockdown

Di ako tumambay sa kabila ng lockdown

oo, lagi lamang kaming nasa loob ng bahay
ngunit sa kabila ng lockdown, di ako tumambay
nagtrabaho pa rin kahit maghapong nagninilay
nililikha ang samutsaring kathang binulay-bulay

nitong lockdown nga, tatlo, apat, anim, pitong tula
ang sa isang araw pa lang ay aking nagagawa
na istrikto kong kinakatha'y may sukat at tugma
ilan ma'y walang sesura, piling-pili ang paksa

sinimulan kong kathain ang mga simpleng bagay
mula sa paligid, eskinita, lansangan, tambay
tinidor, kutsara, sinelas, COVID, nininilay
upang sa nakararami, tulang ito'y ialay

madaling araw pa lang ay gising na yaring diwa
nasa panaginip ang mga paksang kinakatha
nasa guniguni ang mga manggagawa't dukha
nasa balintataw ang umagang anong dakila

matapos ang gawaing bahay, isang tula muna
matapos magluto ng agahan, isang tula pa
habang nasa kubeta'y nagsusulat pa ng isa
nagbibilang ng pantig, katha'y lumbay at pag-asa

kahit na anong paksang nasa ilalim ng araw
magnilay, diwa'y patalasin tulad ng balaraw
hanggang hatinggabi, may paksang nasa balintataw
tatlo pa't limang tula sa diwa'y biglang lilitaw

- gregbituinjr.

Mayo Uno ang bagong simula

MAYO UNO ANG BAGONG SIMULA

community quarantine ay magpapatuloy pa nga
extended hanggang bisperas ng Araw ng Paggawa
bagong anunsyo ito ng gobyernong may ginawa
subalit ubos na raw ang pondo, kahanga-hanga
mga tao raw ang sa pagkain nila'y bahala

paano na kikita sa harap ng kwarantina
kung bahala nang maghanap ng pagkain ang masa
bakit hinuli pa ang mga vendors na nagtinda
kung nakakulong lang sa bahay, di sila kikita
mga hinuling nagtindang vendors, palayain na!

nauubos din ang ipon at sahod ng obrero
kung sa bahay lang, kikita ba kung walang trabaho
panahong lockdown, konting pagkain, mag-aayuno
upang makatipid sa dinaranas na delubyo
gayunman, kakayanin pa ba ang dalawang linggo

magkita-kita sa Mayo Uno, bagong simula
at bagong pagbaka laban sa sistemang kuhila
muling magkakapitbisig ang uring manggagawa
upang magkaisa, mag-usap, magplano't magtakda
upang ibagsak na ang sistemang kasumpa-sumpa

- gregbituinjr.
04.07.2020 (World Health Day)

Pasasalamat sa Bulig Pilipinas

Pasasalamat sa Bulig Pilipinas

Bulig Pilipinas, kayo'y sadyang kahanga-hanga
Umpisa pa lang, tumulong agad sa walang-wala
Laging handang umalalay sa mga api't dukha
Inisip agad ang kapakanan ng abang madla.

Ginawa'y naghanda ng pagkain, at nagpakain
Pinuntahan ang mga dukhang nabahaginan din
Ito'y panahong lockdown o community quarantine
Lubusan po kayong pinasasalamatan namin.

Inisip ang kapakanan ng kapwang nagugutom
Pagpapakatao, pag-ibig, prinsipyo, pagbangon
Ito'y sakripisyo, kawanggawa, dakilang layon
Na imbes sa bahay lang kayo, ginawa ang misyon!

Ang inyong halimbawa'y dapat purihing totoo
Salamat po, Bulig Pilipinas! Mabuhay kayo!

- gregbituinjr.
04.07.2020 (World Health Day)

Salamat sa mga frontliners ngayong World Health Day

Salamat sa mga frontliners ngayong World Health Day

ngayong World Health Day, taospuso pong pasasalamat
sa mga frontliners sa inyong tungkuling kaybigat
kaharap n'yo'y sakit na di makita o masalat
naririyan pa rin kayong ginagawa ang lahat
anong tindi ng nakaatang sa inyong balikat

sa inyong frontliners, salamat po ng buong puso
kayraming kwento ng doktor, nars, iba't ibang tagpo
reporter, basurero, obrerong loob ay buo
maraming doktor na'y nawala, buhay ay naglaho
nalagas ang maraming buhay, nakapanlulumo

dahil sa lockdown, mamamayan ay sa bahay muna
mabagal man, gobyerno'y may pakimkim sa pamilya
kayo'y nakaharap sa sakit na nananalasa
dahil sa kwarantina, pamilya'y di makasama
sa kabila nito, frontliners kayong mahalaga

O, frontliners, nawa'y di kayo dapuan ng sakit
tumutulong sa di kilala, nagpapakasakit
salamat sa sakripisyo n'yo't pagmamalasakit
ang wish namin sa World Health Day, di kayo magkasakit
pasasalamat namin sa inyo'y paulit-ulit

- gregbituinjr.
04.07.2020

Tula sa World Health Day

Tula sa World Health Day

Walang sinumang lalabas kapag naka-quarantine
Oo, ito'y sabi ng gobyerno't dapat daw sundin
Rinig mo ang sabi, pag lumabag ka'y papatayin!
Lagot ka! Mahirap na't baka paglamayan ka rin!

