Pagtangkilik

PAGTANGKILIK

patuloy lang basahin ang pahayagan ng dukha

na di lang dyaryo kundi produkto ng dugo't luha

binabalita ang nangyayari sa maralita

sinasalaysay ang saysay ng buhay nila't diwa

nakikibaka para sa karapatang pantao

pulos diskarte man, walang permanenteng trabaho

walang sahod, nagtitinda lang sa bangketa't kanto

subalit namumuhay ng marangal, di perwisyo

nakatira sa pinagtagpi-tagping barungbarong

o sa tabing ilog, tabing riles, o sa danger zone

ang iba nama'y sa himlayan ng mga kabaong

o kaya'y nakikiiskwat sa tabing subdibisyon

Taliba ng Maralita'y saksi sa laban nila

simpleng pamumuhay at puspusang pakikibaka

mabuhay kayong dukha, kumilos ng sama-sama

sa pagtangkilik sa Taliba, salamat talaga!

- gregoriovbituinjr.

11.23.2022

* ang Taliba ng Maralita ang opisyal na pahayagan ng pambansang organisasyong Kongreso ng Pagkakaisa ng Maralitang Lungsod (KPML)

Sa kaarawan ni Huseng Batute

SA KAARAWAN NI HUSENG BATUTE

taospuso kaming nagpupugay
sa iyo, Batute, isang tagay
tanging masasabi naming tunay
sa iyo'y mabuhay ka, mabuhay!

ang una raw nalimbag mong tula'y
pinamagatang Pangungulila
na sinulat mo nang batang-bata
sa dyaryong Ang Mithi nalathala

makatang pumuna sa lipunan
nang tayo'y sakop pa ng dayuhan
tinula ang mithing kalayaan
naging hari pa ng Balagtasan

ang puso mo pala nang mamatay
sa isang museyo raw binigay
sa kalaunan ito'y nilagay
sa libingan ng mahal mong nanay

O, makatang Batuteng dakila
kami sa tula mo'y hangang-hanga
dahil sa matatalim na diwa
lalo ang paghahangad ng laya

- gregoriovbituinjr.
11.22.2022

* litratong kuha ng makatang gala nang siya'y dumalo sa unang National Poetry Day na ginanap sa Manila Metropolitan Theater, 11.22.2022    

Sa Rali ng Paggawa

SA RALI NG PAGGAWA

naroon akong sa kanila'y nakiisa

bilang isang dating obrero sa pabrika

panawagan nila'y tunay kong nadarama

na tagos sa diwa, puso ko't kaluluwa

machine operator noon ng tatlong taon

nang maisabatas ang kontraktwalisasyon

nang kabataan pa't di na naglilimayon

nang panahong sa buhay ay maraming kwestyon

oo, kayrami naming lumahok sa rali

upang manawagan sa tanggapan ng DOLE

sa kapitalista ba sila nagsisilbi?

o dapat sa manggagawang sinasalbahe?

tingnan mo ang kayraming nilatag na isyu

kontraktwalisasyon, maitaas ang sweldo

ang tanggalan sa pabrika, kayraming kaso

pati na karapatan ng unyonisado

tila ang paggawa'y dinaanan ng sigwa

sa batas niring kapitalismong kuhila

minimithi'y kamtin sana ng manggagawa

parusa ang sa kanila'y nagwalanghiya

- gregoriovbituinjr.

11.22.2022

Hoy, kapitalista, magbayad ka!

HOY, KAPITALISTA, MAGBAYAD KA!

ang sulat sa plakard, "Trabaho, Hindi Bayad"

basahin mo, mabilis ang bigkas sa "Bayad"

kung mabagal ang bigkas, pinapipili ka

kung trabaho o bayad, alin sa dalawa

ngunit mabilis ang bigkas, naunawaan

ang trabaho ng obrero'y di binayaran

hindi makatarungan ang kapitalista

tanging hinihingi ng obrero'y hustisya

kaya panawagan ng mga manggagawa

bayaran ang trabaho't bayaran ng tama!

sa kapitalista, hoy, magbayad ka naman!

obligasyon sa obrero'y huwag takbuhan

pinagtrabaho sila, kaya magbayad ka!

at kung di ka magbabayad, magbabayad ka!

- gregoriovbituinjr.

11.21.2022

* Litratong kuha ng makatang gala sa pagkilos ng mga manggagawa sa DOLE, 11.21.2022

Ang Diyos ng Kapital

ANG DIYOS NG KAPITAL

ang kapitalista'y nagpapadasal

habang manggagawa nila'y kontraktwal

tila ba siya'y nagpapakabanal

habang manggagawa nila'y kontraktwal

limpak ang tubo ng mangangalakal

ngunit manggagawa pa ri'y kontraktwal

bilyon-bilyon ang tubong kinakamal

ngunit manggagawa pa ri'y kontraktwal

sa pabrika'y malimit magpamisa

upang umunlad pa raw ang kumpanya

ngunit doon sa loob ng pabrika

sa manggagawa'y mapagsamantala

lakas-paggawa'y di bayarang tama

sa trabaho'y lampas sa oras pa nga

lakas ng manggagawa'y pigang-piga

subalit sahod pa'y sadyang kaybaba

ganyan ang pagpapakatao't asal

ng mga kapitalistang marangal

ayaw pang iregular ang kontraktwal

obrero ma'y nagtrabahong kaytagal

binawi lang daw ng mangangalakal

ang mga ginastos nila't kapital

kahit manggagawa nila'y kontraktwal

maregular ito'y di itatanghal

- gregoriovbituinjr.

