Di man ako sinamahan

DI MAN AKO SINAMAHAN

siyang tunay, di nila ako sinamahan

baka tingin nila ako'y nang-uuto lang

subalit itinuloy ko ang panawagan

dahil kung hindi, ito'y isang kahihiyan

baka sabihin nila, "Wala ka pala, eh!"

at malaking dagok ang kanilang mensahe

subalit tulad kong sa masa'y nagsisilbi

pinakitang may isang salita't may paki

baka sila'y abala sa sariling buhay

baka ako'y inaasahan silang tunay

baka sila'y abala sa kanilang bahay

baka ako kasi'y pulos lang pagninilay

baka ako'y lihim na kinukutya nila

isang makatang walang kapag-a-pag-asa

kaya napagpasyahan kong kahit mag-isa

tuloy ang laban, tuloy ang pakikibaka

ayos lang, walang samaan ng loob dito

pagkat mahalaga'y may nagagawa tayo

aking ipagtatapat, ito ang totoo:

inangkin ko na'y laban ng dukha't obrero

- gregoriovbituinjr.

10.20.2025

* kuha sa tapat ng NHA, Oktubre 17, kasabay ng International Day for the Eradication of Poverty

Ang pinakapahinga ko

ANG PINAKAPAHINGA KO

pinakapahinga ko na'y pagtulâ

at pagsagot ng krosword at sudoku

ganyan ang buhay ng abang makatâ

pag pagod na'y magpahingang totoo

kaya madalas may tulâ sa gabi,

madaling araw, umaga, tanghali

paraan din iyan ng pagsisilbi

sa masa't ang dusa'y di manatili

kayraming paksang dapat ilarawan

dapat sabihin o ipaliwanag

tulad ng mga isyu ng lipunan

na tunay namang nakapangangarag

tula'y pantanggal ng sama ng loob

o pakiramdam sakaling mayroon

paksa ma'y saya, tuwa, galit, kutob

mahalaga, pagtula'y isang misyon

- gregoriovbituinjr.

10.20.2025

Bawang juice at salabat

BAWANG JUICE AT SALABAT

pagkagising sa madaling araw

ay nagbawang juice na't nagsalabat

habang nararamdaman ang ginaw

at sikmura'y tila inaalat

pampalakas ng katawan, sabi

sa dugo'y pampababa ng presyon

pinalalakas ang immunity

para rin sa detoksipikasyon

para talaga sa kalusugan

at panlaban din sa laksang pagod

nakatutulong maprotektahan

sa ubo't sipon, nakalulugod

upang sakit nati'y di lumalâ

upang katawan nati'y gumanda

ang anumang labis ay masamâ

kaya huwag uminom ng sobra

- gregoriovbituinjr.

10.20.2025

Ikaw'y aking di malimot na gunitâ

IKAW'Y AKING DI MALIMOT NA GUNITÂ

ikaw'y aking / di malimot / na gunitâ

aking sinta, / diwata ko't / minumutyâ

naligalig / ako't sadyang / natulalâ

hanggang ngayon / sa bigla mong / pagkawalâ

saan nga ba / ang tulad ko / patutungò

pag-ibig ko / sa iyo'y di / maglalahò

nadarama'y / pagkabigo, / nasiphayò

ang buhay ko'y / para bagang / nasa guhò

O, Liberty, / anong ganda / ng 'yong ngalan

sa pandinig: / Kalayaan, / Kasarinlan

makilala / ka'y malaking / karangalan

ibigin mo'y / ligaya ko / nang nakamtan

ako'y bihag / ng ngiti mong / anong ganda

ng mukha mong / sa puso ko'y / humalina

nagdugo man / yaring puso't / nagdurusa

ay di kita / lilimutin, / aking sinta

- gregoriovbituinjr.

