ALAS-DOSE NA BUMANGON
madalas, kay-aga nang babangon
madaling araw, gising na ako
ngayon, alas-dose na bumangon
pahinga muna, pagkat Sabado
madalas, maaga pa'y lalabas
at maglalakad na ng malayò
upang damayan ang nag-aaklas
na obrero't dukhang nasiphayò
tanghaling bumangon, kumathâ na
ng iilang may sukat at tugmâ
iyan ang bisyong yakap talaga
at gawain ng abang makatâ
mamaya'y lalabas buong gabi
diringgin ang kapwa manunulat
sa panayam niya't masasabi
sa kanyang paksang isisiwalat
- gregoriovbituinjr.
12.13.2025
Walang komento:
Mag-post ng isang Komento