Paglilinis ng bentilador

PAGLILINIS NG BENTILADOR

bentilador ay isang de-kuryenteng pampahangin

umiikot dahil sa elise o banoglawin

na sa katagalan na rin, nagiging marumihin

na kung di malinisan ay manggigitata ka rin

napakarami nang mga agiw sa bentilador

na nakapatong lamang sa ibabaw ng tokador

kaya akin nang nilinisan, pwera lang ang motor

unang tinanggal ang takip na animo'y andador

ang buong bentilador nga'y maingat kong binaklas

pinunasan ang katawan, ang elise'y kinalas

sinabunan, binanlawan, tubig ang pinanghugas

tinanggal ang agiw, basahang retaso'y pampunas

maiging linisin ng lingguhan, di kada buwan

ang dekuryenteng abanikong ang dulot ay alwan

tandaang elise't katawan lamang ang hugasan

di ang makina o motor, baka masira iyan

sa maruming bentilador, manlalagkit kang labis

lalo na't mabanas ang panahon, nakaiinis

abala sa gawain, tulo ng tulo ang pawis

ah, ginhawa'y dulot ng bentilador na malinis 

- gregoriovbituinjr.

Chili sauce at bagoong lang, ulam na

CHILI SAUCE AT BAGOONG LANG, ULAM NA

marami ang dumidiskarte upang di magutom

tulad ko, pinaghalo ang chili sauce at bagoong

di makalabas, di makabili kahit panggatong

na-lockdown man, nakakatula pa't di nabuburyong

anong tinding salot ang sa bansa'y naninibasib

di maapuhap ang liwanag sa malayong liblib

subalit maghanda pa rin sa anumang panganib

sa panahong itong dapat patibayin ang dibdib

para raw noong panahon ng Hapon, ng Kempei-tai

buti't may mga tanim, mamimitas lang ng gulay

kaysa mamatay sa gutom ay piliting mabuhay

lakasan ang loob, kumilos, tumula, magnilay

upang kasalukuyang sitwasyon ay maikwento

maitula, maisulat, ang sitwasyon ng mundo

manood din ng balita, makinig din ng radyo

bagamat di malaman paano maging kalmado

kahit chili sauce at bagoong lang, basta mabusog

habang mga balita sa puso'y nakadudurog

ano nang klaseng bukas ang ating maihahandog

tila pangarap na lang ang daigdig na malusog

- gregoriovbituinjr.

Mag-stay at home kung di magugutom ang pamilya

MAG-STAY AT HOME KUNG DI MAGUGUTOM ANG PAMILYA

mag-stay at home muna ang kanilang paalala

maririnig mong sa telebisyon pa'y kinakanta

mag-stay at home muna ang kanilang propaganda

akala mo'y kaydaling sundin ng dukhang pamilya

mag-stay at home ay payo sa maykaya sa buhay

at hindi sa mga dukhang lagi nang nagsisikhay

kung di kakayod, pamilya'y magugutom na tunay

mag-stay at home ay para lang sa may perang taglay

mag-stay at home muna kung may pagkain sa mesa

at kung di nagsasamantala ang kapitalista

na bantang tanggalin ang manggagawa sa pabrika

o kaya'y gawing kontraktwal ang trabahador nila

mag-stay at home dahil sa lockdown o kwarantina

mag-stay at home muna kung may sapat na ayuda

paano kung wala, aba'y kawawa ang pamilya

kaya dapat tugunan ang problema sa pandemya

sa mga magsasaka, halina't magpasalamat

nang dahil sa kanila'y may mga pagkaing sapat

tatlong beses bawat araw ay naririyang sukat

pag-asa ng masa, tunay na bayani ng lahat

ngayon, dama nating pandaigdigan ang problema

may mga kapalpakan man ay malutas din sana

mga gobyerno nawa'y magtulong para sa masa

walang maiiwan, sana lahat ay may ayuda

- gregoriovbituinjr.

Ilang babasahing pangkalikasan

ILANG BABASAHING PANGKALIKASAN

inipon ko ang ibinigay nilang babasahin

tungkol sa kalikasang dapat alagaan natin

sa mga tulad ko'y inspirasyon ito't aralin

kaya nais kong mag-ambag ng ganitong sulatin

bukod sa pagbabasa nitong mga nakasulat

ay isabuhay din natin ang anumang naungkat

at kung sang-ayon kayo sa nabasa't naurirat

halina't kumilos upang iba din ay mamulat

aralin anong dahilan ng nagbabagong klima

sa mga samahang pangkalikasa'y makiisa

kusang sumapi, kusang tumulong, kusang sumama

at itaguyod ang isang daigdig na maganda

pangarap na isang daigdig na walang polusyon

plantang coal at pagmimina'y isara na paglaon

bakit plastik at upos ay sa dagat tinatapon

bakit sa waste-to-energy ay di tayo sang-ayon

basahin ang Clean Air Act, ang Solid Waste Management Act, 

Toxic Substance, Hazardous and Nuclear Waste Control Act,

Anti-Littering, Pollution Control Law, Clear Water Act, 

bakit dapat nang tuluyang palitan ang Mining Act

inipon ko ang ibinigay nilang babasahin

tungkol sa kalikasang dapat alagaan natin

halina't ganitong sulatin ay ating namnamin

pagkat pawang may makabuluhang aral sa atin

- gregoriovbituinjr.

Tunggalian sa piketlayn

TUNGGALIAN SA PIKETLAYN

nakita ko lamang ang larawang iyon sa opis

anong ganda ng pagkakaguhit, napakakinis

tinanggalan ko ng alikabok hanggang luminis

larawan ng pag-alpas sa hirap at pagtitiis

may pamagat sa ilalim pag iyong tinitigan

nakasulat ng bolpen, "Tunggalian sa Piketlayn"

oo, pagkat iyon mismo ang inilalarawan

mga manggagawang kapitbisig na lumalaban

"Doloricon 87" nasusulat din doon

ibig sabihin, ipininta ni Neil Doloricon

aba'y higit nang tatlong dekada na pala iyon

na tunay na inspirasyon sa magpipinta ngayon

na tulad ko'y inspirasyon din ito sa pagkatha

na sama-samang nakikibaka ang manggagawa

na paabot sa atin ay mapagpalayang diwa

salamat sa larawan, sa laban ay maging handa

- gregoriovbituinjr.

Almusal ko'y pagkatha

ALMUSAL KO'Y PAGKATHA

pagkagising pa lang ay haharap na sa kwaderno

upang isulat agad ang anumang nasa ulo

upang di agad malimutan ang paksa sa kwento

kakathaing tula, sanaysay, mga kuro-kuro

bago mag-agahan, iyon na ang aking almusal

para bagang ang tula'y kape o kaya'y pandesal

habang natutulog, kung saan-saan namamasyal

ang diwa kaya pagkagising ay hihingal-hingal

kayrami kasing pinuntahan, mga nakausap

at nakikipagtalakayan habang nangangarap

madaling araw pa'y magigising, aandap-andap

ang ilawan, pupungas-pungas, mabuting maagap

kaya kwaderno'y ilalabas, magsusulat muli

ng mga danas at tahak, nagbabakasakali

malinaw pa sa diwa ang pakikipagtunggali

at ibaon sa kumunoy ang mga naghahari

- gregoriovbituinjr.