10.19.2025

* litratong kuha sa Bantayog ng mga Bayani, Abril 24, 2019, sa ika-39 na anibersaryo ng kamatayan ni Macli-ing Dulag

Paksâ

PAKSÂ

nais kong isulat ang samutsaring paksâ

ng madaling araw nang di pa inaantok

nakakapagod din ang maging maglulupâ

na layunin ay baligtarin ang tatsulok

mga ideya'y nagsulputang walang puknat

habang karimlan pa'y pusikit at tahimik

mga paksang sapat upang makapagmulat

at bawat letra roon ay nais umimik

bakit ba isip ay nasa himpapawirin?

habang mga luha'y naglalandas sa pisngi

bakit ba bituin ay lalambi-lambitin?

upang makita ang diwatang kinakasi?

bakit mga buwaya sa pamahalaan

ay gutom na gutom at tila di mabusog?

na kapara'y mga buwitre sa tanggapan

nilang sinagpang ang kahit na lasog-lasog?

aanhin ko ba ang naririyang palakol?

para ba sa ulo ng korap na pahirap?

na limpak-limpak ang kita sa ghost flood control

paano ba gugulong ang ulo ng korap?

- gregoriovbituinjr.

10.19.2025

Plakard

PLAKARD

malinaw ang mensahe sa plakard

upang maipatagos sa masa

ang samutsaring isyu ng bayan

kung bakit tayo nakikibaka

dyenosidyo na'y dapat itigil

kayraming buhay na ang napaslang

kayâ pananakop ng Israel

sa Palestine ay dapat labanan

ang pagmimina'y nakasisirà

sa kalikasan at katutubò

kapag mali ang pamamahalà

totoong serbisyo'y naglalahò

sana'y unawa ng makatunghay

sa plakard ang naroong mensahe

kung sa isyu ay nakasubaybay

baka di na mabilang ang rali

taospusò kong pasasalamat

sa mga kasamang inihandog

ang buhay, panahon, diwa, lahat

para sa adhikaing kaytayog

- gregoriovbituinjr.

10.18.2025

* salamat sa kumuha ng litrato

May mga umagang ganito

MAY MGA UMAGANG GANITO

I

tumunog ang alarm clock sa selpon

alas-sais na, ako'y bumangon

naligo, naghilod, walang sabon

sa labas ng bahay, umaambon

II

nasa kama pa't nakagupiling

dinantay ang kamay sa kasiping

wala na pala, ako'y nagising 

ngunit dama kong sinta'y kapiling

III

paggising, ramdam ko'y pagkapagal

ng buong katawan, hinihingal

sa panaginip, tinakbo'y obal

at muli, kumot ay binalabal

IV

kagabi, may bahaw akong tira

isinangag ko ngayong umaga

walang bawang subalit pwede na

busog na rin saanman pumunta

V

pinagtiyagaan ko ang tutong

habang ulam ko'y pritong galunggong

may kamatis sa pinggang malukong

at siling pasiti sa bagoong

VI

mag-uunat-unat ng katawan

at lalamnan ng tubig ang tiyan

bitamina'y di kalilimutan

bago makirali sa lansangan

VII

nagising na mataas ang lagnat

lunas ay agad kong inilapat

naligo, uminom ng salabat

baka mikrobyo'y mawalang lahat

- gregoriovbituinjr.

10.18.2025

Plan, Plane, Planet

PLAN, PLANE, PLANET

gaano man kapayak ang plano

upang mabuhay sa bayang ito

ang mamamayan mang ordinaryo

mahalaga'y nagpapakatao

hindi pinagsasamantalahan

hindi inaapi ng sinuman

dangal ay hindi niyuyurakan

dignidad niya'y iniingatan

tulad ng pag-ingat sa daigdig

na binunga ng laksang pag-ibig

sinisira ng mga ligalig

mga dukha'y winalan ng tinig

habang kayrami ng nauulol

sa pondo't proyekto ng flood control

ngayon, ang bayan na'y tumututol

at protesta ang kanilang hatol

sa gobyerno, laksa'y mandarambong

na lingkod bayang dapat makulong

halina't tayo'y magtulong-tulong

at tiyaking may ulong gugulong

karimlan man ay laging pusikit

dapat madama nila ang galit

ng bayang kanilang ginigipit

sa madalas nilang pangungupit

sa kaban ng bayan, ay, salbahe

ang mga trapong kung dumiskarte

ay di ang maglingkod o magsilbi

kundi sa masa'y makapang-api

- gregoriovbituinjr.