Dapat tutukan nila'y ang sakit, di ang pasaway
Hanap lang nitong dukha'y pagkain, gutom ngang tunay
E, bakit lalabas pa? Nais ba nilang mapatay?
Aba'y magugutom ang pamilya't di mapalagay!

Lagi dapat igalang ang karapatang pantao
Tulad din ng karapatan ng dalita't obrero
Hintayin lang nating matapos ang lockdown na ito
Dahil masa'y maniningil sa palpak na serbisyo

At sa World Health Day, alalahanin ang kalusugan
Yugto itong di dapat balewalain ninuman

- gregbituinjr.
04.07.2020

Sa World Health Day: FREE MASS TESTING NOW!

Sa World Health Day: FREE MASS TESTING NOW!

World Health Day, pandaigdigang araw ng kalusugan

Oo, araw upang suriin ang pangangatawan

Ramdam mo ba kung sumasakit ang iyong kalamnan

Lalo't nananalasa ang COVID-19 sa bayan.

Dinggin natin at alamin ang nangyayari't ulat

Habang may kwarantina'y anong isinisiwalat

Eksperto'y anong sabi nang di mahawa ang lahat

Ano pang gagawin upang sakit ay di kumalat.

Lockdown o community quarantine pansamantala

Tayo'y manatili sa bahay, ayon sa kanila

Habang masa'y nagugutom, naghahanap ng pera

Dahil puno ng pangambang magutom ang pamilya.

At ngayong World Health Day, sabay-sabay nating isigaw:

Yamang ang araw na ito'y atin: FREE MASS TESTING NOW!

- gregbituinjr.

04.07.2020

Soneto sa World Health Day

Soneto sa World Health Day

World Health Day, pandaigdigang araw ng kalusugan

Organisadong araw para sa pangangatawan

Ramdam mo ba kung may sakit kang dapat malunasan

Lockdown pa't baka walang masakyan pag kailangan

Damhin mo ang kalamnan, pulso, ulo, dibdib, panga

Haplusin ang kutis, puso't katawan ba'y okey pa?

Espesyalista ba'y nahan, kilala mo ba sila?

At pag kailangan na, sila'y matatawagan ba?

Laging kalusugan mo't ng pamilya'y isipin din

Tingnan ang katawan, sila ba'y namamayat na rin

Habang malakas pa, kalusuga'y asikasuhin

Dahil mahirap magkasakit, maging alagain

Ating kalusugan ay lagi nating alagaan

Yamang ito'y kayamanang di dapat pabayaan

- gregbituinjr.

04.07.2020

Mga unipormadong utak-hazing

Mga unipormadong utak-hazing

matindi ang nangyari sa mga taga-San Roque

na nilahad sa panayam ng isang residente

aniya, "Dumating 'yung mga naka-uniporme"

walang awa, pinagpapalo ang mga lalake."

bakit agad silang namamalo, sino ba sila?

dahil ba hazing ang natutunan sa akademya?

hazing pa ba ang paraan nila ng disiplina?

ngunit di sa kanilang kadete kundi sa masa

karamihan sa naroo'y di makapagtrabaho

dahil sa lockdown, walang pera ang dukha't obrero

saan kukuha ng pagkain, isip ay paano

kung pamilya ba'y magkasakit, tutulong ba'y sino

karumal-dumal, sadista ang kanilang gawain

bakit ang gutom ng dukha'y di nila unawain

kahiya-hiya na sila, awtoridad pa man din

dahil inaral lang yata'y kung paano mang-hazing

naging animal dahil may baril, kapangyarihan

gayong di kriminal ang masang nagugutom lamang

karapatang pantao'y dapat nilang matutunan

kung kailangan, magbalik sila sa paaralan

- gregbituinjr.

* mula sa balita ng Rappler.com, Abril 1, 2020, na may pamagat na "Quezon city residents demanding help amid lockdown arrested by police"

Donasyon sa lockdown

Donasyon sa lockdown

sa panahon ng lockdown, may natanggap ka bang tulong?

nakakakain ka pa ba kahit adobong kangkong?

o pulos delata't noodles sa iyong barungbarong

ang natanggap mo? buti't di ka nagkaka-kurikong

mabilis ba ang serbisyo ng mga pulitiko?

o sa binigay nila, may pangalan sila rito?

sa donasyon ba'y kaylaki ng pangalan ng trapo?

eleksyon ba'y malapit na't nais nang maiboto?

malaki daw ang pondo ng gobyernong inilaan

upang may makain ang na-lockdown na taumbayan

bilyong perang aprubado ng mga kinatawan

bilyon-bilyong pisong sana'y di kunin ng kawatan

karapatan nating kunin ang donasyong pagkain

mahirap man o mayaman, may donasyon sa atin

may nakaimbak ang mayaman, at mauubos din

walang naimbak ang mahirap kaya gugutumin

- gregbituinjr.

Anila, "Stay at home"

ANILA, "STAY AT HOME"

panawagan ngayong / lockdown, "Stay at home."

basta may pagkain / upang di magutom

sundin lamang ito / sa panahong lockdown

dapat kung mayroon / tayong malalamon.