11.21.2022

Manggagawa

MANGGAGAWA

manggagawang sagad na sa trabaho

subalit kaybaba naman ng sweldo

tila sa paggawa'y naaabuso

tila aliping inaagrabyado

bakit ba napagsasamantalahan?

ang mga obrerong tigib kaapihan

ng mga kapitalistang gahaman

dahil di magkaisa't nalamangan?

sa kapital ba'y may utang na loob

dahil nagkatrabaho kaya subsob

sa pabrika't sa init ay nasuob

wala nang pahinga't nasusubasob

ingat, manggagawa, magkapitbisig

upang may mapala't huwag magpalupig

ipakita yaong prinsipyo't tindig

lalo't daming pinakakaing bibig

pamilya at kapitalistang bundat

ang binubuhay habang binabarat

ang natatanggap na sweldong di sapat

ah, manggagawa'y dapat pang mamulat

- gregoriovbituinjr.

11.20.2022

Stephen Crane, awtor

STEPHEN CRANE, AWTOR

nangunguna siya sa realistic fiction

pagdating sa panitikang Amerikano

ang kanyang nobela'y punung-puno ng aksyon

at kanyang mga kwento'y umaatikabo

"The Red Badge of Courage" ay kaygandang basahin

"one of the great war novels of all time" ang sabi

doon sa obra maestra ni Stephen Crane

talagang mahusay pag binasang mabuti

apat na kwento niya'y kasama sa aklat:

ang The Open Boat, The Blue Hotel, The Upturned Face

at The Bride Comes to Yellow Sky, mabibigat

na paksang isinulat niya ng makinis

siya'y makata, nobelista, mangangatha

dalawampu't walo ang edad nang mamatay

na sa literatura'y kayraming nagawa

masasabi ko'y taospusong pagpupugay

- gregoriovbituinjr.

11.19.2022

* Stephen Crane, mangangathang Amerikano, (Nobyembre 1, 1871 - Hunyo 5, 1900

Ang batang nagwagayway ng flag sa Climate Strike

ANG BATANG NAGWAGAYWAY NG FLAG SA CLIMATE STRIKE

nagsalita si Noel Cabangon hinggil sa klima

nang may batang mag-isang nagwagayway ng bandila

kapuri-puri, di lang basta nakinig ng kanta

dapat siyang parangalan, sadyang kahanga-hanga

di sinayang ang panahon at siya'y binidyuhan;

ang simpleng pagwawagayway niya ng flag na'y sapat

nang magsilbing inspirasyon sa mga kabataan

at sa atin, sa bata'y taospusong pasalamat

di sapat ang tulang ito para sa batang iyon

sino siya, anong ngalan niya, hanapin natin

mabigyan man lang natin ng plaque of appreciation

ang tulad niya'y kaygandang halimbawa sa atin

bata pa lang, nagbabagong klima'y dama na niya

ngunit Climate Justice ba'y gaano niya unawa

pagwagayway ng flag ay kabayanihang talaga

na sa kabila man ng init ay kanyang ginawa

hanapin sino siya nang mabigyan naman natin

ng munting papuri, kapayanamin, anong danas

sa klima, baha ba, nawalan ng bahay, tanungin

at nagbabagong klima'y gaano niya nawatas

- gregoriovbituinjr.

11.18.2022

* Naganap ang Climate Strike sa iba't ibang panig ng bansa noong 11.16.2022, kasabay ng nagaganap na COP 27 o 27th United Nations Climate Change conference sa Sharm El Sheikh, Egypt mula Nobyembre 6 hanggang 18, 2022

* Ang bidyo ay matatagpuan sa kawing o link na: https://fb.watch/gSLmBRqmhV/

Expiry date

EXPIRY DATE

month day year sa produktong Pilipino

day month year ang sa Pranses na produkto

year month day naman ang sa Koreano

isa'y day month, isa'y month day, pansin mo?

kaya malilito ka sa ganito

tingnan ang expiry date sa litrato

galing pa ibang bansa ang produkto

dahil sa may kanji na letra dito

hiragana't katakana man ito

December 9 o September 12 ba 'to?

crispy seaweed snacks, isang pagkain

mas mabuti pang produkto'y kainin

bago pa dalawang petsa'y sapitin

bago mag-September 12 na'y kainin

nang expiry date ay di na abutin

at kung sa gitna ng dalawang petsa

mula September 12 ay abutin ka

hanggang December 9, magtanong ka na

kung ang nasabing produkto'y pwede pa

kung sumakit ang tiyan, paano na?

- gregoriovbituinjr.

11.18.2022

Green Energy

GREEN ENERGY

ang Climate Strike ay katatapos lang

na anong titindi ng panawagan

dagdag one point five degree kainitan

ay huwag abutin ng daigdigan

fossil fuel at coal ay itigil na

maging ang liquified natural gas pa

tayo'y mag-renewable energy na

upang sagipin ang tanging planeta

ang korporasyon at kapitalismo

yaong sumisira sa tanging mundo

laging mina doon at mina dito

ang gubat at bundok pa'y kinakalbo

para sa laksang tubong makakamal

ay walang pakialam ang kapital

mahalaga'y tubo ng tuso't hangal

mundo't kinabukasa'y binubuwal

mensahe ng Climate Strike ay dinggin

planetang ito'y ipagtanggol natin

planetang tahanan ng anak natin

planetang pangalagaan na natin

sa COP 27, aming mensahe:

gawin ang sa mundo'y makabubuti

No to False Solutions! ang aming sabi

tara sa renewable Green Energy!