10.18.2025

Sa taho

SA TAHO

mayroong istiker sa lalagyan ng taho:

sabi: "Lahat ng kurakot dapat managot!"

siyang tunay, korapsyon sana nga'y maglaho

pati na mga corrupt, kurakot, balakyot!

Oktubre na, wala pang nakulong na korap

o baka ang kawatan ay pinagtatakpan

ng kapwa kawatan, aba'y iyan ang hirap

kanya-kanyang baho'y inamoy, nagtakipan

dapat taumbayang galit na'y magsigising

huwag tumigil hanggang korap na'y makulong

magbalikwas na mula sa pagkagupiling

at tiyakin ng masang may ulong gugulong

di matamis kundi kumukulo sa galit

ang lasa ng tahong binebenta sa masa

pasensya ng masa'y huwag sanang masaid

baka mangyari ang Nepal at Indonesia

- gregoriovbituinjr.

10.17.2025

Salamisim

SALAMISIM

nasa rali man ako, sinta

kasama'y manggagawa't dukhâ

ay nasa puso pa rin kita

iyon ang mahalagang sadyâ

sa bawat minutong nagdaan

sa bawat segundong lumipas

o maging sa bawat araw man

o pagdaan ng bawat oras

ay lagi kang nagugunitâ

sa mga tula'y nasasambit 

madalas mang ako'y tulalâ

tula'y tulay sa bawat saglit

sa bawat araw na ninikat

kahit na ako'y nananamlay

ay sisigla na akong sukat

pag naalala kitang tunay

- gregoriovbituinjr.

10.17.2025

Kumilos ka

KUMILOS KA

umiyak ka

magalit ka

at kung di ka

kumikilos

eh, ano ka?

dinastiya

at burgesya

trapong imbi

namburiki

ng salapi

mula kaban

nitong bayan

silang mga

manlilinlang

at kawatan

kaya pulos

sila korap

humahangos

pag panggastos

at panustos

ang usapin

nais nilang 

bayan natin

ay korapin

at linlangin

makibaka

kumilos ka

baguhin na

iyang bulok

na sistema

- gregoriovbituinjr.

10.16.2025

* litrato kuha sa Mendiola, Maynila, Oktubre 2, 2025

Wakasan ang oligarkiya!

WAKASAN NA ANG OLIGARKIYA!

pusò ng oligarkiya'y talagang halang

pati kakainin ng dukha'y sinasagpang

sa buwis nga ng bayan sila'y nakaabang

ugali nila'y mapanlinlang, mapanlamang

katulad din nila ang mga dinastiya

na ginawa nang negosyo ang pulitika

iisang apelyido, iisang pamilya

sila lang daw ang magaling sa bayan nila

tingni, kung ikaw sa bansa nakasubaybay

oligarkiya't dinastiya'y mga anay

silang ang  bayan natin ay niluray-luray

kaban ng bayan ang ninakaw at nilustay

huwag na tayong maging pipi, bingi't bulag

sa kanilang yamang di maipaliwanag

wakasan na ang kanilang pamamayagpag

sa pagkaganid nila'y dapat nang pumalag

- gregoriovbituinjr.

10.16.2025

* litrato kuha sa Luneta, Maynila, Setyembre 21, 2025

Basura, linisin!

BASURA, LINISIN!

"Basura, linisin! Mga korap, tanggalin!"

panawagan nila'y panawagan din natin

dahil BASURA plus KORAPSYON equals BAHA

mga korap ay ibasura nating sadya

kayraming kalat, upos, damo, papel, plastik!

walisin na lahat ng mapapel at plastik!

oligarkiya't dinastiya, ibasura!

senador at kongresistang korap, isama!

may korapsyon dahil may Kongresista Bundat

kaban ng bayan ang kanilang kinakawat

at may korapsyon dahil may Senador Kotong

na buwis ng mamamayan ang dinarambong

tarang maglinis! baligtarin ang tatsulok!

sama-samang walisin ang sistemang bulok!