"Stay at home" ngayong / naka-kwarantina

subalit pamilya'y / may makakain ba?

dapat tiyaking may / pagkain sa mesa

nang di magkasakit / ang buong pamilya.

mayroon ba kayong / pambili ng bigas?

tigil sa trabaho, / paano na bukas?

paano rin naman / kung walang lalabas?

sinong magbibigay / ng ulam at prutas?

"Stay at home" muna / kahit walang pera

"Stay at home" ka lang, / bukas, bahala na...

tutulong ba sila / pag nagkasakit ka?

o pag nagka-virus, / magagamot ka ba?

- gregbituinjr.

Tuyong hawot at dilis na naman ang ulam namin

Tuyong hawot at dilis na naman ang ulam namin

tuyong hawot at dilis na naman ang ulam namin
kahapon ay noodles at may pinitas na gulayin
walang karneng baka't baboy na masarap ulamin
purga na ang tiyan sa ulam na ulit-ulit din

di pa namumunga ang itinanim na kamatis
wala pa ring bunga ang kalumpit at aratilis
sa panahong ito, tayo muna'y magtiis-tiis
basta sa pagkain ay huwag tayong magmimintis

sana'y may mabilhan na ng kamatis at sibuyas
at makapaggisa ngunit sarado pa sa labas
dahil sa lockdown, tindahan din ay may takdang oras
alas-nuwebe hanggang ala-una lang ang bukas

ano nang dapat gawin sa ganitong kalagayan
mag-ipon na ng ulam para sa kinabukasan
tulad ng langgam, nagtitipid para sa tag-ulan
at tayo'y nagtitipid din dahil sa lockdown naman

- gregbituinjr.

Kay-agang gumising

Kay-agang gumising

hatinggabing pusikit na nang magpasyang humimbing
bago magbukangliwayway, kay-aga kong nagising
pakiramdam ko'y nagugutom at agad nagsaing
tuyo'y pinrito habang hinihintay ang sinaing

dahil sa kwarantina, karaniwang tanghali na
ang gising namin sa bahay, ngunit ako'y kay-aga
babangon lagi alas-sais pa lang ng umaga
tila body clock ko'y di sumabay sa kwarantina

nagutom yata ako dahil konti ang kinain
dahil sa lockdown, dalawang beses na lang ang kain
kaya kanina'y hinarap agad ang lulutuin
naglaga ng tubig na may dahon upang inumin

pagkakain ng almusal ay agad kong hinarap
ang pagkatha ng puna, lumbay, pag-asa't pangarap
maaanghang na salita'y pilit inaapuhap
may matamis na salitang di sana mapagpanggap

pulos sulat, di naman makagawa ng nobela
tula rin ng tula sa entablado ng protesta
nasa isip ay alalahanin at alaala
na madalas pagtahian ng salita tuwina

- gregbituinjr.

Pagkatha't pagtatanim sa panahon ng lockdown

Pagkatha't pagtatanim sa panahon ng lockdown

sarili'y inabala ko sa pagkatha ng tula

habang nasa kwarantina pa't minsan ay tulala

habang sa kisameng may butiki'y nakatunganga

habang kung anu-ano na lang ang pinaggagawa

magtanim na muna kaya ng gulay sa bakuran

upang balang araw may gulay kang maani naman

pagtatanim sa ngayon ay sagot sa kagutuman

di na mall ang mahalaga kundi ang kabukiran

sa panahon ng lockdown, halina't tayo'y magtanim

upang sa kalaunan, sa bunga'y makakatikim

magtanim-tanim upang maiwasan ang panindim

lalo na kung ang kasalukuyan ay dumidilim

kaya tutulain muna'y tanim at kalikasan

kailangang maghanda para sa kinabukasan

magtanim kahit sa kaunting lupa sa bakuran

lagyan ng lupa't tamnan din ang latang walang laman

- gregbituinjr.

Isabuhay ang Kartilya ng Katipunan

ISABUHAY ANG KARTILYA NG KATIPUNAN

hangad namin ay kaginhawahan ng ating bayan

hangad din ito ng makasaysayang Katipunan

marangal na layunin at adhikang sinimulan

kaya misyong ito'y dapat mahusay na gampanan

Kartilya ng Katipunan ay isinasapuso

labanan ang pang-aapi, dugo man ay mabubo

pagsasamantala sa kapwa'y dapat nang maglaho

makibaka nang lipunang makatao'y matayo

ang buhay na di ginugol sa malaking dahilan

ay kahoy na walang lilim o damong makamandag

ang pagkakawanggawa ang tunay na kabanalan

sa taong may hiya, salita'y panunumpa naman

karapatang pantao'y ating itinataguyod

aralin natin ang Kartilya at sa puso'y ibuod

pagpapakatao'y yakapin, sa bayan maglingkod

labanan ang mga mali kahit uugod-ugod

"Kaginhawahan", nasa sulatin ni Bonifacio

"Iisa ang pagkatao ng lahat" kay Jacinto

tunay nga silang bayani ng bansa nating ito

aral nila't Kartilya'y isabuhay ngang totoo

- gregbituinjr.

Ano ang rali?

