Luntiang lungsod

LUNTIANG LUNGSOD

asam ko'y luntiang kalunsuran

mapuno at masarap tirahan

may maayos na kapaligiran

maraming tanim ang kalikasan

kulay-lunti ang buong paligid

payapa ang kasama't kapatid

walang sa dilim ay binubulid

kapanatagan sa diwa'y hatid

mamamayan doo'y mahinahon

ang mga batas ay naaayon

hanging kaysarap, walang polusyon

basura'y sa tama tinatapon

lunti't walang pagsasamantala

ng tao sa tao, anong ganda

ng buhay ng mga magsasaka,

ng dukha't obrero, at iba pa

sa ganyang lungsod, sinong aayaw

kung di maalinsangaw ang araw

kung payapang mamuhay, gumalaw

kung paligid, malinis, malinaw

lipunang lunti at makatao

na ipinaglalabang totoo

sana'y makatahan sa ganito

sa lungsod na pinapangarap ko

- gregoriovbituinjr.

02.19.2022

Sa araw ng Hustisyang Panlipunan

SA ARAW NG HUSTISYANG PANLIPUNAN

World Day of Social Justice ang a-bente ng Pebrero

marapat lang alalahanin ang araw na ito

tulad ng isa pang mahalagang araw sa mundo:

ang Daigdigang Araw ng Karapatang Pantao

lalo't marami nang inhustisya ang nagaganap

na ang mga biktima'y pawang mga mahihirap

tulad ng pagtakbo ng mga trapong mapagpanggap

at tulad sa pagpaslang sa dukha sa isang iglap

nahan ang hustisya, sa araw na ito'y itanong

bakit mga inosente'y nilagay sa kabaong

bakit sa pagpaslang, tuwang-tuwa ang mga buhong

mga ina'y nagsiluha, humihingi ng tulong

"ang hustisya ay para lang sa mayaman," kainis

isa man itong katotohanang walang kaparis

alalahanin natin ang World Day of Social Justice

hustisya'y dapat kamtin, di ito dapat Just-TIIS

- gregoriovbituinjr.

02.18.2022

Bakit bawal magkasakit?

BAKIT BAWAL MAGKASAKIT?

pag may sakit ka'y di na papansinin

lalayuan ka na lang nilang kusa

tila ba wala ka nang kayang gawin

kundi sa maghapon ay tumunganga

tingin na sa iyo'y namamalimos

ng awa upang makabiling gamot

at batid nilang wala kang panggastos

di ka na pansin, ikaw na'y nalimot

iyan ang masaklap na sasapitin

ng tulad kong may sakit sa kabila

ng katapatan mo sa adhikain

na sadyang tagos sa puso mo't diwa

maliban kung may hawak kang tungkulin

nagagampanan ang misyong dakila

ah, subalit kung pabigat ka lang din

turing sa iyo'y wala ka na, wala

nabuhay na puno ng sakripisyo

ngunit sa gawain ay nagkasakit

nabuhay na niyakap ang prinsipyo

na sa puso't diwa mo'y nakaukit

may sakit ka na, walang pakinabang

ah, magpagaling ka na lang sa bahay

turing sa iyo'y pabigat ka na lang

marami kang kapalit, mas mahusay

tulad ka ng T.V. o radyong sira

di ka aayusin, papalitan ka

para ka nang kagamitang naluma

di na aayusin, papalitan na

kaya sa atin, bawal magkasakit

kaya dapat manatiling malusog

ang katawan ay alagaang pilit

at sa trabaho'y huwag pabubugbog

kung may magmalasakit, ay, mabuti

may kasangga kang nagpapahalaga

ngunit huwag kang basta mawiwili

pagkat bihira lang ang tulad niya

- gregoriovbituinjr.

02.18.2022

Bawal umihi dito

BAWAL UMIHI DITO

"Bawal umihi dito!"

ayon sa karatula

multa'y sanlibong piso

baka matulala ka

kung ikaw ay maysakit

dapat alam kung saan

iihi lalo't sirit

sa pantalon na naman

pader kasi'y papalot

o sa ihi papanghi

kaya di tinutulot

na sa pader umihi

kung di mo na matiis

sasabog na ang pantog

umihi ng mabilis

kung mahuli ka'y durog

huwag ka lang pahuli

lalo't salbaheng mama

pag-ihi'y di na libre

sa multa'y matulala

- gregoriovbituinjr.

02.17.2022

Ang maging tinig

ANG MAGING TINIG

"The least I can do is speak out for those who cannot speak for themselves." ~ ayon sa pabalat ng isang kwadernong ginagamit ko

anong ganda ng tinuran sa isa kong kwaderno

binili ko iyon dahil sa pabalat, tanda ko

kaylapot ng paninindigan, kaygandang prinsipyo

tinig niya'y para sa walang tinig sa bayan ko

parang ako, isang sagad-sagaring aktibista

sa mahabang panahon ay naging boses ng masa

di sa Kongreso o Senado kundi sa kalsada

na sa mga rali'y pinagsasalitang talaga

pagkat tungkulin ko bilang sekretaryo heneral

ng ilang organisasyon, sa diwa ko'y nakintal

sa init man ng araw, patuloy sa pagpapagal

lalo't sa poder o pader, dukha'y di nakasandal

magpapatuloy akong isang mabangis na tinig

para sa mga dukha't api nang magkapitbisig

ipapakita ang marangal na prinsipyo't tindig

pagbabago man ng sistema'y lumabas sa bibig

isa itong pagtaya o commitment ko sa madla

ang maging tinig ng mga di makapagsalita

ang maging boses ng mga inapi't mahihina

ang kanilang isyu'y sasabihin o itutula

- gregoriovbituinjr.

02.17.2022

Labada

LABADA

nang makapananghali'y naglaba

nitong damit ng aking asawa

sa akin, wala namang problema

kung labada man ay sangkaterba

suot ni misis ang mga iyon

ng ilang araw hanggang kahapon

ako'y kuskos dito, kuskos doon

sinabay na damit ko't pantalon

hanggang nilabhan ko'y binanlawan

bago isampay ay pinigaan

aking hinanger ang karamihan

ang iba'y inipit sa sampayan

ganyan kami, tulungan sa bahay

ako'y maglalaba't magsasampay

sa pagkukusot, may naninilay

akin palang diwa'y naglalakbay

kung saan-saan nakakarating

tila baga ako'y nahihimbing

kaya maglaba'y kaysarap gawin

pagkat may tula nang kakathain

- gregoriovbituinjr.