Loss and Damage at Climate Debt, bayaran!

sistemang bulok na'y dapat palitan!

sistemang kapitalismo'y wakasan!

tangi nating planeta'y alagaan!

- gregoriovbituinjr.

11.18.2022

* litrato mula sa app game sa internet

Happy 81st Birthday po, Itay

MALIGAYANG IKA-81 KAARAWAN PO, ITAY!

salamat po sa lahat-lahat, kami'y nagpupugay

sa inyong pangwalumpu't isang kaarawan, Itay

nawa'y lagi ka pong nasa mabuting kalagayan

bagamat matanda na'y maganda ang kalusugan

Itay, masasabi ko pa ring "I wish you all the best"

dahil para po sa amin, ikaw pa rin ang DaBest!

- mula kina Greg Jr. at Liberty

11.17.2022

Talang Batugan

TALANG BATUGAN

sa Ursa Minor, ito ang pinakamaliwanag

na tala, Talang Batugan ang katutubong tawag

 

ito'y NorthStar o Hilagang Bituin pag naarok

na nasa dulo ng tatangnan ng Munting Panalok

nasa hilagang axis din ng mundo nakaturo

na pag umaga'y di makita't tila ba naglaho

tinatawag rin ang bituing ito na Polaris

na ngalan ay katugma ng bayaning si Palaris

Talang Batugan? aba'y may tamad nga bang bituin?

o dahil parang tuod ito kung di kikibuin

animo'y nakasabit lang na parang tinirintas

sa kalangitang tanging pag gabi lang lumalabas

oh, Talang Batugan, kung ika'y isang paraluman

magsisipag ako upang makasama ka lamang

- gregoriovbituinjr.

11.17.2022

* Talang Batugan - katutubong tawag sa Hilagang Bituin, ayon sa UP Diksiyonaryong Filipino, p. 1212

* Munting Panalok - Little Dipper

* Palaris (Enero 8, 1733 – Pebrero 26, 1765), bayaning lider mulang Pangasinan

* Ang tulang ito'y bahagi ng planong aklat na "Talastas Ko ang mga Bituin" na katipunan ng mga sanaysay, kwento at tula. Apelyido ng asawa ko'y Talastas at ako naman ay Bituin.

Sa aking lungga

SA AKING LUNGGA

ah, bihira na akong lumabas sa aking lungga

maliban kung may pagkilos ang kapwa maralita

nagbabasa roon sa munting aklatan ng akda

ng mga awtor, nobelista, kwentista't makata

namamalagi lamang sa ilang metro kwadrado

tila isang dipang langit o munting paraiso

kung saan palibot ay magasin at ilang libro

ang musika'y busina, huni ng ibon o radyo

habang ako'y nasa bartolina ng tugma't sukat

na pawang saknong at taludtod ang isinusulat

nagdidildil man ng asin pag araw na'y sumikat

sa pagbabasa't pag-inom ng tubig nabubundat

animo'y nasa kubong naroon sa kagubatan

na buhay sa kalikasan yaong nararamdaman

paglinang ng sining ko'y dito pinagbubuhusan

ng pawis, panahon, buong puso't guniguni man

- gregoriovbituinjr.

11.17.2022

Bilin sa poste

BILIN SA POSTE

sa poste: "Bawal Umihi Dito"

sa maraming poste pa'y ganito

ngunit kaiba ang biling ito

pagkat may dugtong: "Hindi Ka Aso"

tama nga naman ang panawagan

na aso'y huwag nating tularan

para sa tao'y may palikuran

kung wala, ihi muna'y pigilan

bakit poste ang iihian pa

dahil pagpigil ba'y di na kaya

subalit isipin din ang kapwa

kung dahil sa iyo'y mangamoy na

ang poste'y papalot o papanghi

batid mong yao'y nakadidiri

nais lang ng bilin na mapawi

ang sa tao'y pangit na ugali

pag-ihi'y kayanin at kontrolin

ang palikuran muna'y hanapin

pag nakita, ginhawa'y kakamtin

kung panunubig mo'y doon gawin

- gregoriovbituinjr.

11.17.2022

Daang gulong

DAANG GULONG

pag-akyat nila ng hagdanan

bubuhatin ang bisikleta

ngayon, nagawan ng paraan

daang gulong ay nagawa na

anong galing nilang mag-isip

nang siklista'y di na magbuhat

wastong paraan ay nahagip

taospusong pasasalamat

ah, simpleng engineering iyon

upang buhay ay pagaanin

anong galing na inobasyon

upang lakbay ay pabilisin

sa pag-akyat sa hagdang bato

mga siklista'y di na hirap

may dalang ginhawang totoo

ang daang gulong na pangarap

- gregoriovbituinjr.

11.16.2022

Balintataw

BALINTATAW

kaygandang diwata ang nasa balintataw

nakangiting kaytamis, iyon pala'y ikaw

habang papasikat pa lang si Haring Araw

habang nakatalungko akong namamanglaw

kaylamig ng simoy ng hangin sa silangan

alalaong baga'y nariyan ang amihan

tutuloy kaya ang unos mula kanluran

nang maihanda naman ang pagkakanlungan

naalala kita, maalindog na mutya

ikaw na inspirasyon sa bawat pagkatha

habang kasama ko ang manggagawa't dukha

sa pag-aalay ng buhay para sa madla

kahulugan ng mga salita ba'y ano

kailangan pa ba natin ng diksyunaryo

kung sa puso'y nagkakaunawaan tayo

na tanging pag-ibig ang nagpapatotoo

ikaw ang itinutula niring panitik

na tila ba ang itula ka'y pananabik

ah, yaring aking pluma'y di natatahimik

pag may mga aping patuloy sa paghibik

- gregoriovbituinjr.