Ano ang rali?

ang rali'y gawaing magpahayag ng sabay-sabay

madalas kasi'y di pakinggan kung mag-isang tunay

nagrarali ka dahil sa isyu'y di mapalagay

kaysa di magrali't sarili'y hayaang mamatay

mabuting maglahad kaysa sikilin ang damdamin

mabuting magsalita kaysa tumahimik lang din

ang gutom na di matiis, sa sigaw mo lunurin

kung mag-isa ka lang, sino ang sa iyo papansin

sabay-sabay na pagpapahayag ng mamamayan

ang rali dahil kung mag-isa ka'y di pakikinggan

ayusin ang pagkilos upang maparating naman

ang mensaheng dapat dinggin ng kinauukulan

kung di marinig, isulat sa plakard ang mensahe

nang makita ng madla ang tindig mo't sinasabi

paraan ng pagpahayag, huwag mag-atubuli

sabayang pagpapahayag ang esensya ng rali

nag-iisip din ang dukhang di na kaya ang gutom

nangangalampag sila sa mga utak-marunong

na nasa poder, na ibinoto rin nila noon

sakaling sa hinaing nila'y agad na tumugon 

rali'y pagdulog din ng problema sa mga paham

matugunan ang isyu't dapat silang makialam

at maabot din ang publikong dapat makaalam

upang isyu'y pag-usapan nang ito'y matugunan

- gregbituinjr.

Mabuhay ka, Chel Diokno!

Mabuhay ka, Chel Diokno!

Chel Diokno, pinakita'y ngipin at liderato

may ngipin laban sa pang-aapi't pang-aabuso

kahit naninira'y dating huwes at abugado

subalit naging pangulo ng bayang Pilipino

di kayang gibain, haring praning man ang bumira

pagtulungan ka man nila'y kasangga mo ang masa

magpatuloy ka sa ginagawa mong magaganda

ipagtanggol ang wasto't gawin ang tama tuwina

Chel Diokno, senador ng masa, tagapagtanggol

di ka lang nanalo, marahil kulang sa panggugol

kumpara sa tatlong B.bi, buduts, bato at bukol

na kaya marahil nanalo'y kadikit ng ulol

"papatayin ko kayo!" sabi ng matinong gago

si Chel ay: "Ipagtanggol ang karapatang pantao!

May batas tayo. Respetuhin ang wastong proseso!

Dapat may due process, at di dapat umaabuso!"

napangitan man sa ngipin mo ang mukhang kulugo

ang kanyang bunganga naman ay pagkabaho-baho

lagi na lang "patayin ko kayo!" ang nasa nguso

dapat taumbayan na sa puwet niya'y mamalo

huling hirit pa, kayputi pala ng iyong ngipin

sa pangulo'y kaybaho, ngipin pa yata'y nangitim

animo'y sabaw ng pusit at budhi ng salarin

salamat at sa masa'y nakakangiti ka pa rin

- gregbituinjr.

Mabuti pa yata ang puno ng saging, may puso

Mabuti pa yata ang puno ng saging, may puso

mabuti pa yata ang puno ng saging, may puso

di gaya niyang pulos pagpaslang ang nasa nguso

"papatayin ko kayo!" ang sabi ng mukhang tuko

maton ngunit isip-bata, ang bunganga'y kaybaho

bukambibig ang pagbabanta at mga pahaging

tila walang puso, mabuti't may puno ng saging

utak-balisawsaw ang sugo ng pusong-balimbing

animo'y walang pagpapakatao ni katiting

sabi ng marami, tugon niya lagi'y pagpaslang

sa unang taon lang niya, libo na ang napaslang

sa nagprotestang nagugutom, tugon ay pagpaslang

laging alam na solusyon sa problema'y pagpaslang

ah, sino ba sa mga namumuno ang may puso

kung ang pinuno'y wala, sino na lang ang matino

kung puso ng saging kaya'y kainin ng pinuno

magpapakatao na ba't pamumuno'y may puso

- gregbituinjr.

04.04.2020

Kung ako'y umabot sa edad sisenta'y kwatro

Kung ako'y umabot sa edad sisenta'y kwatro

minsan, pag nasa edad ka nang kalahating siglo

di mo na iniisip tatagal pa ang buhay mo

mapalad ka nga't naabot pa ang edad na ito

bonus na kung sa edad sisenta'y umabot ako

"When I'm sixty-four", sabi nga sa awit ni John Lennon

ngunit di na siya umabot sa edad na iyon

pinaslang siya sa gulang na apatnapung taon

"When I'm sixty four", halina't baybayin ang kahapon

namatay si chess grandmaster Bobby Fischer, ang Da Best,

na edad ay bilang ng parisukat sa larong chess

tulad din ni world chess grandmaster Wilhelm Steinitz

sa edad sisenta'y kwatro nang sa mundo'y umalis

anong kwento ng buhay ko, akin bang masusulat

sa bawat taon sa bawat bilang ng parisukat

pagkabigo't tagumpay ba'y paano masusukat

umabot sa sisenta'y kwatro'y di ko madalumat

sa itim na bloke'y maitim din ba ang kahapon

sa puting bloke'y gaganda ba ang iyong sitwasyon

piyesa'y itim man o puti, pag-isipan iyon

buhay ay di lang kahapon, may bukas din at ngayon

ipaglaban ang karapatang pantao't dignidad

magpakatao lagi't isinilang tayong hubad

gawin natin anong mabuti, anuman ang edad

pag umabot sa sisenta'y kwatro, tayo'y kaypalad

- gregbituinjr.