02.17.2022

Ipanalo ang atin

IPANALO ANG ATIN

ipanalo ang atin

na lider na magaling

plataporma n'ya'y dinggin

namnamin at isipin

pinanday ng panahon

ang lider nating iyon

na tatanggal paglaon

sa kontraktwalisasyon

pakinggang magsalita

ang lider-manggagawa

na ang inaadhika

kabutihan ng madla

dala n'yang pagbabago'y

pangmasa, pang-obrero

na hangaring totoo'y

lipunang makatao

Ka Leody de Guzman

para sa panguluhan

ipanalo't ilaban

para sa sambayanan

- gregoriovbituinjr.

02.16.2022

Palaisipan

PALAISIPAN

palaisipan

aking aliwan

nagpapagaan

sa pakiramdam

tanong, alamin

iyong basahin

sagot, isipin

mabubuo rin

banoy, agila

sayaw, lambada

dilag, dalaga

misis, asawa

isda ay dilis

gulay, kamatis

tubigan, batis

kutis, makinis

may isang salot

kayhabang buntot

amoy maantot

lagim ang dulot

palaisipan

tayo'y maglibang

nakakagaan

ng pakiramdam

- gregoriovbituinjr.

02.16.2022

Lasbat nat dalis

LASBAT NAT DALIS

laspag nga ba ang dilis

nang ito'y humagibis

tumalon at nagburles

sa ilog na malinis

o malawak na batis

ayokong magmalabis

sa paggawa ng hugis

di man gayon katulis

ako pala'y mabilis

napasagot si misis

minsan paalis-alis

na maganda ang bihis

hanap ay mangga't atis

paborito ng buntis

na pagsinta'y kaytamis

problema'y napapalis

ulam ko man ay dilis

at sawsawan ay patis

sa pila man magtiis

ako'y lasbat nat dalis

- gregoriovbituinjr.

02.16.2022

Tungkulin para sa kinabukasan

TUNGKULIN PARA SA KINABUKASAN

patuloy nating pangalagaan ang kalikasan

na mahalagang tungkulin ng bawat mamamayan

sapagkat isa lang ang daigdig nating tahanan

kaya kinabukasan nito'y ating paglaanan

ang pangangalaga sa mundo'y huwag ipagkait

sa susunod na henerasyong mabuhay nang sulit

di tayo kailangan ng kalikasan subalit

kailangan natin ang kalikasan, aba'y bakit?

isa iyang katotohanang tumagos sa puso

ng mga katotong sa klima nga'y nasisiphayo

dahil sa climate change, maraming isla'y maglalaho

balintuna, tataas ang tubig, lupa'y natuyo

walang makain kahit nagtanim na magsasaka

lalo't tumindi ang bagyo't kayraming nasalanta

pagsunog ng fossil fuel at coal ay tigilan na

sagipin ang masa mula sa nagbabagong klima

halina't ating pangalagaan ang kalikasan

huwag gawing basurahan ang dagat at lansangan

kapitalismong sanhi nito'y dapat nang palitan

at magandang bukas para sa masa'y ipaglaban

- gregoriovbituinjr.

02.15.2022

Liberty

LIBERTY

ang puso ko'y lumulukso

kapag nakikita kita

O, tunay kang pag-ibig ko

rosas kitang anong pula

sa Araw ng mga Puso

nais kong makapiling ka

ikaw ang tanging kasuyo

at minumutyang talaga

sa iyo lang narahuyo

itong makata ng masa

hiling sana'y di maglaho

ang iwi nating pagsinta

Kalayaan o Liberty

o Freedom o Kasarinlan

tangi kitang binibini

ng puso't kinalulugdan

Liberty ng aking buhay

Kalayaan man ang asam

Freedom man ang aking pakay

Kasarinla'y makakamtan

Happy Valentine's Day sa'yo

mahal, iniibig kita

tandaang ako'y narito

lagi para sa'yo, sinta

- gregoriovbituinjr.

02.14.2022

Tanging handog

TANGING HANDOG

regalo ko kay misis ay halamang hugis-puso

tanging handog sa iniibig ko ng buong-buo

"Hoya" raw ang tawag dito sa tanim ng pagsuyo

na ididilig ko'y pagsinta nang lalong lumago

pagmamahal ay nadarama sa tangi kong mutya

kaya nagtutulungan kami ng aking diwata

anumang sigwa o suliranin man ang magbadya

magsisikap na tunay upang kamtin ang adhika

Araw ng mga Puso'y anibersaryo ng kasal

sa civil wedding sa Tanay, alaalang dumatal

pang-apat na anibersaryo, ganyan na katagal

kaya tanim na hugis-puso ang handog sa mahal

Maligayang Araw ng mga Puso, aking sinta

at magkasama nating nilulutas ang problema

at sa anibersaryo ng ating kasal, O, sinta

tanging masasabi'y magpatuloy tayo tuwina

upang hubugin ang asam nating kinabukasan

upang pagsinta'y manatili sa kasalukuyan

upang hinaharap ay atin ding mapaglaanan

upang magiging anak at apo'y mapaghandaan

- gregoriovbituinjr.

02.14.2022

Leyon sa talampas

LEYON SA TALAMPAS

tila kami'y leyon sa talampas

mukhang mahina ngunit malakas

iniisip lagi'y pumarehas

at itayo ang lipunang patas

ganyan naman talaga ang tibak

kasangga ng api't hinahamak

na trosong bulok ay binabakbak

na trapong bugok ay binabagsak

di manhid sa mga nangyayari

sa mga isyu ng masa'y saksi

nilalabanan ang trapong imbi

at sa kalsada'y laging kasali

asam ay tunay na pagbabago

para sa kapwa dukha't obrero

na upang maging totoong tao

lubus-lubusin ang sosyalismo

pagpupugay sa nakikibaka

upang mabago na ang sistema

durugin ang trapo, dinastiya

hari, pari, burgesya, pasista

tayo man ay leyon sa talampas

hinuhubog ay magandang bukas

nasa isip lagi'y pumarehas

at itayo ang lipunang patas

- gregoriovbituinjr.

02.14.2022

Tigatlo

TIGATLO

di man planado ngunit minsan ito'y nagagawa

sa bawat araw nakakatha ng tigatlong tula

marahil dahil sa buhay na ito'y naasiwa

kaya may kuro-kuro sa napagdaanang sigwa

bigay ko sa mga pamangkin ay tigatlong prutas

langka, pinya, pakwan, rambutan, kalumpit, bayabas

madalas magkwentuhan habang ngata'y sinigwelas

pakikisamang tulad ng alak mula sa ubas

tigatlong rosas tanda ng pagsinta sa maybahay

o kaya sa kasintahang minamahal mong tunay

pinagbibigyan ang kaibigan ng tatlong tagay

habang hagilap sa putik ay tatlong gintong lantay

sa triyanggulo'y kita mo agad ang tatlong sulok

ngunit paano ba mababaligtad ang tatsulok

na marapat lang nating gawin lalo't nasa rurok

ang trapong bugok, ah, ilagay ang dukha sa tuktok

- gregoriovbituinjr.