Patuloy ang paggawa ng ekobrik at yosibrik

PATULOY ANG PAGGAWA NG EKOBRIK AT YOSIBRIK

sa kabila ng lockdown ay patuloy ang paggawa

ng ekobrik at yosibrik kahit na walang-wala

makatulong sa kalikasan nga'y aking adhika

ito'y isa nang layuning nasa puso ko't diwa

nalulunod na sa upos ang ating karagatan

ikatlo sa pinakamarami'y upos na iyan

tambak na ang basurang tao ang may kagagawan

daigdig nating tahanan ay naging basurahan

kaya nagpasya akong huwag magpatumpik-tumpik

maggupit-gupit ng mga plastik at isisiksik

sa boteng plastik upang makagawa ng ekobrik

mga upos ng yosi naman para sa yosibrik

mga gawang sa kalikasan nakakatulong 

lalo na't nasa lockdown, panahong nakakaburyong

kung sakaling sa kolehiyo man ay nakatuntong

anong magagawa mo sa kalikasan, ang tanong

paano lulutasin ang basurang pulos upos

kabaliwan nga ba ang pageekobrik kong lubos

pagmasdan mo ang dalampasigan, kalunos-lunos

basura na'y naglulutangan, isda'y kinakapos 

mga ginagawang ito'y pagbabakasakali

na may magagawa pa upang basura'y mapawi

pagtataguyod din ng pagbabago ng ugali

upang ganda ng kalikasan ay mapanatili

- gregoriovbituinjr.

Pagtipa sa tiklado

PAGTIPA SA TIKLADO

naranasan ko noong tumipa sa makinilya

upang sa guro'y maipasa ang asignatura

nagtitipa pa rin kahit wala na sa eskwela

upang akdang nasa isip ay maitipa ko na

oo, naabutan ko pang magmakinilya noon, 

at gamit ko na sa pagtipa ay kompyuter ngayon

instrumento'y umuunlad paglipas ng panahon

mas nagiging kumplikado kaya aralin iyon

noon, upang dumami ang kopya ng dokumento

gagamit ng carbon paper at salitan pa ito

ngayon, may printer na't i-print kung ilan ang gusto mo

o kaya'y ipa-xerox mo na lang ang mga ito

kaysarap magtipa sa makinilya, anong sarap

dinig mo ang tak-tak-tak, sung, animo'y nasa ulap

sinulat ko sa papel ay tinipa ko nang ganap

lalo't mga tula ng kabataan ko't pangarap

hanggang ngayon, patuloy pa rin akong nagtitipa

ng aking mga karanasan, pagsusuri't haka,

ng misyon, pakikibaka't mapagpalayang diwa

habang buhay pa'y titipain bawat likhang akda

- gregoriovbituinjr.

Magtipid sa tubig

MAGTIPID SA TUBIG

magtipid sa tubig, ang bilin sa akin ng guro

ngunit di ibig sabihin, huwag ka nang maligo

kundi imbes na shower, ang gamitin mo ay tabo

magtipid sa tubig, di tipirin, ito ang payo

at kung magsesepilyo naman, gumamit ng baso

ngunit huwag hayaang tulo ng tulo ang gripo

tanggalin mo muna ang tirang pagkain sa plato

baka kasi ito pa'y makabara sa lababo

pambuhos sa inidoro'y imbak na tubig ulan

planuhin ang gagawin, maglaba lang ng minsanan

huwag isa-isa ang paghugas sa kinainan

tipunin muna't isa lang ang maghuhugas niyan

pag tag-ulan na, dapat may dram o timbang panahod

na sasalo ng tubig-ulan galing sa alulod

pambuhos sa kasilyas, tubig itong nakabukod

pandilig din sa halaman at gulay sa bakod

ituro rin sa mga batang magtipid sa tubig

na mahal ang presyo nito, sa dibdib ay ligalig

paggamit ay planuhing maigi, magkapitbisig

ang mag-aaksaya nito'y dapat lamang mausig

- gregoriovbituinjr.

Kwadernong pangkalikasan 4

KWADERNONG PANGKALIKASAN 4

tubig ay huwag aksayahin

ang luntiang gubat ay damhin

lunting syudad ay pangarapin

mithing lunti sa mundo natin

salamat sa kwadernong lunti

sa panawagan nito't mithi

kalikasa'y mapanatili

na isang pagbakasakali

na marinig ng mamamayan

ang ating Inang Kalikasan

na puno ng dusa't sugatan

at dapat nating malunasan

tambak na ang basurang plastik

kaya ako'y nageekobrik

dagdag pa ang pagyoyosibrik

na tungkuling nakasasabik

ayusin ang basurang kalat

linisin sa layak ang dagat

nagkakalát sana'y malambat

habang di pa huli ang lahat

walang aayos ng ganito

kundi tayo ring mga tao

dapat nang ayusin ang mundo

at sistema'y dapat mabago

- gregoriovbituinjr.

Kwadernong pangkalikasan 3

KWADERNONG PANGKALIKASAN 3

magaling ang lumikha ng mga kwadernong iyon

mulat sila sa problema ng kalikasan ngayon

anong nangyari nang manalasa ang baha noon

anong epekto sa bayan, saan na paroroon

tatak-pangkalikasan sa kwaderno'y mapagmulat

ekolohiya'y suriin, kumilos tayong lahat

kalikasa'y alagaan, tayo'y hinihikayat

baguhin ang sistema sa mundo ang kanyang banat

tatak-pangkalikasan sa kwaderno'y mapang-usig

humihiyaw ang kalikasan, di natin marinig

kapitalismo'y mapanira, dulot ay ligalig

pagmimina, pagtrotroso, limpak na tubo'y kabig

dinggin ang tinig ng kalikasan, ang kanyang hiyaw

islogan sa kwaderno'y tila sa dibdib balaraw

mga nakasulat doon ay pawang alingawngaw

ng Inang Kalikasang ngayon ay pumapalahaw

maraming salamat, may mga ganitong kwaderno

na nagpapaalala sa mag-aaral, sa tao

na alagaan ang kalikasan, ang buong mundo

panawagang ito'y isabuhay nating totoo

- gregoriovbituinjr.