O, sambayanan, wakasan na ang korapsyon!

kailan pa natin gagawin kundi ngayon!

- gregoriovbituinjr.

10.15.2025

* litrato kuha sa Luneta, Setyembre 21, 2025

May madaling araw na ganito

MAY MADALING ARAW NA GANITO

I

ako'y biglang naalimpungatan

nang may kumaluskos sa pintuan

ang balahibo ko'y nagtayuan

di mawari ng puso't isipan

II

tila ba may kung sinong yumugyog

nang selpon ko'y sa sahig nahulog

at di na ako napagkatulog

hanggang maamoy ang mga hamog

III

ala-una ng madaling araw

at dama ko ang kaytinding ginaw

pagbangon, tila may nakatanaw

matapang kong binuksan ang ilaw

sino bang nagmamatyag sa akin

tiningnan saan mata'y nanggaling

paglingon ko'y may isang imahen

litrato ng sinta'y nakatingin

IV

natulog nang mag-aalas-dos na

matapos sa kompyuter magtipa

ganyan ang gawain ko tuwina

madaling araw na ay gising pa

at nag-alarm clock ng alas-sais

pagkat maliligo't magbibihis

kakain ng kaunti't aalis

kulang sa tulog, trabaho'y labis

- gregoriovbituinjr.

10.15.2025

Maging magsasaka sa lungsod

MAGING MAGSASAKA SA LUNGSOD

halina't tayo'y magtanim-tanim

upang bukas ay may aanihin

tayo man ay nasa kalunsuran

mabuti nang may napaghandaan

baka di makalabas at bahâ

lepto ay iniiwasang sadyâ

noong pandemya'y di makaalis

buti't may tanim kahit kamatis

ipraktis na ang urban gardening

nang balang araw, may pipitasin

alugbati, talbos ng kamote

okra, papaya, kangkong, sayote

magtanim sa maliit mang pasô,

sa lata, gulong na di na buô

diligan lang natin araw-araw

at baka may bunga nang lilitaw

- gregoriovbituinjr.

10.14.2025

* litrato kuha sa Villa Immaculada, Intramuros, Maynila, Oktubre 4, 2025

Tanggalin na ang pork ng mga baboy

TANGGALIN NA ANG PORK NG MGA BABOY

tanggalin na ang pork ng mga baboy

silang dinala tayo sa kumunoy

ng kahirapa't pagiging kaluoy

tanggalin na ang pork ng mga baboy

tanggalin na ang pork ng mga trapo

lalo't masa'y kanilang niloloko

lalo't masa nama'y nagpapaloko

sa mga mayayamang pulitiko

tanggalin na ang pork ng mga iyon

lalo't dulot nito'y pawang korapsyon

sa flood control nina Senador Kotong

at Kongresista Bundat sa paglamon

tanggalin na ang pork ng mga korap

na mga pulitikong mapagpanggap

lalo't baha'y ating kinakaharap

na sa bayan ay talagang pahirap

- gregoriovbituinjr.

10.14.2025

* litrato mula sa kawing na: https://www.facebook.com/photo/?fbid=1243836657790369&set=a.654145666759474 

Proyektong 'ghost' flood control

PROYEKTONG 'GHOST' FLOOD CONTROL

pulos buhangin, konting semento?

sa flood control, o wala nga nito?

bakit baha pa rin sa bayan ko?

bakit 'ghost' ang kanilang proyekto?

di pala climate change ang dahilan

sa flood control kundi kurakutan 

dapat mapanagot ang sinumang

bitukang halang na nagpayaman

konggresista't senador na suspek

na sa pera ng bayan ay adik

dapat sa piitan na isiksik

at huwag tayong patumpik-tumpik

nakaiiyak, nakalulungkot

ang nangyayari't kayraming salot

na lingkod bayang dapat managot

ikulong na lahat ng kurakot

baguhin na ang sistemang bulok 

pagkat kabuluka'y di pagsubok

kundi gawain ng mga hayok

na sa salapi'y pawang dayukdok

- gregoriovbituinjr.