02.13.2022

Ang nawawalang kwintas

ANG NAWAWALANG KWINTAS

binasa ko'y kwentong "The Necklace" ni Guy de Maupassant

sa isang piging, ang mag-asawa'y naimbitahan

dahil sa garbo, kwintas sa kumare ang hiniram

matapos ang piging, kwintas ay nawalang tuluyan

hanap, hanap, kung saan-saan na sila naghanap

di makita, nagpasyang palitan ito ng ganap

tiningnan ang presyo nito, anong mahal, kaysaklap

ilang taon ding mag-iipon, sadyang kandahirap

mag-asawa'y napilitang kumayod ng kumayod

kamay na'y nagkalipak at sapatos na'y napudpod

araw-gabing trabaho, nag-ipon, nagpakapagod

umabot ng ilang taon ang buhay na hilahod

trabaho ng trabaho nang kwintas ay mapalitan

upang mabili lamang ang gayong kwintas din naman

dapat mabayaran ang nasabing pagkakautang

nang pamilya nila'y di malagay sa kahihiyan

hanggang kunin ng may-ari ang kwintas na nasabi

at nakitang namayat ang nanghiram na kumare

hanggang pinagtapat niya ang tunay na nangyari

kwintas ay nawala't pinag-iipunang matindi

sabi ng may-ari ng kwintas, bakit nagkagayon

nagpakahirap ka sa loob ng maraming taon

na kung pinagtapat lang sana ang nangyari noon

ay agad nabatid na puwet ng baso lang iyon

biro mo, nabubuhay upang mapalitan lamang

ang kwintas na nawala, anong laking pagkukulang

di namalayang ilang taon pala ang nasayang

isang palad na buhay nila'y nagkawindang-windang

- gregoriovbituinjr.

02.13.2022

* litratong kuha ng makatang gala mula sa aklat na The Story and Its Writer, Fifth Edition, pahina 976

Sa pagkalagas ng pakpak

SA PAGKALAGAS NG PAKPAK

saan susuling kung ako'y nalagasan ng pakpak

at di na mabatid bakit sa putikan nasadlak

tiningnan ko ang lipunan, bakit may hinahamak

bakit dukhang kaysipag ay gumagapang sa lusak

di naman katamaran ang sanhi ng luha't dusa

bakit mahirap ang masisipag na magsasaka

na madaling araw pa nga'y nasa kabukiran na

upang tingnan ang tanim nilang alaga tuwina

walong oras sa pagtatrabaho ang manggagawa

madalas pang mag-overtime, sahod kasi'y kaybaba

ngunit bakit naghihirap ang kawal ng paggawa

binabarat kasi ang sahod nilang kaysipag nga

kapalaran nga ba iyang sanhi ng paghihirap?

ika nga ng pastor, mapapalad ang naghihirap!

populasyon ba ang sa hirap ay nagpalaganap?

mangmang ba ang dukha kaya di sila nililingap?

payo ng isang guro, pag-aralan ang lipunan

bakit laksa'y naghihirap at may ilang mayaman

ah, bakit nga ba may iskwater sa sariling bayan

pribadong pag-aari nga'y ugat ng kahirapan

magsasaka'y walang masarap na kaning masandok

dalagang bukid ay sa pagpuputa inaalok

bakit ba kayraming taong sa hirap nakalugmok

ika nga, panahon nang baligtarin ang tatsulok

lagas man ang aking pakpak, dapat pa ring kumilos

upang baguhin ang kalagayang kalunos-lunos

ngunit wala tayong maaasahang manunubos

kundi sama-samang pagkilos ng mga hikahos

sa gayon ay mapapanumbalik ang mga pakpak

muli tayong babangon mula sa pagkapahamak

upang makalipad sa himpapawid na malawak

at ang bulok na sistema'y tuluyang maibagsak

- gregoriovbituinjr.

02.12.2022

Sagipin ang daigdig

SAGIPIN ANG DAIGDIG

nasaan na ang tinig

ng panggabing kuliglig

di na sila marinig

sa aba kong daigdig

kalbo ang kabundukan

sanhi raw ay minahan

puno sa kagubatan

pinutol nang tuluyan

kaya maitatanong

ano bang nilalayon

anong isinusulong

kung masa'y nilalamon

kaygandang daigdigan

ay ginawang gatasan

bakit ba kalikasan

ay nilalapastangan

na sa ngalan ng tubo

nitong poong hunyango

wawasakin ang mundo

para sa pera't luho

dapat daw pagtubuan

ang mga kagubatan

buhay ng kalikasan

ay pagkakaperahan

hangga't kapitalismo

ang sistema sa mundo

ay lalamunin tayo

hanggang sa mga apo

pakinggan n'yo ang tinig

tayo'y magkapitbisig

sagipin ang daigdig

na puno ng pag-ibig

- gregoriovbituinjr.

02.11.2022

Bisikleta

BISIKLETA

nais kong bumili ng bisikleta

nang magamit ang bike lane sa kalsada

haha, at mali yata ang hinuha

may bike lane dahil may nagbisikleta

pamasahe'y matitipid mo naman

mararating agad ang pupuntahan

mapapalakas ang pangangatawan

pati baga, tuhod, alak-alakan

naglagay ng bike lane para sa masa

na karaniwang tabi ng bangketa

dati wala niyan, ngayon, meron na

na para nga sa nagbibisikleta

sa trapik ay di ka na magtitiis

maiaangkas pa rito si misis

na iyong sinundo mula sa opis

huwag lang magpatakbo ng mabilis

dahil di ka naman nangangarera

di ka rin naman hari ng kalsada

mag-ingat baka makabangga ka pa

kung pinangkarera ang bisikleta

magbisikleta'y magandang diskarte

upang iwas-trapik, nakakalibre

ka pa sa nagmahal nang pamasahe

huwag lang itong tangayin ng bwitre

huwag hayaan sa mga kawatan

at iparking ito kung saan-saan

bisikleta'y utol at kaibigan

na marapat mo lang na pag-ingatan

- gregoriovbituinjr.