04.04.2020

John Lennon (Oktubre 9, 1940 – Disyembre 8, 1980)

Bobby Fischer (Marso 9, 1943 – Enero 17, 2008)

Wilhelm Steinitz (Mayo 17, 1836 – Agosto 12, 1900)

Frontliner din ang mga basurerong manggagawa

FRONTLINER DIN ANG MGA BASURERONG MANGGAGAWA

pagpupugay sa mga basurerong manggagawa

kinukuha pa ang basurang tinapon ng madla

sa kabila ng salot, malaki ang nagagawa

patuloy ang trabaho, mabuti't di nahahawa

mag-ingat din po lagi kayong mga basurero

matiyak din ang karapatan n'yo bilang obrero

sa kabila ng COVID-19, tuloy ang trabaho

at masiguro lang na malinis ang buong Metro

mabuhay kayong mga basurerong manggagawa

mga basurerong frontliner din, kahanga-hanga

kaharap ma'y di makita, salot na pumupuksa

basura'y kinokolekta nang di rin makahawa

sana ang kagalingan din ninyo'y maitaguyod

at maitaas din ang natatanggap ninyong sahod

dapat masuklian ang inyong sakripisyo't pagod

saludo po kami pagkat kayo'y tunay na lingkod

- gregbituinjr.

04.04.2020

Ika nga nila: "Distancia Amigo"

IKA NGA NILA: "DISTANCIA AMIGO"

nawawala na rin ang ugnayan sa isa't isa

dahil dapat nang mangyari'y isang metrong distansya

o higit pa upang di magkahawaan ang masa

sa panahong ang COVID-19 pa'y nananalasa

ayon sa karatula sa trak: "Distancia Amigo"

nang di agad magkabanggaan kung biglang magpreno

sa ngayon, kaibigan, layo-layo muna tayo

at baka biglang mang-utas ang sakit na dorobo

di dapat magkahawaan, huwag basta babahing

takpan muna ang ilong ng panyo, tisyu o napkin

huwag ding basta humawak sa geyt na kalawangin

o yaong hinawakan ng mga kung saan galing

magpainit sa araw, magpalakas ng katawan

magbitamina ka rin, paganahin ang isipan

layo-layo man, kaharap ay di pulos karimlan

"Distancia Amigo" at may umaga pang daraan

- gregbituinjr.

04/04/2020

Nais kong magboluntaryo laban sa COVID-19

Nais kong magboluntaryo laban sa COVID-19

nais kong magboluntaryo laban sa COVID-19

ayokong sa bahay lang, itlog ay palalakihin

subalit di ako doktor, nars, o health worker man din

nais ko lang tumulong, anumang kaya'y gagawin

kumbaga, ayokong nasa gera'y walang magawa

habang tigil sa trabaho ang kapwa manggagawa

sa nangyayaring ito'y dapat lang bang tumunganga?

maghintay lang kung kailan kwarantina'y mawala?

ayokong manood lang ng ulat tungkol sa sakit

pulos istatistika, ilan na ba ang maysakit

nakatunganga akong baka mahawa ng sakit

magboluntaryo sana't mag-ambag kahit maliit

ang COVID-19 na'y talagang tunay na digmaan

paano maliligtas ang bansa't sangkatauhan

maraming frontliner na'y nawala't nalalagasan

ako'y nakatunganga't di makatulong sa bayan

ginagawa'y kwento't tulang di naman makakain

kaya gutom ang pamilya't di sila mapakain

kaya nais kong magboluntaryo'y magkasilbi rin

sa sitwasyong di nakikita ang kakalabanin

ako'y tibak na hinanda ang sarili sa digma

ako'y makatang sa nangyayari'y makakatula

isusulat ko ang mga nakikitang masama

handa ang bisig sa sitwasyong nakakatulala

kung kailangan ng boluntaryo, sabihan ako

nasa probinsya man, malayo sa Maynilang sentro

nais magsilbi't magkasilbi sa sitwasyong ito

at mapanatili ang sanidad, di nababato

- gregbituinjr.

Protektahan ang sarili, lalo sa social media

Protektahan ang sarili, lalo sa social media

protektahan ang sarili, lalo sa social media

ang facebook, twitter mo't email ay alagaan mo na

lalo ang password mong sariling buhay ang halaga

tanga ka pag binigay mo ang password mo sa iba

di binibigay ang password kahit sa kapamilya

baka kahit na kamag-anak mo'y mapagtripan ka

o dahil sa kawalang-ingat, facebook mo'y masara

at di nila aamining ito'y ginalaw nila

may Cyber Crime Prevention Act na ngang naisabatas

at mayroon na ring Data Privacy Act na batas

may protonmail, jitzi, tutanota pang nailabas

upang maprotektahan ang ating datos sa labas

alagaan ang blog mo't wordpress, huwag ipagyabang

huwag basta pindutin ang site kung naaalangan

baka may virus at kompyuter mo'y maapektuhan

mag-ingat ka rin baka ka na ini-espiyahan

pakikitungo sa social media'y gawing maganda

at kung may kadebate ka'y huwag basta mambara

huwag ring basta pumatol kung ayaw mong ma-block ka

higit sa lahat, magpakatao sa social media

- gregbituinjr.