Kwadernong pangkalikasan 2

KWADERNONG PANGKALIKASAN 2

kalikasan ay alagaan natin

ito'y isang mahalagang tungkulin

na kung sa mundong ito'y dadanasin

ang kalamidad ay mabawasan din

tatak-pangkalikasan sa kwaderno

ay tagapagpaalala sa tao

na huwag magpapabaya sa mundo

kung di man, maging handa sa delubyo

kayrami nang nakaranas ng Ondoy,

ng Yolanda, na unos ang nagtaboy

sa atin sa tahanan, ay, kaluoy

dati'y may bahay ay naging palaboy

nagbabago't nagbabaga ang klima

sa pagharap dito'y handa ka na ba?

polusyon sa kalusugan ng masa

tubig na kaymahal, naaaksaya

paalala sa kwaderno'y kaygaling

na sa masa'y talagang nanggigising

islogan sa kwaderno'y ating dinggin

kalikasan ay alagaan natin

- gregoriovbituinjr.

Kwadernong pangkalikasan 1

KWADERNONG PANGKALIKASAN 1

mga kwadernong iyon ay binili ko kaagad 

sapagkat kalikasan yaong sa akin bumungad

bumunot sa bulsa, sana'y di kulang ang pambayad

pinili ko'y mga pangkalikasang sadyang hangad

bumili muna ng lima dahil kulang ang pera

sana'y di agad maubos, sana'y makabili pa

bukas pa mababalikan ang kwadernong kayganda

kinabukasan nga bumalik, binili'y anim pa

ang balak ko rito'y pangregalo sa inaanak

upang habang maaga'y mamulat sa tinatahak

alagaan ang kalikasan, bundok, ilog, lambak

upang malunasan ang sugat nitong nagnanaknak

oo, dahil sa tao, may sugat ang kalikasan

dahil paligid natin ay ating dinudumihan

dahil daigdig natin ay ginawang basurahan

dahil plastik ay naglipana na kung saan-saan

mga kwaderno'y nagtataguyod at nagmumulat

upang kalikasan ay alagaan nating sukat

upang di malunod sa mga basura sa dagat

sa lumikha ng kwaderno'y marami pong salamat

- gregoriovbituinjr.

Pusang itim

PUSANG ITIM

anong kasalanan ng pusa kung siya'y maitim

anong kasalanan ng Negro kung sila'y maitim

takot sa pusang itim, dahil ba sa pamahiin

pag may nakitang pusang itim, disgrasya'y darating

pamahiin ay walang siyentipikong batayan

walang patunay sa agham ang paniwalang iyan

panakot lang daw ng matatanda sa kabataan

upang umuwi agad ng maaga sa tahanan

may akdang "The Black Cat" ang makatang Edgar Allan Poe

bantog na awtor ng mga kwentong horror sa mundo

pusang itim nga ba'y nakakatakot na totoo

o sapagkat natakot ang madla sa kwento ni Poe

pag sa paglalakad mo, pusang itim ay nakita

huwag ka na raw tumuloy, baka ka madisgrasya

at baka sa anumang gagawin mo'y malasin ka

tawag sa pagkatakot na ito'y mavrogatphobia

subalit ano bang kasalanan ng pusang itim

upang ituring siyang tagapagdala ng lagim

wala, kundi ipinanganak lang siyang maitim

ang masama'y ang maniwala pa sa pamahiin

- gregoriovbituinjr.

* litratong kuha ng makatang gala habang naglalakad kung saan-saan

Baliwag na diwa

BALIWAG NA DIWA

bihira lang may mag-like sa tula kong isinulat

di mag-like dahil marahil tulang may tugma't sukat

bagamat baliwag na diwa'y inakdang maingat

bagamat talinghaga'y sisisirin pa sa dagat

kayâ kung nag-like ka, taos-pusong pasasalamat

baliwag na diwa, talinghagang di pa unawa

na kinapapalooban ng layon ko't adhika

sa katutubong panitikan ay namamanata

na itataguyod ang akda sa sariling wika

nawa ito'y mamunga ng nagniningas na diwa

minsan sa pag-iisa ko'y naroong naninindim

hinahatak ang talinghaga sa balong malalim

upang ikwento ang tokhang na karima-rimarim

pagkat maraming tinimbuwang sa gabi ng lagim

agam-agam ang panlipunang hustisya sa dilim

naroroon kaya ang pag-ibig sa mga ulap

habang nananaghoy ang mga pusong naghihirap

ang hustisya kaya'y makakamtan sa hinaharap

karapatang pantao ba'y rerespetuhing ganap

maaabutan pa kaya ang lipunang pangarap

kayraming baliwag na diwang dapat isaisip

nabubuo ang haka sa kutob na di malirip

kinabukasan ng bansa'y paano masasagip

laban sa mapagsamantala, mapang-api't sipsip

kalagayan ay totoo, di isang panaginip

- gregoriovbituinjr.

Tula sa Araw ng Kagitingan

TULA SA ARAW NG KAGITINGAN

halina't alalahanin yaong kabayanihan

ng mga kababayang lumaban para sa bayan

ikasiyam ng Abril nang bumagsak ang Bataan

sa kamay ng Hapon, ng mananakop na dayuhan

Ikalawang Daigdigang Digmaan nang mangyari

ang sagupaang iyong ang namatay ay kayrami

napasuko ang Pilipino sa gerang kaytindi

sumuko naman ang mga Kanong di mapakali

ang Bataan at Corregidor sa lupa'y nabaon

iyon ang natitirang tanggulan laban sa Hapon

ang Timog-Silangang Asya noong panahong iyon

ay halos nasakop na raw ng bansang Japan noon

prisoner of war ang halos walumpung libong kawal 

ayon pa sa kasaysayan, na atin ding inaral

Death March mula Bagac hanggang Capas, nakagigimbal

sandaang kilometrong hakbang, buti't may tumagal

huwag kalimutan ang nakibakang Hukbalahap

na nagtanggol din sa bayan sa kabila ng hirap

ipinaglaban ang kinabukasang hinaharap

sinagupa ang daluyong ng mga mapagpanggap

Araw ng Bataan, naging Araw ng Kagitingan

na dati ring Araw ng Corregidor at Bataan

taas-kamaong pagpupugay sa kabayanihan

ng mga lumaban at namatay para sa bayan

- gregoriovbituinjr.

04.09.2021

Aswang o akyat-bahay gang?

ASWANG O AKYAT-BAHAY GANG?

sa ibang lalawigan, ang nasa bubong ay aswang

sa lungsod naman, nasa bubong ay akyat-bahay gang

iba't ibang paniniwalang dapat lang igalang

kung paano makaligtas laban sa pusong halang

aralin ang istruktura ng tahanang ginawa

marahil, nasa bubong ay ibon o kaya'y pusa

mahirap nang makaharap yaong kasumpa-sumpa

at papetiks-petiks ka lang, iyon pala'y may banta

huwag pakuya-kuyakoy, alamin ang paligid

baka may nangyayari na't sa iyo'y nalilingid

may nakapasok nang ibang tao'y di mo pa batid

mahirap manggalaiti't lumalabas ang litid

sa kalunsuran din naman ay nauso ang aswang

mga uhaw sa dugo na sa gabi'y nanonokhang

wastong proseso ng batas ay di na iginalang

malalaman mo na lang na kayraming tinimbuwang

higit pa sila sa akyat-bahay, uhaw sa dugo

na buhay ng maraming inosente'y pinaglaho

mag-ingat, maging alisto, dapat loob ay buo

dapat silang panagutin sa krimeng itinago

- gregoriovbituinjr.