02.11.2022

Buhay ko na ang rali

BUHAY KO NA ANG RALI

tandaan mo, di ako simpleng kasama sa rali

buhay ko na ang rali, kaya sa rali kasali

para akong hinayupak pag nag-absent sa rali

na tungkulin ay di ginagampanan ng mabuti

para akong nananamlay, nawalan ng pag-asa

gayong estudyante pa lang, kasama na ng masa

sa puso, diwa't prinsipyo'y tangan-tangan talaga

ang simpleng pamumuhay, puspusang pakikibaka

sa rali ko natutunan ang iba't ibang isyu

sa mga guro kong lider-maralita't obrero

sa rali ko napapatibay ang angking prinsipyo

bakit dapat itayo ang lipunang makatao

habang nag-oorganisa ng mga maralita

habang tumutulong din sa laban ng manggagawa

pagkat hustisyang panlipunan ang inaadhika

sistemang bulok ay mapalitan, mapawing sadya

kaya rali'y paaralan kong kinasasabikan

maglakad man ng kilo-kilometro sa lansangan

manlagkit man sa pawis ang aking noo't katawan

tuloy ang kilos tungong pagbabago ng lipunan

upang maibagsak ang mapagsamantalang uri

lalo iyang elitista, burgesya, hari't pari

palitan ng matino ang uring mapang-aglahi

ipalit ang lipunang makataong aming mithi

- gregoriovbituinjr.

02.11.2022

* litratong kuha ng makatang gala sa rali sa harap ng Senado, 01.31.2022

Biyaya

BIYAYA

"The rich want a society based on punishment because a society based on care will render them obsolete" - a quote from someone

lubos-lubos na ang biyaya

ng kapitalista't burgesya

namayagpag ang dinastiya

di nagbago ang pulitika

ah, dahil sa pribilehiyo

ng pagmamay-aring pribado

kaya sapot-sapot ang tukso

sa mga tusong pulitiko

kaya paano na ang dukha

na sadya namang walang-wala

ang mayroon lang silang sadya

ay kanilang lakas-paggawa

simple lang ang aming pangarap

isang lipunang mapaglingap

namumuno'y di mapagpanggap

at ang masa'y di naghihirap

kaya narito kaming tibak

na kasama ng hinahamak,

inaaglahi't nililibak

na ang layon naming palasak:

ibagsak ang sistemang bulok,

burgesyang ganid, trapong bugok

upang masa'y di na malugmok

at dukha'y ilagay sa tuktok

- gregoriovbituinjr.

02.10.2022

* litrato mula sa google, CTTO (credit to the owner)

Pagtula sa rali

PAGTULA SA RALI

nais kong magtanghal ng tula

doon sa harapan ng madla

ipadama ang mga katha

ibahagi ang nasa diwa

sa rali bumibigkas minsan

ng tula, isang karangalan

pati sa pulong ng samahan

na sa puso ko'y kasiyahan

rali'y pinaghahandaan ko

dapat alam mo anong isyu

minsan, mababatid lang ito

pag nasa rali ka na mismo

kwaderno't pluma'y handa lagi

isusulat ang isyu't mithi

pag natapos ay ibahagi

sa madla'y bigkasin kong iwi

ngunit madalas, di pagbigyan

tumula sa harap ng bayan

gayunman, tatahimik na lang

kung tula'y di pahalagahan

kaya buong pasasalamat

kung ako'y tawagin ngang sukat

bibigkas ng tulang sinulat

isyu'y ipaunawang mulat

- gregoriovbituinjr.

02.10.2022

Pagkatha

PAGKATHA

patuloy pa ring umaakda

gayong walang pera sa tula

naritong kaysipag lumikha

araw-gabing katha ng katha

kung sa tula'y may pera lamang

kung bawat tula'y may bayad lang

baka makata na'y mayaman

di man ito ang naisipan

may pambili sana ng gamot

sa botika'y may maiabot

dahil wala'y nakakalungkot

sa iwing puso'y kumukurot

pagtula'y di naman trabaho

na kailangan mo ng sweldo

kumbaga ito'y isang bisyo

gagawin kailan mo gusto

na kung may pera lang sa tula

mas marami pang magagawa

wala man, tuloy sa pagkatha

ito na ang buhay kong sadya

- gregoriovbituinjr.

02.10.2022

Paglingon

PAGLINGON

napapalingon sila sa poster ng kandidato

na marahil napapaisip, sino kaya ito?

at maitatanong pag nalaman nila kung sino:

bakit bumabangga sa pader ang lider-obrero?

inspirasyon ng kandidato'y manggagawa't dukha

kaya karapatan nila'y nilalaban ng kusa

kaytagal na lider ng mga samahang paggawa

kanyang pagtakbo'y makasaysayan, kahanga-hanga

para sa pagkapangulo, Ka Leody de Guzman

upang sagipin ang masa mula sa kahirapan

nang mapalitan ang sistemang para sa iilan

ipalit ay ekonomyang para sa sambayanan

ang kanyang kandidatura'y pagsalunga sa agos

dahil nakitang buhay ng masa'y kalunos-lunos

dapat nang sagipin ang bayan, ang buhay ng kapos

kapitalismong walang awa'y dapat nang makalos

si Ka Leody, makakalikasan, makamasa

lider-manggagawa, kauri, kasama, pag-asa

ang paglingon nila sa poster niya'y mahalaga

nang mabatid na mayroon silang alternatiba

- gregoriovbituinjr.

02.09.2022

Tagumpay ang proklamasyon ng Manggagawa Naman

TAGUMPAY ANG PROKLAMASYON NG MANGGAGAWA NAMAN

matagumpay ang naganap kagabing proklamasyon

ng Partido Lakas ng Masa, sadyang lingkod ngayon

Ka Leody de Guzman bilang pangulo ng nasyon

na sa mga suliranin ng bayan ay may tugon

mga kandidato ng P.L.M., pawang kaisa

ng taumbayan, ay nagpahayag ng plataporma

walang nagsayaw na artista ngunit nagsikanta'y

Kulay, Teatro Proletaryo't Pabrika, iba pa

nagsalita ang mabuting Propesor Walden Bello

ang pambatong senador na si Ka Luke Espiritu

ang makakalikasang kasamang Roy Cabonegro

at makakalikasan ding si David D'Angelo

mga nominado ng Partido Lakas ng Masa

Baldwin Sykimte, Lidy Nacpil, na mga kasama

Flor Santos, Manny Toribio, Jhuly Panday, pag-asa

ng bayan, para sa Kongreso'y ilagay talaga 

mabuhay kayong magigiting, ituloy ang laban

tunggalian na ng uri sa buong kampanyahan

mga kandidato ng burgesya'y huwag payagan

kundi ipanalo'y kandidato ng sambayanan

huwag hayaang ang trapo'y mabudol tayong muli

kundi baklasin na ang elitistang paghahari

di na dapat neoliberalismong siyang sanhi

ng dusa't kahirapan ng masa ay manatili

- gregoriovbituinjr.