10.14.2025

* litrato kuha sa Luneta sa Maynila, Setyembre 21, 2025

Pagninilay

PAGNINILAY

i

di nagkakasakit ang bakal

kahit kalawang pa'y kainin

isa itong magandang aral

mula ating salawikain

ii

isa lang akong maralita

na nakikipagkapwa-tao

kasangga rin ng manggagawa

na sadyang nagpapakatao

iii

bulsa ng korap na bumukol

ay dahil sa sistemang bulok

sa korapsyon talaga'y tutol

panagutin ang mga hayok

iv

ang oligarkiya'y kalawang

ang dinastiya'y kalawang din

na sinisira'y ating bayan

sagpang pati ating kakánin

- gregoriovbituinjr.

10.14.2025

Sa sinta

SA SINTA

oo, matatag ako pagdating sa rali

subalit ako'y tumatangis gabi-gabi

tula't rali lang ang bumubuhay sa akin

minsan, nais kong kumain, di makakain

subalit ganito lang ako, aking sinta

habang patuloy na nagsisilbi sa masa

hamo, balang araw, magkikita rin tayo

pag umabot sa edad na pitumpu't pito

o marahil walumpu't walo o di kayâ

sandaang taon, kahit abutin ng sigwâ

nais ko pa kasing may nobelang matapos

tungkol sa mundo ng maralita't hikahos

kung paano gibain ang sistemang bulok

upang uring obrero'y ilagay sa tuktok

nagkakilala naman tayong ako'y tibak

na pinagtatanggol ang mga hinahamak

siyang tunay, lalagi ka sa aking pusò

ako'y ganoon pa rin naman, walang luhò

sa katawan, naaalala kitang lagi

iniibig ka pa rin ng puso kong sawi

- gregoriovbituinjr.

10.13.2025

Ang Paghahanap kay Tapat

ANG PAGHAHANAP KAY TAPAT

di ko nabili ang nasabing aklat

dahil bulsa ko'y butas at makunat

napapanahon pa naman ang aklat

pamagat: Ang Paghahanap Kay Tapat

magkakilala kami ng may-akdâ

lumipas na'y tatlong dekada yatà

ngayon, may matagumpay siyang kathâ

si Bert Banico, kaygaling na sadyâ

si Tapat ba'y mahahanap pa? saan?

sa gobyernong pulos katiwalian?

sa DPWH? sentro iyan

ng mga kickback sa pondo ng bayan

sa Senado bang sanay sa insertion?

sa Kongreso bang tadtad ng korapsyon?

sa kontraktor bang malaki ang patong?

sa kapulisang praktis na'y mangotong?

sa mga paring kunwa'y lumilingap?

sa pulitikong tuso't mapagpanggap?

sa mga kabataang nangangarap?

o sa isang mayang sisiyap-siyap?

mukhang siya'y wala sa Pilipinas

sa lupa nina Maganda't Malakas

wala noong panahon pa ni Hudas

si Tapat ba'y nasa Landas ng Wakas?

- gregoriovbituinjr.

10.13.2025

* litrato mula sa google

Paalala sakaling magkalindol

PAALALA SAKALING MAGKALINDOL

naglindol, kayâ payò ng mga kasama

ay huwag manatili sa mga gusaling

gawa ng DPWH at kontraktor

at baka mabagsakan ng kanilang gawâ

dahil sa mga ghost project ng flood control

dahil patuloy pa ring bahâ sa Bulacan

dahil sa korapsyon sa DPWH

wala nang tiwalà ang bayan sa kanila

baka nga pulos substandard na materyales

ang ginamit dahil kinurakot ang pondo

ng bayan, ibinulsa ng mga buwaya

kaya materyales talaga'y mahuhunâ

katiwalian nila'y parang tubig bahâ

hahanap at hahanap ng mapupuntahan

habang ang masa naman ay nakatungangà

walang ginagawâ, hay, walang ginagawâ

Oktubre na, wala pang nakulong na corrupt!

nganga pa rin ba pag dumating ang The Big One?

ikulong na ang mga kurakot! ikulong!

kung maaari lang, bitayin sila ngayon!