11.15.2022

Pindot mo, hinto ko

PINDOT MO, HINTO KO

simpleng bilin ng tsuper

ang "Pindot Mo, Hinto Ko"

nasusulat sa banner

para sa pasahero

huwag lang kalimutang

pamasahe'y ibigay

pagkat sa pupuntahan

ay hinatid kang tunay

di ba sapat ang "para"?

kaya iyon ginawa

pindot lang ay sapat na?

at titigil nang sadya

isang bagong pakulo?

o kaya'y nabibingi?

pindot lang at hihinto

kahit di na magsabi

- gregoriovbituinjr.

11.15.2022

Stop VAWC

STOP VAWC

Stop VAWC o Violence Against Women and Children!

kaming mga lalaki'y ito rin ang hiyaw namin

mga babae't bata'y huwag saktan o apihin

dangal nila'y respetuhin, sila'y pakamahalin

si misis nga, mag-away man kami'y di sinasaktan

pagkat siya'y tulad ng ina kong dapat igalang

lalo na't ako'y isang aktibista sa lansangan

kaya lumaking may paggalang sa kababaihan

babae ang kalahati ng buong mundo, di ba?

bawat tao'y nagmula sa sinapupunan nila

pakatandaang may karapatan ang bawat isa

ina, anak, manggagawa, dukha, sinuman sila

di rin dapat saktan ang mga bata, lalo't anak

pag lumaking may sindak, sila rin ay maninindak

alagaan sila't huwag hayaang mapahamak

ang misyon: Stop VAWC ay gawin nating palasak

- gregoriovbituinjr.

10.14.2022

* tulang ito'y inihanda para sa Nobyembre 20 - World Children's Day at Nobyembre 25 - International Day for the Elimination of Violence Against Women

Soneto sa LA_O

SONETO SA LA_O

labo, lako, lago, laho, lalo, 

lango, laro, laso, lato, layo

halos lahat sa dulo'y may impit

puwera lang sa laso, kaylupit

napaisip sa palaisipan

aba'y agad akong natigilan

posibilidad kasi'y kayrami

kaya sa pagsagot nawiwili

puwera lango, apatang titik

nang sa isip ko'y may pumilantik

anong yaman pala sa salita't

may tugmaan pa ang ating wika

hanggang may tulang pumaimbulog

na sa inyo po'y inihahandog

- gregoriovbituinjr.

11.14.2022

Sa ika-57 wedding monthsary

SA IKA-57 WEDDING MONTHSARY

mula tayo'y ikasal nang Araw ng mga Puso

narito pa ring ating pagsinta'y di naglalaho

sa ating wedding monthsary, patuloy ang pagsuyo

sa ginhawa't hirap, tayo pa rin, ating pangako

sa kagubatan niring pagsinta'y di mamamanglaw

lalo na't magandang kalikasan ang natatanaw

talastas kong bituin kitang laging nakatanglaw

ang inihihiyaw nga niring puso'y tanging ikaw

- gregoriovbituinjr.

11.14.2022

Pagninilay

PAGNINILAY

nais ko ring isipin

ang liwanag sa dilim

nang di ako dalawin

ng anumang panimdim

pagdatal sa mapanglaw

na gubat, naaninaw

si Floranteng naligaw

sa puno'y nakapangaw

tila ba siya'y pain

sa leyong nangangain

dumating si Aladin

leyon ay tinudla rin

ngayon, dama ko'y gutom

at laksang alimuom

ang bibig ko'y di tikom

habang kamao'y kuyom

naritong nagninilay

ngunit di mapalagay

dinalaw man ng lumbay

sana'y kamtin ang pakay

- gregoriovbituinjr.

11.13.2022

Bike lane

BIKE LANE

sabi nila, maganda para sa planeta,

mamamayan at kita ang magbisikleta

lalo na't papatindi ang init ng klima

landas daw iyon sa mabuting kalusugan

walang ambag na usok sa kapaligiran

walang polusyon sa hangin at kalikasan

ating pansinin, ang bike lane kung makikita

nasa bangketa o kaya'y tabing bangketa

malinaw, di pangmotor kundi pangsiklista

may sariling daanan, di pasingit-singit

upang nagbibisikleta'y di makalawit

ng apat na gulong na takbo'y malulupit

maraming salamat sa itinayong bike lane

kaligtasan ng siklista'y nabigyang pansin

at ngayon, bike ay pag-iipunan ko na rin

- gregoriovbituinjr.

11.12.2022

Resibo

RESIBO

dapat nga talagang may katunayan

na serbisyo't binili'y binayaran

upang mayroon kang ipaglalaban

sakali mang may mangyaring anuman

upa sa bahay, bayad sa kuryente,

tubig, bigas, o anumang binili

o sumakay ka man sa bus o taksi

pag kumain sa McDo o Jollibee

sa kapitbahayan ay nagbayad ka

pang-amilyar man o hulog tuwina

resibo'y hingin nang may patunay ka

huwag bumatay sa lista lang nila

kung palalayasin kayo sa bahay

nabili na ang lupa nilang pakay

anong labang tagariyan kang tunay

na una kayo, karapatang taglay

ah, ganyan kahalaga ang resibo

magdemandahan man kayo sa dulo

patunay mong resibo'y ipunin mo

na balang araw, sasagip sa iyo

- gregoriovbituinjr.