02.09.2022

* litratong kuha ng makatang gala sa Bantayog ng mga Bayani, 02.08.2022

Bardagulan na!

BARDAGULAN NA!

ang sabi sa U.P. Diksiyonaryong Filipino

ang bardagol ay nangangahulugang dambuhala

na ibig sabihin, dambuhalang halalan ito

kaya "Bardagulan na" ang pamagat ng balita

salamat sa Abante sa kanilang pag-uulat

at ang litrato ng lider-manggagawa'y kasama

sa labanan sa panguluhan, ulat na matapat

upang kandidato ng manggagawa'y makilala

si Ka Leody de Guzman para pagkapangulo

nitong bansang ang mayorya ng masa'y naghihirap

dala niya ang paninindigan ng pagbabago

upang iahon ang masa sa buhay na masaklap

baligtarin ang tatsulok ang matinding mensahe

upang neoliberalismong dahilan ng dusa

ng mayoryang madla ay bakahin at maiwaksi

at lipunang patas at makatao'y malikha na

si Ka Leody de Guzman ang pambato ng dukha

si Ka Leody ang kasangga ng kababaihan

si Ka Leody ang kandidato ng manggagawa

ipanalo si Ka Leody! MANGGAGAWA NAMAN!

- gregoriovbituinjr.

02.09.2022

* bardagol (pang-uri) - dambuhala mula sa UP Diksiyonaryong Filipino, p. 143

* postcard, leaflet at sticker ni Ka Leody, at litrato mula sa frontpage ng Abante, 02.09.2022

Ambag ng dukha

AMBAG NG DUKHA

nagpinta na ng "Leody for President" ang dukha

bilang ambag nila sa kandidatong manggagawa

si Ka Leody, tumatakbong pangulo ng bansa

na pagbabago ng sistemang bulok ang adhika

tunay na lider ng manggagawa si Ka Leody

na karapat-dapat iboto bilang presidente

may paninindigang ramdam mo sa bawat debate

na taos sa puso ang bawat niyang sinasabi

kaya gumawa ng flaglet at ipininta roon

ang "Leody for President", anong ganda ng layon

si Ka Leody ay kapwa mahirap at may misyon:

ang pamunuan ng uring manggagawa ang nasyon

di man kagandahan yaong kanilang naipinta 

ay ginawang kusa, taospuso't buong suporta

mga dukha'y tunay palang ganyan magpahalaga

sa kanilang kandidatong presidente ng masa

- gregoriovbituinjr.

02.08.2022

Pagmumuni

PAGMUMUNI

simpleng tibak lang ngunit tahimik

ang kagaya kong di palaimik

datapwat lagi kong hinihibik

ang pagbabagong sa diwa'y siksik

habang patuloy na nagmumuni

na sa sistemang bulok ay saksi

ano nga ba ang makabubuti

para sa lalong nakararami

palasak ang pagsasamantala

at kaapihan ng dukhang masa

nais kong mabago ang sistema

na misyon ng bawat aktibista

bulok na sistema'y mapaglaho

lipunang makatao'y itayo

ibabagsak ang tuso't hunyango

sa pagbabago tayo patungo

- gregoriovbituinjr.

02.08.2022

No vaccine, no ride

NO VACCINE, NO RIDE

madali lang makasakay sa dyip

kaya nga, di ka na maiinip

iyon nga lang, doon ay masikip

na agad mo namang masisilip

gayunman sa dyip, walang manita

kung nakapagpabakuna ka na

at wala rin kasi roong gwardya

kung may vaccination card kang dala

aba'y wala pang social distancing

tila ang kita'y hinahabol din

na pag nag-lockdown, walang makain

kaya pasahero'y sisiksikin

"no vaccine, no ride" ang paskil doon

parang pakitang-tao lang iyon

vax card mo'y wala nang nagtatanong

kunwa'y bakunado lahat doon

ah, mabuti na rin ang ganito

walang abala sa pasahero

lalo na't papasok sa trabaho

ngunit pag nagkasakit, paano?

- gregoriovbituinjr.

02.08.2022

Upong seksi

UPONG SEKSI

"Upong seksi muna, maraming pasahero" sa dyip

sa paskil na ito'y talaga kang mapapaisip

upong seksi? nang magkasya lahat, kahit masikip?

"nahan ang social distancing?" ang agad kong nalirip

- gregoriovbituinjr.

02.07.2022

Ngiting kaytamis

NGITING KAYTAMIS

kaytamis ng ngiti sa litrato

roong pinaskil sa dyip na iyon

lulundag sa galak ang puso mo

dahil isa iyong inspirasyon

sa pagsakay ay di maiinip

dama man ng katawan ay pata

isang ngiti sa dyip na masikip

sa iyo'y may kalakip na tuwa

marahil siya'y isang artista

na pagkatamis ng ngiting handog

na salubong sa bagong umaga

upang mundong masaya'y mahubog

isang ngiti lang ang maialay

ng bawat isa sa araw-araw

ay nagbibigay-tamis sa buhay

na kahit dukha'y di mamamanglaw

- gregoriovbituinjr.

02.07.2022

Konting tulong sa mga drayber

KONTING TULONG SA MGA DRAYBER

gutom ang idinulot ng pandemya

sa mga drayber na namamasada

konting tulong ang hinihingi nila

lalo't bihira naman ang ayuda

upang sa araw-araw mairaos

yaong buhay nilang kalunos-lunos

sila'y di makapamasadang lubos

kaya sa pamilya'y walang pangtustos

konting barya lang sa tabo ilagay

anumang kaya ay ating ibigay

kabutihang loob na lang ang alay

sa tulad nilang di na mapalagay

tulungan natin silang di sumuko

sa konti mang pag-asa'y di mabigo

punuin natin ang kanilang tabo

ng mga barya o kahit na buo

- gregoriovbituinjr.