* litratong kuha ng makatang gala habang naglalakad kung saan-saan

Haka sa isang spiderman

HAKA SA ISANG SPIDERMAN

nakakita na naman

ng isang Spiderman

sapantaha ko lamang

baka akyat-bahay gang

buti't wala pang krimen

di pa siya salarin

anong daling pasukin

buti't bantay ko pa rin

mababa lang ang pader

makukuha'y kompyuter

kaya mag-ingat, aber

dahil baka ma-murder

ako'y nagpakita nga

nagluto sa kusina

buti na'ng laging handa

anuman ang magbadya

kaya laging mag-ingat

mahirap makalingat

lalo't baka masilat

sa aktong di masukat

- gregoriovbituinjr

Pinaghalong itlog at zucchini

PINAGHALONG ITLOG AT ZUCCHINI

itlog at zucchini'y pinaghalo

kaysarap naman ng aking luto

almusal muna nang di maglaho

ang tamis ng lutong may pagsuyo

ang zucchini'y padala ni misis

kasama ng maraming kamatis

tila pipinong may ibang bihis

ang zucchining tikman mo't kaytamis

maraming salamat sa zucchini

may pagkain sa araw at gabi

meryenda na ring nakawiwili

habang nakatitig sa kisame

nakakasulat, may inspirasyon

nakakatula, may nalalamon

habang sinusuri ang maghapon

upang maharap ang bagong hamon

- gregoriovbituinjr.

Ang talambuhay ko'y tula

ANG TALAMBUHAY KO'Y TULA

"A poet's autobiography is his poetry. Anything else is just a footnote." ~ Yevgeny Yevtushenko

bilang makata'y maraming nagtatanong sa akin

anong talambuhay ko't isasama raw sa aralin

ginunam-gunam ko kung ito ba'y espiyang itim

baka nakahandang ako'y ipakain sa pating

dangan kasi'y aktibista itong makatang gala

batid ang isyung desaparesido, nangawala

lalo na't may Anti-Terror Law na talagang banta

sa kung sinong sa may maling gawa'y manunuligsa

hanggang mabasa ko ang sinabi ni Yevtushenko

isang nobelista, mandudula, makatang Ruso

aktor at direktor sa mga pelikula nito

nayong Zima, Siberia, isinilang na totoo

anya, talambuhay ng makata'y ang kanyang tula

ang iba pang tungkol sa kanya'y simpleng talababa

kaya tungkulin, pangarap, tindig, prinsipyo't diwa

ng inyong abang lingkod ang madalas napapaksa

nasa kinathang tula ang aba kong talambuhay

mabasa ito'y matatagos ang buod kong tunay

detalye't petsa'y sa talababa mo mahuhukay

subalit nasa tula ang kabuuan kong taglay

- gregoriovbituinjr.

Ilang kwento ng nagdaang panahon

ILANG KWENTO NG NAGDAANG PANAHON

kaytagal nang nangyari, panahon pa ni Mahoma

nang napasagot ni Tatang ang butihin kong Lola

mahigpit na ang sinturon, naningalang pugad na

katwiran ni Tatang, si Lola'y mahaba ang palda

nineteen kopong-kopong nang naisulat ang salaysay

naggiyera patani ang magkaribal na tunay

nagbalitaktakan sa mga isyung natalakay

nagpayabangan lang ngunit di nakuha ang pakay

panahon ni Limahong ay may naningalang pugad

naroon ang tandang, dumalaga'y gumiri agad

nang malaman ng matatanda'y kasal na ang hangad

at baka raw may nabuong sa tiyan sumisikad

panahon ng Kempei-tai ay maraming nadisgrasya

pagkat ginahasa ng Hapon ang mga dalaga

lumipas ang panahon, dumaa'y deka-dekada

nang maraming lola ang nanawagan ng hustisya

iba't ibang panahong nagdaan sa kasaysayan

ano-anong aral ang ating mahihiwatigan

nang di maulit ang mga mali ng nakaraan

nang hustisya't pantaong karapatan ay igalang

- gregoriovbituinjr.

* litratong kuha ng makatang gala habang naglalakad kung saan-saan

Ang tema ng World Health Day 2021

ANG TEMA NG WORLD HEALTH DAY 2021

ang tema ng World Health Day ngayong taon ay nabanggit

ng isang kasama sa pahayag niyang kaypait

"Building a fairer, healthier world" ang temang kaylupit

pagbuo ng mundong malusog at pantay ang giit

kaygandang tema, mundong malusog, lipunang pantay

ngunit paano matutupad ang ganitong pakay

kung kapitalismo pa rin iyang sistemang taglay

kung elitista't burgesya'y naghahari pang tunay

pantay na mundo sa ilalim ng kapitalismo

malusog na daigdig kahit walang pagbabago

isang mundong ang karapatan ay ninenegosyo

may hustisya't karapatan ba sa sistemang ito?

oo, pangarap natin ang malusog na daigdig

at may pantay na lipunang ang lahat ay may tinig

pulubi't dukha'y di naiiwan, masa'y di lupig

at sa gahamang kapitalismo'y di nakasandig

kaygandang pangarap, pantay at malusog na mundo

bago maitatag, palitan ang kapitalismo

at tanggalin ang ugnay sa pag-aaring pribado

magkaisa't magkapitbisig ang uring obrero

pag nangyari muna iyan saka natin kakamtin

ang lipunang walang pang-aapi't pang-aalipin

lipunang malusog at pantay ay itatag natin

halina't kumilos, pangarap na ito'y tuparin

- gregoriovbituinjr.

* litrato mula sa google

Muli, sa aking diwata

MULI, SA AKING DIWATA

di kayang mabahiran ng lumbay

pagkat laging matimbang ang pakay

habang kasama ang mutyang tunay

iwing pusong ito'y matiwasay

halakhak niya'y kaysarap dinggin

ay, siyang tunay, kaypalad ko rin

tila diwata sa papawirin

na hinahabol lagi ng tingin

malayo man siya'y anong lapit

habang nariritong nakapikit

lalo't palad nami'y magkadikit

diwata ko'y sadyang anong rikit

sa problema'y di nagpapadaig

pagkat solusyon ang nananaig

hangga't ang puso ko'y pumipintig

naririto akong umiibig

- gregoriovbituinjr.