11.11.2022

* Ayon sa pananaliksik, Section 237 of the National Internal Revenue Code of 1997, otherwise known as The Tax Code, is the primary source of the requirement for Philippine taxpayers to issue an Official Receipt upon the sale of a service.

Tara, kape tayo

TARA, KAPE TAYO

tara, magkape muna tayo, kaibigan

di naman ito madalas, magkaminsan lang

nagkataon lang na may pampakape naman

tarang magbarako at kwento ang pulutan

ang ritwal ng paghigop ng kape sa tasa

ay pampasigla ng katawan sa umaga

magkape lang ng katamtaman, huwag sobra

anumang labis ay masama, sabi nila

pinapataas raw nito ang adrenalin

sa katawan, kaya magana kang kumain

caffeine sa kape'y haharang sa adenosin

sa utak kaya isip ay pagaganahin

kaya pag may suliranin kang naninilay

magkape muna tayo't pag-usapang husay

at ikwento mo bakit di ka mapalagay

baka payo sa'yo'y makatulong nang tunay

madalas ay ganyan tayo pag nagkakape

napapag-usapa'y paksang napakarami

pati sa problema'y anong makabubuti

tarang magkape't sa kwentuhan ay mawili

- gregoriovbituinjr.

11.11.2022    

Halaga ng boto

HALAGA NG BOTO

nakita ko lang, dapat daw ang pagboto

ay dahil sadyang maglilingkod sa tao

tama, magsilbi, di sa kapitalismo

o maging pyudal mang kaayusan ito

salamat, ito'y paalala sa atin

gintong kaisipang isapuso natin

pipili tayo, di ng mang-aalipin

kundi maglingkod sa masa ang mithiin

- gregoriovbituinjr.

11.10.2022

Ang Alpha Centauri

ANG ALPHA CENTAURI

bata pa ako'y dinig ko na ang Alpha Centauri

isa sa mga bituing kayliwanag sa gabi

kinagiliwan noon, napaka-interesante

kaya astronomya'y kinahiligan ko rin dati

pinakamaliwanag sa konstelasyong Centaurus

at pangatlo ring pinakamaliwanag nang lubos

sa panggabing langit, nanaliksik, ito'y natalos

sa gabi'y tinitingala, huwag lamang may unos

nasa apat punto tatlumpu't pitong sinagtaon

o lightyear mula sa araw yaong distansya niyon

sa sistemang solar pinakamalapit na iyon

tuwing minsan, sa paksang ito ako nakatuon

dahil Bituin ang apelyido'y aking pinlano

na isulat ang bituin sa ating uniberso

pinag-iipunan kong bumili ng teleskopyo

upang sa ating kalawaka'y higit pang matuto

- gregoriovbituinjr.

11.10.2022

* Bahagi ng planong aklat na "Talastas Ko ang mga Bituin" na katipunan ng mga sanaysay, kwento at tula. Apelyido ng asawa ko'y Talastas at ako naman ay Bituin.

* Pinaghalawan:

https://www.nasa.gov/mission_pages/chandra/images/alpha-centauri-a-triple-star-system-about-4-light-years-from-earth.html

forbes.com/sites/startswithabang/2017/12/29/how-shooting-for-alpha-centauri-will-change-the-world/

https://www.constellation-guide.com/alpha-centauri/

Pagtunganga

PAGTUNGANGA

tingin nila'y di trabaho ang pagtunganga

pagkat nakatalungko lamang sa bintana

animo'y tamad pagkat walang ginagawa

imbis na bisig, ang nagtatrabaho'y diwa

ilalarawan ang nagliliparang ibon

o ang naganap noong panahon ng Hapon

eroplano'y nagbabakbakan sa kahapon

kayraming nakikita kahit wala roon

nagurlisan sa bisig ng tama ng bala

naroong lumuha nang iwanan ng sinta

hinabol ng leyon ang nagtakbuhang usa

namatay pala kaya wala nang nadama

matapos tumunganga ng ilang sandali

ay aapuhapin ang plumang siyang sanhi

upang isulat ang ihahasik na binhi

para sa panitikan, hustisya, at mithi

doon ay inilabas sa sinapupunan

ang mga niloloob sa kaibuturan

sa pagtunganga'y laksa ang natutuklasan

na sa taludtod na natin matutunghayan

- gregoriovbituinjr.

11.10.2022

Expiry date

EXPIRY DATE

aba'y saktong isang buwan ang expiry date

ng nabili naming anong tamis na biskwit

na nakatatak sa pinagbalutang plastik

na dagdag basura kung di ie-ecobrick

mabuti't ganito'y inilalahad naman

upang konsyumador ay may pagpipilian

upang pag kinain, di sumakit ang tiyan

expiry date ay tatak ng kasiguruhan

tatlong piso ang balot, laman din ay tatlo

aba'y piso lang pala ang isang piraso

na ibibigay ko sa paboritong apo

na matiyagang mag-aral upang matuto

luma ba ang biskwit o pwede pang kainin?

tingnan muna ang expiry date ng bibilhin

mabuti't nakalagay sa binili natin

upang sa huli'y di ka magsising alipin

- gregoriovbituinjr.