- gregoriovbituinjr.

10.13.2025

* litrato mula sa kinasapiang messenger group

Pagsisikap

PAGSISIKAP

narito pa rin akong / lihim na nagsisikap

upang tupdin ang aking / mga pinapangarap

nagbabakasakaling / may ginhawang malasap

kahit laksang problema / itong kinakaharap

kayâ patuloy akong / kumakathâ ng kwento,

tulâ, dulâ, sanaysay / bilang paghahandâ ko

upang unang nobela / ay makathang totoo

at maipalathala't / maging ganap na libro

mabuti't may Talibâ / ng Maralitâ pa rin

upang maikling kwento / ay malathala man din

dalawang pahinâ lang / kung papel ay tiklupin

Taliba'y publikasyon / nang dukha'y may basahin

salamat sa nagla-like / ng aking mga kathâ

sanaysay, dulâ, kwento, / lalo na't mga tulâ 

pagkat tula'y tulay ko / sa sambayana't dukhâ 

sa kanila nanggaling / ang sa kwento ko'y diwà

- gregoriovbituinjr.

10.12.2025

Lutang sa hangin

LUTANG SA HANGIN

"Pagsubok ba ng Diyos ang katiwalian?"

aba'y nainis ako't siya'y nasigawan:

"Gawain iyon ng sa gobyerno'y kawatan

na ninakawan nila'y tayong taumbayan!"

nakahiligan niya'y pawang pamahiin

na gawa ng demonyo ang lahat ng krimen

di lapat sa lupa, diwa'y lutang sa hangin

"Pag-aralan mo ang lipunan!" aking bilin

dating adik siyang nais magbagong buhay

ngunit lutang din sa hangin ang gumagabay

dapat kongkretong suri sa kongkretong lagay

ng bayan, aralin ang mga isyu't ugnay

ipagpaumanhin kung nainis sa kanya

bagamat ayos lang naman ang tanong niya

dapat ko lamang pagpaliwanagan siya

ng lapat sa lupang kasagutan talaga

- gregoriovbituinjr.

10.12.2025

Kaming mga tibak na Spartan

KAMING MGA TIBAK NA SPARTAN

kaming mga tibak na Spartan

malulugmok lang sa kamatayan

at di sa anumang karamdaman

na prinsipyo naming tangan-tangan

kaya katawa'y pinatatatag

ang puso't diwa'y di nangangarag

ginagamot ang sariling sugat

lunas ay agad inilalapat

kumakain ng sariwang gulay

nang laman, diwa't puso'y tumibay

sariwang buko ang tinatagay

habang patuloy sa pagsasanay

nabubuhay na kaming ganito

at ganito kami hanggang dulo

tuloy sa paglilingkod sa tao

lalo sa dukha't uring obrero

- gregoriovbituinjr.

10.12.2025

ALTANGHAP (ALmusal, TANGhalian, HAPunan)

ALTANGHAP (ALmusal, TANGhalian, HAPunan)

pritong isda, talbos ng kamote

okra, bawang, sibuyas, kamatis

pagkain ng maralita'y simple

upang iwing bituka'y luminis

sa katawan nati'y pampalusog

nang makaiwas sa karamdaman

puso't diwa man ay niyuyugyog

ng problema ay makakayanan

iwas-karne na'y patakaran ko

hangga't kaya, pagkain ng prutas

ay isa pang kaygandang totoo

pagkat iinumin mo ang katas

aba'y oo, simpleng pamumuhay

at puspusan sa pakikibaka

dapat tayo'y may lakas na taglay

lalo na't nagsisilbi sa masa

- gregoriovbituinjr.