Tigilan daw ang pagbatikos, sumunod ka na lang

Tigilan daw ang pagbatikos, sumunod ka na lang

tigilan daw ang pagbatikos, sumunod ka na lang
ang sabi ng nakapaligid sa pangulong halang
kung gayon nga, karapatan na'y anong pakinabang?
magpahayag ay karapatan, ano sila, hibang?

may karapatan kang magsalita, aawatin ka
bakit namayagpag na ang mga utak-pasista
dahil ba hazing ang natutunan sa akademya
dahil maralita lang tayo'y minamata-mata

tingin sa tao'y robot na dapat disiplinahin
kasi raw ayaw makinig gayong nagugutom din
ayaw mapiit sa bahay, hahanap ng pagkain
kung kinakailangan, sabihin yaong hinaing

ang bawat hinaing ba'y isa nang pambabatikos
ganyan ba ang utak nila't isip na'y naluluslos
sumunod ka lang, kahit pamilya'y gutom at kapos
pag nagutom ang dukha, kanila bang inaayos

sumunod ka na lang, turing nila sa masa'y robot
ganito disiplinahin ang masa, tinatakot
paano ba aayusin ang utak na baluktot
di basta manakot sa sitwasyong masalimuot

- gregbituinjr.

Ako'y aktibistang nangangarap ng pagbabago

Ako'y aktibistang nangangarap ng pagbabago

ako'y aktibistang nangangarap ng pagbabago
na karapatang pantao'y laging nirerespeto
aking pinangarap maging isang Katipunero
at sosyalistang hangad ay pagkapantay sa mundo

sa Liwanag at Dilim ni Jacinto'y nasusulat
sabi niya: "Iisa ang pagkatao ng lahat!"
ito'y napakaganda't sadyang nakapagmumulat
kaya igalang bawat isa kahit di kabalat

aralin ang lipunang may mayaman at mahirap
bakit ganito ang sistema't hirap ang nalasap?
anong klase bang pagbabago ang dapat maganap?
di ba't dapat mawasak ang ugat ng paghihirap

ako'y aktibistang di pa titigil sa pagkilos
pagkat kayrami pang masang naghihirap at kapos
sa puso't diwa pagkapantay nawa'y mapatagos
ibahaging pantay ang yaman sa masa ng lubos

hanggang di pa pantay ang kalagayan sa lipunan
patuloy akong kikilos, magmumulat sa bayan
na pribadong pag-aari'y ugat ng kahirapan
titigil lamang ako sa araw ng kamatayan

- gregbituinjr.

Pagkatha habang nag-iigib

Pagkatha habang nag-iigib

kagabi, tatlong oras akong nag-igib ng tubig
apat na malalaking balde'y pinuno, humilig
muna sa tabi, kay-iingay ng mga kuliglig
habang kinakatha yaong pag-igib at pag-ibig

tubig ay isa o dalawang beses isang linggo
kung tumulo kaya dapat lagi nang magsiguro
sadyang kayhirap pag mawalan ng tubig sa gripo
kaya mag-antabay lagi pag tumulo na ito

ang pag-iigib ay panahon din ng pagninilay
kahit yaring mga bisig minsan ay nangangalay
sa palanggana't timbang maliliit maglalagay
din ng tubig at ito'y pupunuin ng mahusay

habang nakahilig ay nag-iisip ng kataga
sa bawat taludtod ay ano bang wastong salita
minsan nasa isip sinong halimaw ang gumiba
ng moog sa bundok ng naggagandahang diwata

o kaya, paano ang gutom ay palilipasin
o anong pipitasin, lulutuin, uulamin
pag kwarantina pala'y minsan ganito ang gawin
kumatha habang nasa panahon ng COVID-19

- gregbituinjr.

Soneto sa Haring Praning

O, HARING PRANING

O, Haring Praning, nakadroga ka na naman po ba?
Hirap ka na ba't nais mo pang patayin ang masa?
Ang magrali dahil sa gutom ba'y kasalanan na?
Rinig mo ba, Haring Praning, ang mga daing nila?

Ikaw ang nagsabing ang sarili'y i-kwarantina
Na gobyerno'y bahala sa pagkain at pag-asa
Gayong nauubos din ang pagkain at pasensya
Pagkat nagugutom na'y lumabas na ng kalsada

Ramdam mo rin ba ang gutom na dinaranas nila?
Ah, marahil hindi, kaya ganyan ka kung umasta
Nakaupo ka sa trono habang gutom ang masa
Ikaw ay bundat, sa gutom magkakasakit sila!

Ngayong nagpahayag lang sila'y papatayin mo na?
Galing mo, praning ka nga, sa trono'y bumaba ka na!

- gregbituinjr.

Nahan ang bilyong barang ginto para sa pagkain?