11.09.2022

Haraya

HARAYA

sabi'y balikan ang busilak na imahinasyon

haraya'y paganahin, huwag laging nakakahon

sa isang paksa o silid, minsan ay maglimayon

galugarin ang paligid, balikan ang kahapon

baka matanaw ang kawan ng ibong lumilipad

sa mandaragit, ang inakay ay huwag ilantad

yaon daw laki sa layaw ay karaniwang hubad

alagaan ang kutis kung sa araw nakabilad

pumapailanglang ang haraya hanggang sa dulo

at muling bubulusok tungo sa putikang kanto

aaliwalas ang langit, maya-maya'y may bagyo

ingat lang sa lestospirosis kapag nagdelubyo

patuloy tayong kumibo pag may isyung pangmadla

dahil nagmamakata'y mamamayan din ng bansa

kung may bulkang sasabog o rumaragasang baha

o pagtaas ng presyo'y pahirap sa manggagawa

sa ating mga katha'y magandang isalarawan

maging pagsasamantala't buhay ng karaniwan

ngitngit ng kalikasan, pagbabago ng lipunan

ito'y ating ambag sa pagyabong ng panitikan

- gregoriovbituinjr.

11.09.2022

Ang makatang Jason Chancoco at ako

ANG MAKATANG JASON CHANCOCO AT AKO

makatang Bikolano, ka-batch ko siya sa LIRA

doon nakilala, higit dalawang dekada na

kaklase namin si Edgar Samar na nobelista

makatang Jose Jason Chancoco ang ngalan niya

muling nagkatagpo isang dekada ang lumipas

na sa paanyaya ng makatang Raul Funilas

ay tumugon, nagkakwentuhan, alak ay nilabas

at nakunan ng litratong may lawrel ni Balagtas

animo sa Balagtasan kami ay nagtagisan

nang lawrel na makintab, aming ulo'y pinutungan

makatang Santiago Villafania, kami'y kinunan

habang ang iba pang makata'y nagkakatuwaan

pagbati'y aking pinaaabot kay klasmeyt Jason

na nakapaglathala ng aklat ng tula noon:

ang Pagsasatubuanan: Poetikang Bikolnon

na sa pagbasa nito sa aki'y malaking hamon

mabuhay ka at iyong mga tula, pagpupugay

sa kapwa makatang talagang dekalibreng tunay

sana kay Sir Rio balang araw ay maihanay

haraya'y pailanlangin, sa'yo'y isa pang tagay!

- gregoriovbituinjr.

11.09.2022

* LIRA - Linangan sa Imahen, Retorika at Anyo

* magkaklase sa LIRA: Setyembre 2001 - Marso 2002

* taon 2009 nang nalathala ang Pagsasatubuanan

* kuha ang litrato noong 2013

Tosilog

TOSILOG

nang magka-COVID ako noon, ang payo ni Ninang:

tigilan muna ang pamumuhay kong vegetarian

magkarne, dapat mayroong protina sa katawan

magkarne't magpalakas, magkalaman ang kalamnan

anong sakit man sa loob, sinunod ko ang payo

para sa kabutihan ko rin yaring tinutungo

pagiging vegetarian ay di pa rin maglalaho

lalo't prinsipyong makakalikasa'y sinapuso

kaya nang minsang magutom, umorder ng tosilog

na kombinasyon ng tosino, sinangag at itlog

o kaya naman ay tosino, sinaing at itlog

maganda raw ito sa tulad kong di naman kalog

bagamat minsan lamang magkarne, natutulala

ang madalas ay gulay at isda, nakakatula

bigas na kinanda o red rice, puspos talinghaga

lalo't kasama sa hapag ay magandang diwata

paminsan-minsan lang magkarne, vegetarian pa rin

lalo't mahal ang kilo nito, nag-budgetarian din

okra, talong, kamatis at galunggong ang bibilhin

talbos ng petsay, sili't kintsay, isapaw sa kanin

- gregoriovbituinjr.

11.09.2022

Pulang buwan

PULANG BUWAN

Nobyembre Syete, laban sa Red Tagging ay may presscon

at anibersaryo rin ng October Revolution

Nobyembre Otso, gabi nama'y lumitaw ang Red Moon

napuna ko, pula pala ang suot kong short ngayon

mataman kong pinagmasdan ang buong kalangitan

payapa, unos ay di nagbabanta, kainaman

anong kahulugan ng Red Moon sa kinabukasan

tulad ng aking pisngi ay namumula ang buwan

di ko pa maarok ang dala niyang talinghaga

habang siya'y pinagmamasdan kong nakatingala

ah, baka dapat tayong maging listo't laging handa

sa banta ng redtagging sa nakikibakang dukha

mapulang buwan, kasabay ng eklipse o laho

kulay ng dugo, kulay na madugo, nagdurugo

ang tunay na demokrasya'y huwag sanang gumuho

at karapatan ay igalang nang buong pagsuyo

- gregoriovbituinjr.

11.08.2022    

Ang pagtutol nang walang pagkilos ay pagsang-ayon

ANG PAGTUTOL NANG WALANG PAGKILOS AY PAGSANG-AYON

"Dissent without action is consent" anang kasabihan

ah, ito'y matalim at malalim na kaisipan

batayang pangangailangan na'y nagmamahalan

tulad ng bigas, tubig, kuryenteng dapat bayaran

tutol ka sa ganito pagkat masakit sa bulsa

apektado na ang badyet mo para sa pamilya

ngunit magagawa mo bang tumutol nang mag-isa?

sa mga hirap at daing mo kaya'y pakinggan ka?

kaya may kilos-protesta na pagkilos ng tao

sa sama-samang pagkilos, may maipapanalo

kung tutol ka ngunit ayaw lumahok sa ganito

paano maisasatinig ang hinaing ninyo

tama namang magpetisyon, sama-samang isulat

sa kinauukulan ang daing ng masang lahat

di ba't sa sama-samang pagkilos kakamting sukat

upang mapababa ang presyong sa bulsa'y kaybigat

ang pagtutol nang walang pagkilos ay pagsang-ayon!

sabi ng matatanda noon magpahanggang ngayon

tutol ang kalooban, sa hirap na'y binabaon

ngunit sa sama-samang pagkilos ay di kaayon?

tumututol ngunit takot sagupain ang mali?

tila paghihirap nila'y nais mapanatili?

bakit di kumilos, kalampagin ang naghahari

sa sama-samang pagkilos makakamit ang mithi

- gregoriovbituinjr.