04.07.2021 (World Health Day)

Munting hiling ngayong World Health Day

MUNTING HILING NGAYONG WORLD HEALTH DAY

pandemya, lockdown, coronavirus

sa ulat, libo-libo'y namatay

isang trahedyang kalunos-lunos

sa yugtong ito ng ating buhay

nananalasa ang COVID-19

sa maraming bahagi ng mundo

pag nala-lockdown, walang makain

tila baga pag-asa'y naglaho

kahit na nariyan ang protocol

at ang sarili'y disiplinahin

kung walang makain, mas masahol

gayunpaman, ito'y dapat sundin

subalit kailangang tumindig

ng bawat isa sa nangyayari

ngayong World Health Day ay isatinig

kung ano ba ang makabubuti

palpak nga ba ang pamahalaan

sa pagtugon sa pandemyang ito

na pulos lockdown lang daw ang alam

pulos modipikasyon daw ito

ngayong World Health Day, ang hiling ko lang

ayusin sa bansa'y health care system

kung paano'y dapat pagtulungan

ng eksperto't mamamayan natin

- gregoriovbituinjr.

04.07.21

Mga nilikhang berdugo ng rehimen

MGA NILIKHANG BERDUGO NG REHIMEN

mga naglalaway sa dugo, sangkaterbang aswang

na sa inosente'y walang prosesong nananambang

nakatayo lang ay bigla na lang tinitimbuwang

ng mga nilikhang berdugo ng rehimeng tokhang

ang nais lang daw nila, pasaway ay mapatino

ngunit bakit buhay nito'y kanilang pinaglaho

disiplina't pagkauhaw sa dugo'y pinaghalo

di na iginalang ang batas, nambasag ng bungo

dahil mayhawak ng gatilyo kaya anong yabang

aba'y sagot naman daw sila ng pangulong halang

kaya kaylakas ng loob pumaslang ng pumaslang

atas kasi ng pangulo nilang talagang bu-ang

sila ang mga nilikhang berdugo ng rehimen

dugo't laman ng inosente yaong kinakain

sana'y matigil na ang kanilang pagka-salarin

at panagutin sila sa ginawang mga krimen

- gregoriovbituinjr.

Ang mabait

ANG MABAIT

tawag sa kanila'y mabait, totoo, mabait

marahil dahil sila'y tahimik kaya mabait

di naman maiingay ang daga't kanyang bubuwit

tahimik lang sisirain yaong gamit mo't damit

nais lang namang kumain saanman naroroon

kahit na mumo lang o kaya'y tira-tirang litson

aba'y kapag kinanti mo sila, lagot ka ngayon

gaganti sila't sira-sira ang iyong pantalon

paano mapaglalaho ang mabait na iyan

o kaya iyang mabait ay lasunin mo naman

pag namatay sa sulok, mamamaho ang tahanan

o makabubuti bang sila na lang ay hayaan

ang mabait, ang mababait, naroon sa sulok

maya-maya't magtatakbuhan, may pagkaing bulok

para bagang magnanakaw, tatangayin sa sulok

ng mabait ang itinapong tira-tirang manok

- gregoriovbituinjr.

* pasensya na sa litrato, baka masuka ang iba pag daga ang litrato, kaya mouse na lang ng kompyuter

* litrato mula sa google

Ang payo pagkaihi

ANG PAYO PAGKAIHI

payak na panawagan

disiplina lang naman

inihia'y buhusan

o kaya'y i-flush mo lang

naunawaan mo ba

may gagamit pang iba

ika nga, ikaw pa ba

ang walang disiplina?

ang kapwa'y irespeto

i-flush ang inidoro

may gagamit pa nito

kung ayaw mong masargo

di mapalot, mapanghi

di mangamoy ang ihi

at di nakadidiri

maginhawa palagi

ito lang ay panuto

nang di tayo mamaho

maraming salamat po

sa pagsunod sa payo

- gregoriovbituinjr.

* litratong kuha ng makatang gala sa istasyon ng MRT

Ang lambana

ANG LAMBANA

oo, siya nga'y nakita ko na, isang lambana

lilipad-lipad, bubulong-bulong sa aking taynga

nasaksihan niya ang pagdiga ko sa dalaga

na ngayon ay naging kasama ko't napangasawa

anong rikit ng lambanang iyon, palipad-lipad

na di ko matingkala saan nanggaling na pugad

habang kinakayod ko ang niyog ng anong kupad

nag-iingat lamang akong magkasugat ang palad

ang lambana'y naroong tila bantay sa paglaki

gabay ko kahit sa panliligaw sa binibini

patnubay ko laban sa mga tulisan ng gabi

giya upang matalunton ang hahakbangang sibi

anang lambana'y di totoo ang kapre o aswang

ngunit matakot ka sa sinasabi nilang tokhang

buti na lang may lambanang gabay mula pagsilang

upang maiwasan ko ang anumang pananambang

- gregoriovbituinjr.

* lambana - sa Ingles ay fairy

* litrato mula sa google, sa Encantadia ng GMA 7, nagngangalang Muyak ang lambana sa litrato

Soneto 5 - para sa April 7 (World Health Day)

Soneto 5 - para sa April 7 (World Health Day)

AYUSIN ANG PHILIPPINE HEALTH CARE SYSTEM!

ayon sa ulat, libo'y namatay sa COVID-19

labingtatlong libong higit na, nakakapanimdim

pag ganito ang nangyayari'y karima-rimarim

ang dapat na'y ayusin ang Philippine Health Care System

anang iba, wala kasing komprehensibong plano

na pulis at militar ang solusyon ng gobyerno

coronavirus ang kalaban, pinuntirya'y tao

naging bulag na tagasunod ng panggulong amo

binaril si Winston Ragos, pasaway ay nasaktan

coronavirus ang kalaban, di ang mamamayan

ang dapat pag-isipan ay kalusugan ng bayan

serbisyong medikal, di militar, ang kailangan

ayusin ang Philippine Health Care System, aming hiyaw

ito'y makatarungang gawin at dapat malinaw

- gregoriovbituinjr.

Soneto 4 - para sa April 7 (World Health Day)

Soneto 4 - para sa April 7 (World Health Day)

TRABAHO AT AYUDA, HINDI TANGGALAN!

ramdam ng manggagawa sa lockdown, panay ekstensyon

nawalan na ng trabaho'y kayrami pang restriksyon

wala nga bang plano kaya pulos modipikasyon?

na sa una pa lang ay di malaman ang solusyon?

nagsasara ang kumpanya, kaya pulos tanggalan

pati pagkakataon pa'y pinagsamantalahan

regular na manggagawa'y kanilang pinalitan

ng mga kontraktwal, aba'y napakasakit naman

dapat pangalagaan ang trabaho ng obrero

lalo't pandemya't lockdown pa sa mga lugar ninyo

subalit kontraktwalisasyon pa'y sinabay dito!

sadya bang walang puso ang kapitalistang tuso?

sigaw namin: Trabaho't Ayuda, Hindi Tanggalan!

sistemang kontraktwal ay dapat alising tuluyan!

- gregoriovbituinjr.