Nahan ang bilyong barang ginto para sa pagkain?

matapos maaprubahan ang bilyong barang ginto
na laang suporta laban sa pesteng nanggugupo
sa mamamayang nagugutom, subalit nakupo!
hari'y nagwala pa't nagugutom ang sinusugpo

imbes na sakit ang sugpuin, ano't mga dukha
na nagprotesta lang dahil makakain pa'y wala
"patayin ang mga iyan," ang hari'y nagngangawa
tila di bagay maging hari pagkat isip-bata

paano didisiplinahin ang kalam ng tiyan
pati bulate'y nag-aalburuto na rin naman
kawawa ang mga dukhang sikmura'y kumakalam
nais pang patayin nitong haring kasuklam-suklam

maaari bang isipin ng dukhang sila'y busog
gayong ramdam ang gutom, utak pa ng hari'y sabog
akala ang buhay ng tao'y parang sa bubuyog
na madaling paslangin at sa putik pa'y ilubog

di ba't karapatan ng nagugutom ang umangal
lalo't nakapiit sa bahay, walang pang-almusal
galit sa nagugutom ang bundat na haring hangal
na kampante lang nakaupo sa kanyang pedestal

dukhang gutom, binantaang pag umangal, paslangin
bakit napaupo sa trono iyang haring praning
nahan ang bilyong barang ginto para sa pagkain
ibigay sa mamamayan, huwag silang gutumin

- gregbituinjr.

Usapan ng mga langgam

USAPAN NG MGA LANGGAM

nag-uusap-usap ang pulutong ng mga langgam
paano raw masawata ang mga mapang-uyam
paano pagsasamantala'y tuluyang maparam
paano rin kakamtin ang lipunang inaasam
mga tanong na karaniwan nilang agam-agam

paano ka tutugon sa mga tanong na ito
lalo't dapat suriin ang kalagayan sa mundo
marahil, magkakaroon lamang ng pagbabago
kung walang pribadong pag-aaring pribilehiyo
ng mga nakakariwasa't mayayamang tao

babalik ba sa panahong primitibo komunal
kung saan may pagkapantay, buhay ay di marawal
baka bumalik ang panahong alipin at pyudal
at muling magsamantala ang mga may kapital
pag naulit lahat ng ito, tayo'y mga hangal

di matapos-tapos ang usapan nila't debate
hanggang ang kasalukuyan ay sinuring mabuti
pangarap na pagkapantay at prinsipyo'y sinabi
komunal man, ngunit di primitibo ang maigi
kundi progresibong komunal ang dapat mangyari

- gregbituinjr.

Nagbabadya ang unos sa dulo ng bahaghari

Nagbabadya ang unos sa dulo ng bahaghari

nagbabadya ang unos sa dulo ng bahaghari

animo'y nagpapatuloy pa ang pagkukunwari

"papatayin ko kayo!" sabi ng baliw na hari

karapatang pantao'y balewala't ginagapi

anila, sa dulo ng bahaghari'y may ginto raw

ngunit pinag-interesan ng mga trapo't bugaw

bilyong ginto para sa nasalanta'y inaagaw

tila ito sa likod ng taumbaya'y balaraw

lumitaw ang bahaghari nang matapos ang unos

may bagong unos sa nagprotestang gutom at kapos

nais silang patayin ng hari, ito ang utos

sa kanyang mga asong handang mangagat, umulos

bilyon-bilyong barang ginto'y para sa sambayanan

na sa dulo ng bahaghari'y kukunin na lamang

subalit pilit pinupuslit ng trapong gahaman

gayong nangangamatay na ang mga mamamayan

sa mga tampalasang iyon ay sinong uusig

dapat masa'y kumilos, isyung ito'y isatinig

kaya manggagawa't dukha'y dapat magkapitbisig

upang mga lilo't sukab ay tuluyang malupig

- gregbituinjr.

May puso sa alapaap

MAY PUSO SA ALAPAAP

aking nakita ang hugis-puso sa alapaap
animo'y nagbabadyang may pag-asa pa't paglingap
kahit marami nang nagugutom at naghihirap
ay babagsak din ang mga ganid at mapagpanggap

si Gabriel Garcia Marquez sa kanyang nobela'y
pinamagatan niyang "Love in the Time of Cholera"
nasulat sa wikang Espanyol, sinapelikula
nobelistang Nobel Prize winner na taga-Colombia

masulat kaya ang "Love in the Time of COVID-19"?
pahiwatig ba ang hugis-puso sa papawirin?
ang mga frontliner na ginagawa ang tungkulin
pagmamahal iyon sa kapwa't misyong niyakap din

nawa'y matapos na ang pananalasa ng salot
na umuutas, buong daigdig na ang sinaklot
subalit may pag-asa, di tayo dapat matakot
pagkakaisa't pag-ibig pa nawa'y maidulot

- gregbituinjr.