11.08.2022

Bungo

BUNGO

William Shakespeare at Edgar Allan Poe

dalawang makatang aking idolo

dalawang magaling sa pagkukwento

ilang tula nga nila'y sinalin ko

subalit bakit bungo ang pabalat

ng aklat nitong dalawang alamat

dahil ba sila'y nawala nang sukat

ah, anong ganda ng kanilang aklat

yaong sa libro nila'y nawiwili

mauunawa marahil ang siste

si Poe ay writer ng horror story

minsan, mambabasa'y di mapakali

si Shakespeare ay may multo sa kinatha

sa Macbeth, Hamlet, at iba pang akda

Julius Caesar, Richard III't Henry VI nga

kaya sila'y ating nauunawa

bungo ay sagisag ng kamatayan

o marahil multo ng kaapihan

na sa mga akda'y inilarawan

na noon ay binasa't naramdaman

- gregoriovbituinjr.

11.08.2022

Layon ng makatang tibak

LAYON NG MAKATANG TIBAK

kathang tula'y upang / bigkasin sa madla

iyan ang layon ko / pag nagmamakata

isyung panlipunan / ay ipaunawa

sa uring obrero't / kapwa maralita

ano ba ang tula / para sa kanila?

na kapag may sukat/  at tugma'y sapat na?

mensaheng hatid ba'y / unawa ng masa?

prinsipyo't ideya / niya'y malinaw ba?

magmulat ang layon / ng makatang tibak

katulad kong ayaw / gumapang sa lusak

layon kong itanim / sa lupa't pinitak:

binhi ng pag-asa / sa mga hinamak

itula ang buhay / ng dukha't obrero

pag minuni-muni'y / kayrami ng kwento

ng pakikibaka't / kanilang prinsipyo

nasa'y karapata't / hustisya sa tao

patibayin nila / ang prinsipyong tangan

umaasang kamtin / yaong katarungan

igalang ninuman / bawat karapatan

ang armas ko'y tula, / kayo'y ano naman?

- gregoriovbituinjr.

11.07.2022

Liwayway

LIWAYWAY

koleksyon ko ng mga huling sipi ng Liwayway

dati'y malaki, subalit pinaliit nang tunay

gayunman kaygaganda pa rin ng sinasalaysay

sarap basahing kwento, nobela, tula, sanaysay

dati, pabalat ay larawan ng mga artista

ngayon, napalitan ito ng mga ipininta

dati, animnapung pahina, ngayon, sandaan na

dati, lathala lang, ngayon, may bersyong internet pa

pinagmamalaki kong laki ako sa Liwayway

bata pa'y lagi nang bumibili nito si Tatay

bukod sa lansangan ay dito kami tumatambay

binabasa ang mga akdang napakahuhusay

ngayon ang ikasandaan nitong anibersaryo

nilathalang panitikan at kultura'y narito

sa agos ng kasaysayan ay naging saksi ito

kaytagal nang babasahin sa wikang Filipino

magasing pampamilya mula noon hanggang ngayon

nawa'y manatili kayong babasahin ng nasyon

magpatuloy pa sa ikadalawang daang taon

o ikalawang sentenaryo ay abutin iyon

nawa'y patuloy na sumikat ang bukang liwayway

na laging kasangga sa pagitan ng tuwa't lumbay

sa lahat ditong nagsusulat, mabuhay! mabuhay!

tanging alay sa inyo'y taospusong pagpupugay!

- gregoriovbituinjr.

11.06.2022

Pusang itim

PUSANG ITIM

kasalanan ba ng pusa kung kulay niya'y itim?

na dala niya'y kamalasan at pawang panimdim?

kabaligtaran ng liwanag, kaya siya'y dilim?

na para sa mapamahiin, dulot niya'y lagim!

sa mga liblib na pook, siya'y kinatakutan

sa panahong nangingibabaw ang kababalaghan

sa mga akda, ang kulay niya'y pinupulutan

ramdam nila ang lagim, sila'y pinupuluputan

Kanong si Edgar Allan Poe ay may kwentong "The Black Cat"

si Theodor Geisel ay may kwentong "The Cat in the Hat"

sa Pet Sematary ni Stephen King magugulat

may grupo sa Harry Potter, alaga'y pawang black cat

sa lumang panahon, ganyang paniwala'y palasak

walang sala ang pusa kung ganyan ipinanganak

kaya di siya dahilan kung iba'y napahamak

ang maglakbay sa putikan, sa kumunoy ang bagsak

pag nakita'y pusang itim, huwag ka nang magtungo

sa balak puntahan, baka malasin ka't maglaho

"black is beautiful", ika nga sa kabilang dako

ng ating mundo, kulay itim ay kasuyo-suyo

ayon sa agham, nanggaling ang balahibong itim

sa ama't ina nito, nagmula sa kanilang gene

kung saan nabuo ang sinasabing eumelanin

kung isang gene ay may itim, may itim din na kuting

- gregoriovbituinjr.