02.07.2022

* litratong kuha ng makatang gala sa Katipunan at Balara malapit sa UP gate

Ka Popoy Lagman

KA POPOY LAGMAN

estudyante pa ako nang una siyang makita

mula sa pagkapiit ay kalalaya lang niya

simpleng tibak lang ako, estudyanteng aktibista

hanggang napagkikita ko siya sa opisina

kaya pala, nag-above ground na pala siya niyon

habang ako'y istaf pa ng dyaryong pangkampus noon

magaling siyang magpaliwanag ng nilalayon

bakit sistemang bulok sa lupa'y dapat ibaon

magaling na lider na isang paa'y nasa hukay

iminulat ang manggagawa sa magandang pakay

na magkapitbisig, sosyalismo'y itayong tunay

inspirasyon sa manggagawa upang magtagumpay

lumabas din siya sa debate sa telebisyon

naipanalo ang Sanlakas noon sa eleksyon

sa mga manggagawa'y nagbigay ng edukasyon

isinulat ang pagsusuri tungong rebolusyon

nagsulat siya sa Tambuli hinggil sa Paggawa

iyon ang magasin ng Bukluran ng Manggagawa

sa Tambuli, ako'y nagsulat ng akda't balita

natigil iyon at dyaryong Obrero'y nalathala

karangalan nang makasama siya sa magasin

isang bayani ng paggawa kung siya'y ituring

mabuhay ka, Ka Popoy Lagman, lider na magiting

salamat sa iyo sa mga aral mo sa amin

- gregoriovbituinjr.

02.06.2022

* Ka Popoy Lagman, Working Class Hero

(Marso 17, 1953 - Pebrero 6, 2001)

Pagtitig sa kawalan

PAGTITIG SA KAWALAN

di madalumat ang kung anu-anong naglipana

kung bubukaka, kung bubuka ba, kung bobo ka ba

kung kakain bago aspaltaduhin ang kalsada

kung sa kawalan ng trabaho'y may magagawa pa

sa pagbabasa'y nakakapunta sa ibang dako

kung may suliranin ay nakakabatid ng payo

habang binabasa ang aklat na nagpapadugo

ng utak habang magandang diwata'y sinusuyo

subalit napapatitig na lamang sa kawalan

pag mayroong pumulupot na sapot sa isipan

nagbabara ang mga kataga sa lalaugan

lalo't tamis o anghang ng salita'y di matikman

nakatitig man sa kawalan, alam ang gagawin

animo'y tulog subalit nangangarap ng gising

nasa panaginip ang hinalukay na abuhin

nasa guniguni ang pagsuyong nais abutin

- gregoriovbituinjr.

02.06.2022

* lalaugan - wikang Filipino sa Adam's apple

Paglalakbay

PAGLALAKBAY

nakapaglalakbay ako sa iba't ibang bansa

dahil na rin sa pagbabasa ng maraming akda

nabatid ang kasaysayan at samutsaring paksa

iba't ibang pilosopiya pa'y inuunawa

bagamat ilang bansa'y aktwal na narating naman

tulad ng Japan tatlong dekada nang nakaraan

bilang iskolar ng electronics, anim na buwan

dalawampung taon matapos iyon ay sa Thailand

tatlong taon matapos, sa Thailand ay bumalik pa

nakapasok din naman sa loob ng bansang Burma

dahil naman sa Climate Walk ay narating ang Pransya

at dalawang beses lumapag sa airport ng Tsina

sana'y mabigyang pagkakataong muling maglakbay

upang di na lang sa pagbabasa ang pagninilay

taospusong pasalamat sa noon ay nagbigay

o nag-isponsor upang makapaglakbay na tunay

- gregoriovbituinjr.

02.06.2022

Pangarap

PANGARAP

diyata't muling nagkodakan

ang bagong magkakaibigan

di man sila nagtatawanan

subalit masasaya naman

tila usapan ay seryoso

nilang pawang magkakatoto

ano ba ang kanilang gusto

kundi pangarap ay matamo

ang pangarap lang nila'y simple

sa kapwa'y gawin ang mabuti

kung sakaling makadiskarte

ay hating kapatid sa karne

at pangarap ring naninilay

manahan sa mundong may saysay

isang lipunang matiwasay

at pagsasamahang matibay

- gregoriovbituinjr.

02.05.2022

* nag-selfie ang makatang gala sa isang painting sa Cubao

Naiibang paso

NAIIBANG PASO

balutan ng sauce ng ispagheti'y nagamit naman

nilagyan ng lupa, binhi'y binaon, pinagtamnan

ang munggong aking itinanim ay nagsilaguan

nagamit din ang plastik, ngunit di sa basurahan

minsan, dapat ding mag-inisyatiba ng ganito

lalo't nagkalat ang plastik na binasura ninyo

lalo't naglipana na ang microplastic sa mundo

lalo't naglutangan ang upos sa dagat, ay naku!

dahil nasa sementadong lungsod ako naroon

ang mga plastik na bote't lalagyan ay tinipon

bumili ng lupa't inilagay sa plastik iyon

binhi'y binaon, diniligan, lumago paglaon

wala mang lupa sa lungsod, nais naming magtanim

upang makapagpalago ng aming makakain

ito'y isang pamamaraan din ng urban farming

natutunan nang pandemya'y nanalasa sa atin

- gregoriovbituinjr.

02.05.2022

* itinanim ng makatang gala sa opisina ng mga manggagawa sa Lungsod ng Pasig

Sabi ng lola

SABI NG LOLA

sabi ng lola, pangalagaan ang kalikasan

dahil binibigay nito'y buhay sa santinakpan

tulad ng paglitaw ng ulan, ng araw at buwan

tulad ng hamog at ng simoy ng hanging amihan

sabi ng lola, sa paligid ay huwag pabaya

malaking bagay ang punong pananggalang sa baha

kaya kung puputulin ito'y daranas ng sigwa

tara, magtanim ng puno nang tayo'y may mapala

sabi pa ng lola, pabago-bago na ang klima

adaptasyon, mitigasyon, unawain, gawin na

paghandaan ang bagyong matindi kung manalasa

tulungan ang kapwa tao lalo na't nasalanta

sabi ng lola, huwag iwang basura'y nagkalat

nabubulok, di nabubulok, pagbukluring sukat

ang plastik at upos nga'y nagpapadumi sa dagat

ang ganitong pangyayari'y kanino isusumbat

sabi pa ng lola, tagapangalaga ang tao

ng kalikasan, ng nag-iisang tahanang mundo

huwag nating hayaang magisnan ng mga apo

ang pangit na daigdig dahil nagpabaya tayo

- gregoriovbituinjr.

02.05.2022

#123 Partido Lakas ng Masa (PLM) partylist

#123 Partido Lakas ng Masa (PLM) partylist

numero Uno-Dos-Tres ay ating pakatandaan

para sa Partido Lakas ng Masa, atin iyan

ang P.L.M. partylist natin ay ihalal naman

nang may kasangga tayo sa Kongreso o Batasan

dala ng ating partylist ay mabuting layunin

para sa maliliit, sa dukha't kauri natin

iyang salot na kontraktwalisasyon ay tanggalin

mapanirang batas sa kalikasan ay alisin

sa halalan, ang Partido Lakas ng Masa'y lumahok

upang labanan at palitan ang sistemang bulok

ng Lipunang Makatao, upang masa'y di lugmok

upang manggagawa naman ang ilagay sa tuktok

tunay na partidong makatao at may prinsipyo

una ang tao, di tubo; una'y kapakanan mo

bilang dukhang dapat kasama sa lipunang ito

sa ngayon, kailangan ang totoong pagbabago

P.L.M. partylist, panlaban sa trapong hunyango

tandaan ang Uno-Dos-Tres, pinatakbo't uupo

tunay na lingkod ng masa, tapat sa pamumuno

P.L.M. partylist, sa sistemang bulok susugpo

- gregoriovbituinjr.