Soneto 3 - para sa April 7 (World Health Day)

Soneto 3 - para sa April 7 (World Health Day)

Libre at Epektibong Bakuna Para sa Lahat!

gaano nga ba kamahal ang naririyang bakuna?

kundi man libre'y abotkaya ba iyan ng masa?

paano matiyak di iyan tulad ng dengvaxia

na ayon sa mga ulat, kayraming namatay na

paano ba mawawala ang ating agam-agam

at makumbinsi tayo sa paliwanag ng agham

ang kamahalan ng bakuna'y tila di maparam

sa katulad kong mamamayang dapat makaalam

ulat sa telebisyon, kayraming senior citizen

ang nabakunahan, nakakatuwa kung isipin

di na ba sila magkakasakit, kung di sakitin

sa balita, nakumbinsi bang magpabakuna rin

libre at epektibong bakuna para sa lahat

sa mga manggagawa't dukha, ito sana'y sapat

- gregoriovbituinjr.

Soneto 2 - para sa April 7 (World Health Day)

Soneto 2 - para sa April 7 (World Health Day)

Solusyong Medikal, Hindi Militar!

dapat ipaunawa sa tao ang kalagayan

ng sakit na COVID-19 sa ating mamamayan

di dapat pinapalo ang lumabas ng tahanan

mga pasaway ay huwag naman agad sasaktan

dahil ang mga unipormado'y di mga hari

na hahampasin pa ng mga yantok nilang ari

na didisiplinahin kang pilipit ang daliri

na totokhangin ka kaya magdasal na sa pari

ang problema'y ang COVID-19, ang coronavirus

bakit papaluin yaong lumabas na hikahos

na hanap ay pagkain para sa pamilyang kapos

diwa ng unipormado'y sumunod lang sa utos?

solusyong medikal, hindi militar, ang dapat gawin

COVID-19 ang kalaban, di mamamayan natin

- gregoriovbituinjr.

Soneto 1 - para sa April 7 (World Health Day)

Soneto 1 - para sa April 7 (World Health Day)

Libreng Mass Testing, Ngayon Na!

di natin malaman kung sino ang mga maysakit

lalo na sa kapitbahayan nating dikit-dikit

di natin alam na ang kausap nating kayrikit

ay siya palang hahawa sa atin, anong lupit

di rin niya alam na maysakit na pala siya

dahil wala pang testing na naganap sa kanila

lahat na lang tayo'y pawang duda sa isa't isa

kaya dapat mag-face mask at mag-face shield sa tuwina

kung may pag-testing man ay pupunta ka sa ospital

magbayad ka ng anim o pitong libo, kaymahal

paano ang dukhang sa presyo pa lang ay aangal

magbabayad pa sa testing, wala ngang pang-almusal

"Libreng Mass Testing, Ngayon Na" ang ating panawagan

na sana'y agad matugunan ng pamahalaan

- gregoriovbituinjr.

Ako raw ay isang bolerong makata

AKO RAW AY ISANG BOLERONG MAKATA

ako raw ay isang bolerong makata

isang salawahan sa pagsasalita

di ito totoo dahil pawang bula

ako'y nanunumpang tapat sa salita

ang mga salita'y kaya kong tahiin

pagpupuluputin o pagtatagniin

pagkat makata ngang wika'y hahabihin

di ibig sabihing salawahan na rin

sabi sa Kartilya, sa taong may hiya

ang salita'y sumpa, nakakatulala

ngunit inangkin kong tapat na adhika

ng Katipunerong bayani't dakila

ako'y manunulang tapat sa pag-irog

pagsintang alay ko'y talagang kaytayog

ang totoo niyan, ako ang bubuyog

na mahiyain ma'y makapal ang apog

hanap ko'y bulaklak, ang magandang rosas

na aalayan ko ng pagsintang wagas

kung ako'y makatang bolero'y di ungas

nais kong pagsinta'y parehas at patas

handang ipaglaban ang tanging pag-ibig

sa wasto lang ako makikapitbisig

sa tama lang ako kung inyong marinig

subalit ang mali'y aking inuusig

kaya inyong dinggin ang aking pahayag

sa tula ko'y wala kayong idaragdag

tulang may prinsipyo, tulang pumapalag

pagkat di malambot, diwa'y di matinag

- gregoriovbituinjr.

* litratong kuha ng makatang gala habang naglalakad kung saan-saan

Ang buhay ng magkasuyo

ANG BUHAY NG MAGKASUYO

ako ang hari, siya ang reyna

ako ang ama, siya ang ina

ako ang barako, ang lalaki

siya ang diwata, ang babae

I am the man but she is the boss

siya nga'y sinisinta kong lubos

kakaiba ang tatak sa baso

na tila baga patama ito

sa pag-ugnayan ng magsing-irog

sa pagsinta nilang anong tayog

sino ang alalay, sinong amo

sino sa taas o sa imbudo

gayunpaman, sila'y magkasuyo

magkasama kahit sa siphayo

na sa ginhawa man o sa hirap

ay lalaging magkasamang ganap

magkasama kahit magkasakit

walang iwanan kahit na gipit

tapat ngang nagmamahalan sila

bilihin ma'y nagmamahalan na

- gregoriovbituinjr.

* litratong kuha ng makatang gala sa isang restawran niyang kinainan

Ang gawaing pagsasalin

ANG GAWAING PAGSASALIN

ang gawaing pagsasalin

ay niyakap kong tungkulin;

makabuluhang gawain

makatuturang layunin

yaong mga kahulugan

ng mga tekstong dayuhan

ay dapat maunawaan

ng babasang mamamayan

binabasa ng marunong

ay tila ba mga bugtong

kaya isasalin iyon

para sa bayan paglaon

isasalin kong maingat

ang anumang nasusulat

salita ma'y anong bigat

uunawain kong sukat

isalin kung ito'y Ingles

o kung ito ma'y Spanish

kahit na salitang Pranses

i-Tagalog nang malinis

misyon ng makatang gala

ang pagsasalin sa madla

misyon kong magpaunawa

sa ating sariling wika

yakap na tungkuling ito'y

pinagbubuting totoo

nang balita nila't kwento'y

mababasa sa bayan ko

ang nobela nila't tula

ang plano nila't adhika

ang prinsipyo nila't diwa

na maunawa ng madla

- gregoriovbituinjr.

Pasaring

PASARING

"Bakit, sino ka ba? Isang kawawang aktibista..."

minsan ay pasaring sa akin ng mahal kong ina

dahil di na ako maawat sa gawaing masa

sapagkat lagi na raw akong laman ng kalsada

dahil mga tula'y naghahanap ng katarungan

sa mga di ko raw kaanu-anong kung sino man

ako'y tinutuligsa sapagkat nasa kilusan

bakit sarili'y di ko raw isipin, di lang bayan

nabatid ko na ang dakilang layunin, at bakit

ko lilisanin ang kilusang mapagmalasakit

sa ating bayan, sa kapakanan ng maliliit

panlipunang hustisya'y banal na misyon kong giit

aniya pa, di naman nakakain ang prinsipyo

dapat daw maghanap na ng trabahong sumusweldo

at di gumawa ng pang-iistorbo sa gobyerno

di ako napigil ni ina, nagpatuloy ako

dahil nais kong patunayang tapat akong lingkod

di tulad ng gobyernong ang masa ang sinasakyod

tokhang, pagpaslang, maging bingi'y di nakalulugod

buti't may kilusang may prinsipyong tinataguyod

karapatang pantao at panlipunang hustisya

ang kambal na tunguhing dapat makamit ng masa

iyan ang layunin ko bilang simpleng aktibista

at makakamtan iyan pag nabago ang sistema

- gregoriovbituinjr.