11.05.2022

Aklat ni Gary

AKLAT NI GARY

"Makibaka, Magdiwang, Magmahal", kaygandang libro

ng manganganta't makatang sa marami'y idolo

aklat ni Gary Granada, maigi't nabili ko

buti't may pera sa bulsa nang matsambahan ito

sikat niyang kanta'y nalathala dito na tula

tulad ng Bahay, Dam, Holdap, Puhunan, Manggagawa

Kung alam mo lang Violy, Rehas, Kung ika'y wala

Makibaka, Huwag Matakot!, kaygagandang akda

di lang collector's item kundi mahalagang aklat

hinggil sa hustisyang asam, karapatan ng lahat

tulang inawit, dinggin mo't may isinisiwalat

sa mga tulawit ni Gary, maraming salamat

Makibaka at kamtin ang panlipunang hustisya

pawiin ang pang-aapi at pagsasamantala

Magdiwang na bagamat dukha, tayo'y narito pa

ramdam man ay dusa't luha, patnubay ay pag-asa

Magmahal, ngunit di ng mga presyo ng bilhin

kundi punuin ng pag-ibig itong mundo natin

pakikipagkapwa tao'y layon nati't gagawin

halina't kumilos nang lipunang patas ay kamtin

- gregoriovbituinjr.

11.04.2022

Anyubog

ANYUBOG

mananatili ang pag-ibig

kung may ilalaman sa bibig

mabuti pang bilhin mo'y bigas

kaysa laging kumpol ng rosas

isipin mong pag nasa dilim

liwanag ay makakamtan din

huwag mawalan ng pag-asa

lalo'y iyon lang ang meron ka

sa tingin ako'y makuha man

ay dahil ikaw ang namasdan

mga anyo'y nagkakahubog

lalo na't araw na'y lumubog

sa liwanag ay may anino

iba't ibang hugis man ito

at kung anino na'y nawala

dilim ba'y lumukob nang sadya

- gregoriovbituinjr.

11.03.2022

Maging tinig ng api

MAGING TINIG NG API

anong magagawa mo sa kanilang walang tinig

habang panaghoy at hinaing nila'y naririnig

magsawalang kibo ba't kunwa'y walang naulinig

hindi, kundi sa kanila'y makipagkabitbisig

kung di nila masabi ang kanilang dinaranas

kung di rin nila maisatinig ang pandarahas

tayo na'y magsilbing tinig nila upang malutas

ang kanilang hinaing, lipunan man ay di patas

kung magagawa para sa kanila'y magsalita

ay ihiyaw natin ng buong pagpapakumbaba

ang kanilang mga hibik at sanhi ng pagluha

ang karapatan nila'y ipaglaban nating kusa

sabi sa Kartilya, ipagtanggol ang inaapi

kasunod pa nito'y kabakahin ang umaapi

kung magiging tinig ng api, huwag maging pipi

maging boses ng maliliit, sa masa magsilbi

- gregoriovbituinjr.

11.02.2022

Berdeng kandila

BERDENG KANDILA

berdeng kandila para sa mga namatay

nang bagyong si Paeng ay manalasang tunay

higit sandaan na raw ang nawalang buhay

kinuha ni Paeng nang ito'y manalakay

berdeng kandila sa kanila'y alay namin

bilang simbolo ng kapaligiran natin

na sa kapabayaan ay nagngingitngit din

kaya pag-usapan na ang laksang usapin

fossil fuel, natural gas, coal plants, iba pa

ay mga enerhiyang dapat itigil na

upang di na lumala pang lalo ang klima

sa renewable energy tayo'y mag-shift na

aming iniaalay ang berdeng kandila

sa alaala ng buhay na nangawala

epekto ng climate change sana'y maunawa

at palitan na ang sistemang mapanira

- gregoriovbituinjr.

11.01.2022

Pinaghalawan ng datos:

https://www.rappler.com/nation/severe-tropical-storm-paeng-death-toll-injuries-damage-missing-persons-november-1-2022/

Nobela

NOBELA

nais kong kathain ang una kong nobela

hinggil sa maraming isyu't pakikibaka

ng uring manggagawa't karaniwang masa

gagawin kong mag-isa't kaiga-igaya

ang bawat kabanata'y pakaiinitin

tulad ng tinapay na naroon sa oben 

bawat kabanata'y susulating taimtim

paksa'y pag-ibig, saya, libog, luha, lagim

pinagpapraktisan ko'y maiikling kwento

wakasan muna sa Taliba naming dyaryo

sunod, dalawang kabanata na o tatlo

at susubukang kabanata'y gawing walo

makaisang nobela lang sa buong buhay

ay may kasiyahan nang sa puso ko'y taglay

tulad ni Harper Lee, nobela'y isang tunay

sa "To Kill a Mockingbird" siya'y nagtagumpay

- gregoriovbituinjr.

11.01.2022

* litrato mula sa larong Calming Crossword na app sa socmed 

Kandila

kandila para sa mga yumaong

mahal na sa piling nati'y nawala

ngayong Undas lalo na't nagbabagyong

dulot sa nasalanta'y baha't luha

kandila para rin sa walang puntod

desaparesidong di matagpuan

kung makita sila'y ikalulugod

nawa'y kamtin nila ang katarungan

- gregoriovbituinjr.

11.01.2022