02.04.2022

Sa ika-123 anibersaryo ng Fil-Am War

SA IKA-123 ANIBERSARYO NG FIL-AM WAR

petsa Pebrero a-Kwatro ngayon, anibersaryo

ng madugong gerang Pilipino-Amerikano

pagpatuloy ng pakikibakang Katipunero

upang lumaya ang bayan mula sa tuso't dayo

nangyari matapos isuko ng mga Kastila

sa mga Amerikano ang pagsakop sa bansa

binaril ng isang sundalong Kano sa Maynila

ang isang kawal-Pinoy kaya digma'y nagsimula

digmaang tinuloy ng bayaning Macario Sakay

at ibang bayaning nais ay kalayaang tunay

dalawang daang libong Pinoy daw ang nangamatay

gawa ng mga Kano'y war crimes, nang-tortyur, nambitay

mayroon umanong peace protocol na nilagdaan

nang matigil ang digmaan at may kapayapaan

subalit Pilipino'y patuloy sa sagupaan

dahil pangarap kamtin ang tunay na kalayaan

sa anibersaryong ito, ating alalahanin

mga bayaning nangarap malayang bansa'y kamtin

talagang nakibaka ang mga ninuno natin

na nagbuwis ng buhay upang bansa'y palayain

- gregoriovbituinjr.

02.04.2022

Pinaghalawan ng datos:

litrato mula sa google

https://en.wikipedia.org/wiki/Philippine%E2%80%93American_War

https://www.filipinoamericanwar18991902.com/filamwarbreaksout.htm

https://ncca.gov.ph/about-ncca-3/subcommissions/subcommission-on-cultural-heritagesch/historical-research/the-philippine-american-war-1899-1902/

Ang paskil

ANG PASKIL

aba'y "pangma-manyak sa pampublikong transportasyon"

ayon sa nakita kong paskil sa M.R.T. doon

malaswang titig, salitang sekswal ang konotasyon

at dinagdag pang sa Safe Spaces Act, bawal iyon

sa usapan sa paskil ay mababasa ang siste

datapwat bawal mag-usap sa loob ng M.R.T.

"Tol, tagal mong tumitig sa boobs at legs ng babae"

na sinagot, "Pre, ang ganda kasi ng view dito, eh."

sa pader ng napuntahang M.R.T. nakakalat

ang mga ganyang paskil na talagang mapangmulat

na sa atin ngang kamalayan ay sumasambulat

"igalang ang kababaihan," ang sabing marapat

batas na "Safe Spaces Act" ay ating saliksikin

bakit may batas na ito'y namnamin at basahin

di dahil makukulong kundi esensya'y alamin

na tayo'y may nanay at kapatid na babae rin

- gregoriovbituinjr.

02.04.2022

* litratong kuha ng makatang gala habang naglalakbay mula bahay patungong opisina

Kabayo muna bago kalesa

KABAYO MUNA BAGO KALESA

huwag paunahin ang kalesa

pagkat dapat kabayo ang una

kausapin mo muna ang masa

bago ka magbuo ng alyansa

ito nama'y akin lang narinig

sa usapan ng magkapitbisig

nang sa gawain, di matigatig

hakbang baytang-baytang ang ulinig

kaya huwag laging tira-pasok

palaging magsuri nang maarok

ang pagpalit sa sistemang bulok

kung dukha'y ilalagay sa tuktok

ang kalesa'y hila ng kabayo

pagkat iyan ang takbo sa mundo

kabayo'y di rin tulad ng awto

na makaaatras pag gusto mo

ah, kailan ka ba nakakita

na kabayo'y sunod sa kalesa

unawain ang diyalektika

at gamiting wasto sa taktika

- gregoriovbituinjr.

02.03.2022

* litrato mula sa google

Tubero

TUBERO

manginginom nga ba ng tuba ang mga tubero

tulad ng nambababae, tawag ay babaero

ah, tubero'y dalubhasa sa pagkabit ng tubo

ng tubig o nagkukumpuni pag may tagas ito

paskil sa poste ng kuryente'y makikita riyan

paano kumontak ng tubero pag kailangan

at di na lang sa classified ads na binabayaran

kung saan pinaskil, malapit lang ang mga iyan

dagdag pa sa paskil ng dalubhasa't may diskarte

pag kailangan mo ng electrician o carpentry,

tiles setter o renovation, tingnan mo lang sa poste

kung repair of leak pipes, malapit lang sila sa tabi

malaking tulong na ang tulad nilang dalubhasa

na trabaho'y di pormal ngunit sadyang matiyaga

na dumidiskarteng tunay lalo na't walang-wala

na kung di kikilos, gutom tiyak ang mapapala

ang pagpapaskil sa poste'y pamamaraan nila

baka may magpagawa't mapakain ang pamilya

saludo sa mga tuberong wala sa pabrika

na sa pag-aayos ng tubo'y doon kumikita

- gregoriovbituinjr.

02.03.2022

Ligaw na halaman

LIGAW NA HALAMAN

tumutubo rin kahit saan

ang mga ligaw na halaman

di lang sa mga kagubatan

kahit sa sementadong daan

nasa kanal pa nga ang isa

sa nadaanan kong kalsada

minasdan ko't kinodakan pa

talagang nakahahalina

siya man ay halamang ligaw

nabuhay siya't di pumanaw

binhi'y lumalago't may araw

alay ay magandang pananaw

sa atin, ibig ipabatid

na talagang di nalilingid

na siya'y nabuhay, kapatid

at sa dilim ay di nabulid

kaya ngayon ay naninilay

sa mundong may mabuting pakay

sementadong lungsod mang tunay

solo man ay kayang mabuhay

- gregoriovbituinjr.