Dapat walang chosen one

DAPAT WALANG CHOSEN ONE

ngayong semana santa'y muli na namang narinig

sa telebisyon ang Israel na sa Diyos panig

chosen one daw o piling lahing di raw malulupig

Israel noong iba sa Israel na nanlupig

at nang-agaw ng lupain ng mga Palestino

matapos ang digma'y inangkin na ng mga Hudyo

ang lupang Palestino, tinaboy ang mga tao

chosen one daw sila kaya sa Six-Day War nanalo

lahat ng tao'y pantay, ayon sa Pandaigdigang

Deklarasyon ng Karapatang Pantao, pahayag

ng Nagkakaisang Bansa, taliwas sa chosen one

dapat walang chosen one, pantay ang sangkatauhan

kung may chosen one, di pantay-pantay ang bawat isa

taliwas at magkasalungat ang gayong ideya

tila kasaysayan lang ng Israel ang Bibliya

kasaysayan lang ng lahing Hudyo, di ng iba pa

kay Jacinto'y "Iisa ang pagkatao ng lahat"

doon sa kanyang Liwanag at Dilim ay nasulat

kung may chosen one, may piling tao, sadyang salungat

sa pantay-pantay na trato't karapatan ng lahat

dahil dito'y dagli kong sinara ang telebisyon

sa nakikitang kasalungatan ng relihiyon

pagkakapantay-pantay ng lahat ang aming layon

na ipaglalaban, baguhin ang sistema'y misyon

- gregoriovbituinjr.

* litratong kuha ng makatang gala habang naglalakad kung saan-saan

Ang mamatay para sa banal na dahilan

ANG MAMATAY PARA SA BANAL NA DAHILAN

"Live for nothing, or die for something." - Stallone, 

sa pelikulang Rambo 4, The Fight Continues

https://www.youtube.com/watch?v=PN49Mw9KVUg

ang mabuhay lang ng walang saysay kundi kumain

o mamatay dahil may ipinaglabang layunin

mas pinili ko ang ikalawa, may adhikain

may prinsipyong tangan at may misyong dapat tuparin

ayokong tumanda lang at tumanda ng tumanda

na kain lang ng kain, subalit walang adhika;

si Gat Emilio Jacinto na bayaning dakila

sa kanyang aral sa Kartilya'y ganito ang wika:

"kahoy na walang lilim kundi damong makamandag

ang buhay na di ginugol sa banal na dahilan"

aral na makabuluhang sadya't may katuwiran

na sinusunod ko maging sa loob ng tahanan

"live for nothing or die for something," ang sabi ni Rambo

doon sa pelikulang may bakbakang todo-todo

mabuhay lang sa wala kundi kumaing totoo

o mamatay dahil may ipinaglabang prinsipyo

sadyang may saysay ang mga pananalitang iyon

sa buhay-aktibista ko'y tunay na inspirasyon

matayo ang lipunang makatao'y aming layon

at nagsisikap tuparin ang banal naming misyon

- gregoriovbituinjr.

Patuloy ang pakikibaka

PATULOY ANG PAKIKIBAKA

nasa lockdown man, subalit hindi nagbabakasyon

kundi nasa isip pa rin ang pagrerebolusyon

dahil patuloy ang salot na kontraktwalisasyon

dahil patuloy pa ang tokhang at pagpaslang ngayon

nasa lockdown man, patuloy pa rin ang pangangarap

na sigaw na panlipunang hustisya'y kamting ganap

na ginhawa'y kamtin ng dukha't maibsan ang hirap

na mapatalsik na ang namumunong mapagpanggap

kaya di kami titigil hangga't di nagwawagi

uusigin ng sambayanan ang mapang-aglahi

pag-uusig sa mamamaslang itong aming mithi

uusigin ang bu-ang na siyang utak at sanhi

di kami uuwi hangga't di matupad ang layon

umuwi man kaming bangkay ay natupad ang misyon

- gregoriovbituinjr.

* litratong kuha ng makatang gala sa isang pagkilos ng mamamayan

Ang Abril bilang Buwan ng Panitikan

ANG ABRIL BILANG BUWAN NG PANITIKAN

Abril ay itinalagang Buwan ng Panitikan

na kay Balagtas ay buwan din ng kapanganakan

isang araw bago ito'y sa kapatid ko naman

na nagdiwang din kahapon ng kanyang kaarawan

sa kapwa tagapagtaguyod ng literatura

magpatuloy nating isulat ang bansa't kultura

karaniwa't munting bagay mang di pansin tuwina

anong saysay at kasaysayan ng ating historya

patuloy nating itula ang samutsaring paksa

di lang pulos pulang rosas sa iyong minumutya

kundi pati sa paligid, anong tingin ng madla

bakit kayraming gusaling ang nakatira'y wala

may mga kumakatha bilang sariling ekspresyon

kaya di raw pangmasa ang sinulat nilang yaon

mayroon ding inilalarawan ang buhay ngayon

habang iba'y sinusulat ang kanilang kahapon

may iba namang daigdig mismo'y inuunawa

nagtatanong: bakit may kahirapan o may dukha

bakit may mga desaparesidos o winala

bakit hindi maregular ang mga manggagawa

literatura'y di dapat lagi sa toreng garing

mangangatha'y dapat bumaba't dinggin ang hinaing

ng bawat aping nayurakan ng dangal na angkin

habang ngingisi-ngisi lang ang namumunong praning

minsan, ang panitikan ay dapat ding nagsisilbi

sa masa, sa bayan, sa lipunan, di sa salbahe

ilarawan ang buhay ng mga kawawa't api

panitikang nagpapalaya ng gapos sa gabi

- gregoriovbituinjr.

04.02.21

* Sa pamamagitan ng Batas Pambansa Blg. 968, s. 2015, itinalaga ang Abril bilang Buwan ng Panitikang Filipino.