Ang buhay ko'y pakikibaka

Ang buhay ko'y pakikibaka

ang buhay ko'y buhay ng pakikibaka

marangal ang layon, isang aktibista

nasa'y panlipunang hustisya sa masa

at palitan na ang bulok na sistema

organisahin ang masa't makibaka

pagkapantay-pantay ang adhika't nasa

walang pang-aapi't pagsasamantala

di ba't simulaing ito'y anong ganda

ako'y aktibistang tuloy sa pagbaka

dukha't manggagawa ang laging kasama

na di mapakali pag api ang masa

kumikilos laban sa ugat ng dusa

nais kong mamatay sa tama ng bala

makaharap ko ma'y baril ng pasista

di ko hahayaang mamatay lang basta

tiyak na lalaban, tiyak na kakasa

aking adhikaing magbigay-pag-asa

masa'y ipaglaban at maorganisa

upang kamtin yaong tunay na hustisya

itayo'y lipunang sadyang sosyalista

- gregbituinjr.

Tula sa ika-232 kaarawan ni Gat Francisco Balagtas

TULA SA IKA-232 KAARAWAN NI GAT FRANCISCO BALAGTAS
(Abril 2, 1788 – Pebrero 20, 1862)

Makatang Balagtas, / tunay na dakila
At isang bayani / dahil sa inakda
Kinathang kayhusay / at matalinghaga
Ang Florante't Laura / n'ya'y kahanga-hanga!

Tila may kahawig / ito sa daigdig
Ang Romeo't Juliet / na kaibig-ibig
Na haraya'y tigib / ng pagsinta't usig
Gising ang pag-ibig / na di palulupig!

Kiko Balagtas na / dakilang totoo
Isang pagbati po / sa kaarawan mo
Kahit naghihirap, / pagbati'y narito
O, Kiko Balagtas, / tunay kang idolo!

Balik-balikan man / ang kanyang sinulat
Ang bayan nga'y sadyang / dito'y mamumulat
Lilo't tampalasan, / taksil na kabalat
Ating pag-ingatan / nang di makasugat.

Gagawin ko pa rin / ang planong pagkatha
Tutula ng isang / kwentong anong haba
Alay ko sa dukha't / uring manggagawa
Sana, habang buhay / pa'y aking magawa.

- gregbituinjr.
04.02.2020

Ngayong April Fool's Day

Ngayong April Fool's Day

Nawala na ba ang mga gimik na pagbibiro
Gayong April Fool's Day, manloloko'y tila naglaho
Ah, marahil dahil sa COVID, sila'y nasiphayo
Yamang nasa bahay lang at biro'y di mailako
O nagkasakit, huwag sana, ang mga damuho!

Nawa'y walang magkasakit, April Fool's Day man ngayon
Gawin muna'y mabuti kahit wala pang malamon
Ang pagbibiro namang ito'y may tamang panahon
Para iba'y patawanin at sumaya maghapon
Relaks lang, mayroon pa namang susunod na taon

Ipagpaliban na muna habang nasa quarantine
Lilipas ang April Fool's Day, ang masa'y tatawa rin
Fill in the blanks, ano kayang lunas sa COVID-19
Oo, kailangan ng masa'y mass testing ngayon din
O social distancing muna kung walang gamot pa rin

Ligalig ang bayan, di pa tayo makabungisngis
Sana kung magbibiro'y di birong nakakainis
Dapat muna sa ngayon ay mga birong malinis
April Fool, wala munang lokohan ngayong may krisis
Yamang araw na ito sa iba'y di naman labis

- gregbituinjr.
04.01.2020

Ligalig ngayon ang bayan

Ligalig ngayon ang bayan

ligalig ngayon ang bayan, ang lahat ay balisa
liglig sa dusa lalo't sa bahay ay tambay muna
ligid-ligid lang ang COVID-19, nananalasa
ligtas sana ang bawat isa't kanilang pamilya

ligoy pang mangusap ang ilan na mag-kwarantina
ligaw tuloy ang masa sa kanilang nadarama
ligwak din sa gutom ang masang balisa tuwina
liga'y tumulong sana upang matulungan ang masa

ligo sa umaga, simula ulo hanggang paa
ligamgam ng tubig ay damhin habang kumakanta
ligisin ng todo ang anumang dumi't bakterya
lipit na matapos maligo, kunin na ang twalya

ligtas na pamilya'y tila ba isang pangarap na
ligaw man sa ngayon, nawa'y matapos na ang dusa
ligaya ma'y di dama, sana'y ligtas bawat isa
ligalig na panahon ito'y malampasan sana

- gregbituinjr.

Mula lockdown hanggang lock jaw

Mula lockdown hanggang lock jaw

sabi ng isang kakilala, from lockdown to lock jaw
tila nakuha pang magbiro sa panahong ito
o baka naman dahil sa gutom, siya'y seryoso
lalo't ulam lang niya'y ihaw na tuhog sa kanto

siya'y murang tuhog-tuhog ang nilantakan na rin
dahil nagtitipid sa panahon ng COVID-19
paano kung kalusugan niya'y di patawarin
kung magkasakit siya'y paano patatawirin

dahil diyan, baka lockdown to lock jaw na'y mangyari
huwag naman sana, ngunit di tayo mapakali
di ka sa COVID-19 mamamatay, yaong sabi
kundi sa gutom, SA GUTOM, para kang walang silbi

sana kalagayang ito'y bumalik na sa ayos
pananalasa ng salot ay tuluyang matapos
sana maprotektahan din ang mga dukhang kapos
magkaroon din sila ng pagkain at panustos

- gregbituinjr.