02.03.2022

Tampuhan

TAMPUHAN

para ba silang aso't pusa pag nagkatampuhan?

datapwat nagkakabalikan pag nag-unawaan

mga bagay ay nakukuha sa paliwanagan

upang muli namang tumamis ang pag-iibigan

bigla na lang ba siyang mananahimik sa tabi

masama na ang loob at di na napapakali

magsasawalang-kibo lang nang walang sinasabi

di na mag-uusisa sa nakita't nangyayari

huwag takbuhan ang problema o pagkasiphayo

harapin ang anumang pagdududa't panibugho

mag-usap ng masinsinan hanggang tampo'y maglaho

anumang problema'y lutasin ng buong pagsuyo

anong hirap magkatampuhan sa maling akala

o kaya pinapakita'y pawang tamang hinala

ipaliwanag natin kung anong ating nagawa

upang alitan o tampuhan ay di na lumala

- gregoriovbituinjr.

02.02.2022

Basura

BASURA

nasaan ang trak ng basura, ang matatanong mo

pag sa mayor na lansangan, basura'y bulto-bulto

ano bang oras daraan upang hakutin ito

wala lang, nadaanan lang, nagtatanong lang ako

sadya ngang masakit na tunay sa mata ng madla

ang mga basurang nakatambak, saan man mula

buti't di nangangamoy at balot na balot pa nga

habang nangangalkal ng basura'y naroong sadya

naghahanap ng maibebenta nang may makain

bote, lata, anumang pag binenta'y salapi rin

sa hirap ng buhay, gutom ba'y kaya pang tiisin

pag pagpag natsambahan ay agad bang kakainin

kung sakaling dumating na yaong trak ng basura

sa takdang oras, aba'y malinis na ang bangketa

iyon ba'y sapat na't makadarama na ng saya

sana'y palaging gayon, walang kalat sa kalsada

sa basurang plastik ang daigdig na'y nalulunod

mga batas sa kalikasan pa ba'y nasusunod

isipin ang basura't mundo, kayod man ng kayod

pagkat malinis na paligid ay nakalulugod

- gregoriovbituinjr.

02.02.2022

02.02.2022

02.02.2022

numero dos, kapara rin ng kahoy na dos por dos

na kaakibat na rin ng pagkatao kong lubos

lalo't ako'y pinanganak sa petsang Oktubre dos

at naniniwalang sa masa'y maglingkod ng taos

petsa ngayon ay may limang dos, maswerte raw ito

nang umalis si misis ay bumalik ngayon dito

sa naipong tula'y makakagawa na ng libro

pupunta muling health center nang gamot makuha ko

Pebrero Dos, dos mil bente dos na ang petsa ngayon

kaya agad akong gumising, maagang bumangon

upang salubungin ang araw ng buong hinahon

upang kumatha ng tula't gawin ang nilalayon

at si misis ay dumating na mulang lalawigan

kaya iwi kong puso'y napuno ng kagalakan

habang patuloy ako sa paglilingkod sa bayan

ah, kaysarap maging tibak sa bayang tinubuan

pagkagising ko, si misis ay agad kong binati

habang patuloy na nagninilay at nagsusuri

ngayon ang panahong masarap magtanim ng binhi

at bagong umaga'y harapin nang may buong ngiti

- gregoriovbituinjr.

Wala nang libreng sakay

WALA NANG LIBRENG SAKAY

ang libreng sakay sa bus carousel ay natapos na

mabuti't patakarang iyon ay naabutan pa

noon ngang Nobyembre't Disyembre'y nalibreng talaga

nang matapos iyon, sa pasahe'y magbabayad ka

walang problemang magbayad at may ibibigay

na salaping laan doon ang mga mananakay

gayunman ay malaking tulong na ang libreng sakay

upang sa pandemya'y maibsan ang problemang tunay

nagluwag na nga ba kaya libreng sakay na'y wala

at nagsipasok na sa trabaho ang manggagawa

hanggang "no vaccination, no ride" ang umiral na nga

kung wala nito'y di makasakay, nakatunganga

noong Enero'y dumukot na ng pamasahe

na bahagi na ng pang-araw-araw na diskarte

na bagamat sa bus carousel ay wala nang libre

ay patuloy ang buhay, naroon man o narine

datapwat mahalaga, pamasahe'y di mabigat

upang may nakalaan sa pagkain, di man sapat

habang dito'y nagninilay, sa diwa'y di mapuknat

sa libreng sakay noon, paabot ko'y pasalamat

- gregoriovbituinjr.

02.01.2022

* litratong kuha ng makatang gala habang nakasakay sa bus carousel

Paghihintay

PAGHIHINTAY

umuwi muna si misis sa kanilang probinsya

lumiban sa pinagtatrabahuhang opisina

upang gawin doon ang ilang gawang mahalaga

asikasuhin ang papeles na dapat makuha

noong Biyernes pa umalis at ngayon na'y Martes

at nami-miss ko na agad ang presensya ni misis

bagamat may trabaho rin ako rito'y magtiis

ah, paghagod niya sa aking puso'y nakaka-miss

sa kapatid at pamangkin siya muna'y dumalaw

paparating na siya bukas ng madaling araw

iyan ang sabi niya, huwag lang akong bibitaw

sa aming sumpaang di matinag at di magalaw

habang patuloy sa pagkatha ng tula't sanaysay

na pawang mga tungkulin ko habang naghihintay

- gregoriovbituinjr.

02.01.2022

No vaccination card, no ride

NO VACCINATION, NO RIDE

kung di ka raw bakunado'y di ka makasasakay

tulad sa paskil sa dyip kahit naghahanapbuhay

kayhirap namang sapilitan ang bakunang bigay

ngunit walang magawa kundi sumunod kang tunay

noong ako'y mag-first dose, ilang araw lang ay nanghina

malakas kong katawan ay nagka-COVID na bigla

apat na buwan matapos, second dose ay ginawa

upang matapos na't kumpleto ang bakunang sadya

upang di raw magkahawaan, ito'y sapilitan

kayrami mong karapatang sadyang naapektuhan

di ka makalabas kaya aking napagpasyahan

sumakay sa dyip at sumakay sa pamahalaan

kaya vaccination card ang pases kong makalabas

ng bahay at makapunta sa kung saan may atas

ang pinagtatrabahuhan kong may layuning patas

sa people's org. na hangarin ay lipunang parehas

ipakita ang vaccination card tulad ng I.D.

sa pagsakay sa dyip, sa bus carousel, sa L.R.T.

sa pagpasok sa mall, botika, grocery, palengke

kung wala nito'y paano ka kaya didiskarte

upang di dumanas ng gutom ang iyong pamilya

kung wala nito'y di makakapasok sa pabrika

apektado ang hanapbuhay, paano kumita

vaccination card sa panahong ito'y mahalaga

- gregoriovbituinjr.

02.01.2022

* litratong kuha ng makatang gala sa loob ng sinakyan niyang dyip