Sa Black Friday Protest ngayong Biyernes Santo

SA BLACK FRIDAY PROTEST NGAYONG BIYERNES SANTO

nagpapatuloy ang protesta laban sa patayan

kahit na Biyernes Santo'y di ito napigilan

kahit may lockdown at wala man kami sa lansangan

protesta'y patuloy laban sa salot na pagpaslang

gamit man ay social media sa ganitong pagkilos

panawagang panlipunang hustisya'y nilulubos

laban sa krimeng ang uhaw sa dugo ang may utos

na buhay ng inosente't dukha ang inuulos

higit pa sa pandemya ng bayrus iyang pagpatay

na walang prosesong nilagay ang batas sa kamay

dahil sa utos ng bu-ang, sila'y di na nagnilay

na ginawa na silang salarin, halang na tunay

Biyernes Santo ang mukha ng bawat namatayan

pagkat ang mga puso'y napuno ng kalungkutan

pagkat ngingisi-ngisi lang ang nag-utos na bu-ang

at nakakalaya pa rin ang mga mamamaslang

kaya ngayong Biyernes Santo, ako'y nakiisa

sa Black Friday Protest ng naghahanap ng hustisya

para sa karapatang pantao, para sa masa

sana, ang utak ng krimeng ito'y mapatalsik na

- gregoriovbituinjr.,04.02.21

Kalinisan

Kalinisan

doon sa lugar ko sa Maynila'y may kasabihan

"Kung hindi mo kayang linisin ang kapaligiran,

huwag mo na lang dumihan," sana'y naunawaan

ng mahilig magkalat kahit sa mismong tahanan

madaling intindihin ang payak na pangungusap

kaydaling unawain ng payak na pakiusap

sa sentido komon ay singlinaw ng puting ulap

subalit nalalabuan ang mga mapagpanggap

sa opisina man ng paggawang tinitigilan

tinitiyak naming malinis ang kapaligiran

may basurahan, walis na tambo't tingting at daspan

kung may pinagkainan ay linisin at hugasan

kung galit tayong gawing tapunan ang ating bansa

ng mga basura ng dayo, kumilos ng kusa

gawin ang dapat, pag may isyu'y dapat laging handa

upang sa sarili man lang ay di kahiya-hiya

- gregoriovbituinjr.

Makapaglakbay ay muli kong kinasasabikan

MAKAPAGLAKBAY AY MULI KONG KINASASABIKAN

makapaglakbay ay muli kong kinasasabikan

tulad ng paglahok sa Lakad Laban sa Laiban Dam

at nag-Climate Walk mula Luneta hanggang Tacloban

at doon sa Paris ay nakapaglakad din naman

kinasasabikan kong muli ang makapaglakbay

katawan ko'y dapat malusog, maghahandang tunay

nasasabi ito pagkat lagi kong naninilay

na sana'y may pagkakataon muling maibigay

ang una'y tumigil sa Japan ng anim-na-buwan

dalawang dekada matapos ay sa Bangkok, Thailand

tatlong taon matapos ako'y nasa Mae Sot naman

sa hangganan ng Burma't Thailand, dalawang linggo lang

tatlong taon ang lumipas, pangarap ko'y natupad

lumapag sa Guangzhou, Tsina, bago muling lumipad

nakarating ng Lyon sa Pransya bago maglakad

patungong Paris, humakbang ng milya-milyang singkad

sana, matupad ang pangarap kong muling maglakbay

at sa mga nakasama ko, Mabuhay! Mabuhay!

taospusong pasasalamat sa inyo, kalakbay!

nawa'y tanggapin po ninyo ang aking pagpupugay!

- gregoriovbituinjr.

* litratong kuha ng makatang gala sa estasyon ng MRT

Minsan talaga'y napapatunganga sa kawalan

MINSAN TALAGA'Y NAPAPATUNGANGA SA KAWALAN

minsan talaga'y napapatunganga sa kawalan

di maiwasan, lalo't kayraming nasa isipan

pabahay ng dukha'y paano ba ipaglalaban?

kontraktwalisasyon ba'y paano sosolusyunan?

ang mga pagpaslang ba'y paano mapipigilan?

di lamang naman isang tao ang makalulutas

ng panlipunang suliraning dinaan sa dahas

ng samutsaring isyung ginawa ng mararahas

kung paano patalsikin ang namumunong ungas

kung paano maitatatag ang lipunang patas

minsan napapatunganga rin dahil sa pag-ibig

lalo na't nasa malayo ang nais makaniig

lalo't may mga bagay na sa puso'y nakaantig

habang hinaing ng sambayanan ay di marinig

kayraming sigaw subalit animo'y walang tinig

mga isyu'y paano natin iimbestigahan

ng walang takot at walang pipigil na haragan

mga problema ng bayan ay dapat matugunan

kongkretong pagsusuri sa kongkretong kalagayan

at kolektibong pagkakaisa ng mamamayan

napapatunganga sa kawalan sa paghahanap

ng solusyon upang tuluyang maibsan ang hirap

ng sambayanan dahil sa mga pinunong 'corrupt'

sa pagtunganga'y bakasakaling may mahagilap

na hakbang nang mga apektado'y makapag-usap

- gregoriovbituinjr.

* pag-selfie ng makatang gala habang naglalakad kung saan-saan

Tagulaylay sa tagay

TAGULAYLAY SA TAGAY

di matinag ang isip

sa isyung di malirip

sinta'y napanaginip

saya ang halukipkip

serbesa ang kasangga

pagsapit ng problema

sumasarap ang lasa

bulol man sa pagkanta

agilang mandaragit

sa masa'y anong lupit

karapatang ginipit

hustisya ang giniit

mga pinunong bugok

ay pawang inuuk-ok

pagkat sistemang bulok

ay kanilang nilunok

inosente'y pinaslang

dahil atas ng bu-ang

agad itinimbuwang

ng mga salanggapang

mga daga sa kanal

silang mga kriminal

marurumi ang asal

simbaho ng imburnal

ang tuso'y patalsikin

ang bu-ang ay sipain

ang pangkating salarin

ay dapat lang lipulin

baguhin na ang bayan

pati pamahalaan

at itayong tuluyan

makataong lipunan

- gregoriovbituinjr.

* litratong kuha ng makatang gala sa paglalakad kung saan-saan

Munting pagninilay sa animo'y patay na oras

MUNTING PAGNINILAY SA ANIMO'Y PATAY NA ORAS

munting pagninilay sa animo'y patay na oras

kung bakit kayraming pinapaslang ang mararahas

kung bakit kayraming inosente ang dinadahas

kung bakit dapat pangarapin ang malayang bukas

kung bakit dapat itatag ang lipunang parehas

kung bakit karapatang pantao'y dapat igalang

kung bakit panlipunang hustisya'y pinaglalaban

kung bakit dapat organisahin ang mamamayan

kung bakit dapat itayo'y makataong lipunan

kung bakit hindi dapat tumunganga sa kawalan

may panahon ng pagninilay sa pakikibaka

suriin ang bulok na sistemang kapitalista

kung bakit manggagawa't dukha'y dapat magkaisa

at magsikilos para sa panlipunang hustisya

upang tuluyang baguhin ang bulok na sistema

alak man at isang platitong mani ang kaharap

may serbesa man o anumang pulutang masarap

dapat patuloy na paghandaan ang hinaharap

kung paano dudurugin ang mga mapagpanggap

kung paano itatatag ang lipunang pangarap

- gregoriovbituinjr.