10.12.2025

Maging bayani ka sa panahong ito

 

MAGING BAYANI KA SA PANAHONG ITO

maging bayani ka / sa panahong ito

laban sa korapsyon / ng mga dorobo

bahâ sa probinsya't / lungsod nating ito

pagkat ibinulsa / mismo nila'y pondo

ng bayan, trapo ngâ / ang mga kawatan

na 'naglilingkod' daw / sa pamahalaan

aba'y senador pa't / konggresista iyan

at mga kontraktor / ang kasabwat naman

masa'y niloloko / nitong mga hayok

sa salapi, masa'y / di dapat malugmok

subalit di sapat / ang sanlibong suntok

sa mga nilamon / ng sistemang bulok

tuligsain natin / lahat ng kurakot

at singilin natin / ang dapat managot

ipakulong natin / ang lahat ng sangkot

at tiyaking sila'y / di makalulusot

sa panahong ito / ay maging bayani

unahin ang bayan, / at di ang sarili

singilin ang trapong / kunwari'y nagsilbi

panagutin natin / silang tuso't imbi

- gregoriovbituinjr.

10.12.2025

* litrato kuha sa Foro de Intramuros, Oktubre 11, 2025, sa aktibidad ng grupong Dakila 

Ang taong pinili mo, kaysakit pag nawala sa iyo

ANG TAONG PINILI MO, KAYSAKIT PAG NAWALA SA IYO

(Sa ikaapat na DEATH Monthsary ni misis)

ang taong pinili mo, kaysakit pag nawala sa iyo

pinili ko ang aking asawa, pinili niya ako

sumumpâ sa mayor, sa tribu, sa altar, sa kasaysayan

na magsasama sa ginhawa, hirap, saya't kalungkutan

kumpara sa magulang at kapatid, mas ramdam ang sakit

pag nawala ang minamahal mo't sinamahan sa gipit

kaysa mga taong kinagisnan ngunit di mo pinili

na minahal mo rin ngunit marahil di gayon kahapdi

ipagpaumanhin, iyan ay sarili ko lang pananaw

nami-miss ko siya't di mapagkatulog sa gabi't araw

tunay ngang ibang-iba ang kapangyarihan ng pag-ibig

napapanaginipan ko pa ang maganda niyang tinig

sa rali nga'y mandirigmang Spartan akong nakatayô

na sa pag-iisa, lumuluha ako't nakatalungkô

- gregoriovbituinjr.

10.11.2025

Dalamhati, pighati, lunggati, luwalhati

DALAMHATI, PIGHATI, LUNGGATI, LUWALHATI

(Sa ikaapat na DEATH Monthsary ni misis)

anong lungkot ng buhay nang mawala ka na, sinta

kahit na tanghaling tapat, mapanglaw ang kalsada

mga rali ang bumubuhay sa akin tuwina

bilang aktibistang Spartan pa'y nakikibaka

ay, nadarama ko ngayon ay biglaang pagbagsak

di ng aking katawan, kundi ng puso ko't utak

mabuti nga't di pa ako gumagapang sa lusak

pagkat may rali't tula pang sa puso'y nakatatak

patuloy pa rin ang dama kong pagdadamhati

nilalakasan man ang loob ay pulos pighati

ang makita ka't makasamang muli ang lunggati

baka pag nangyari iyon, dama na'y luwalhati

- gregoriovbituinjr.

10.11.2025

Kaylayo man ng kanyang libingan

KAYLAYO MAN NG KANYANG LIBINGAN

(Sa ikaapat na DEATH Monthsary ni misis)

kung sa Maynila lang nakalagak

si misis, tiyak na araw-araw

ko siyang dadalhan ng bulaklak

ngunit hindi, ako'y namamanglaw

kaylayo ng kanyang sementeryo

na sa pamasahe'y talo pa ngâ

lalo't tungkulin ko'y nasa sentro

de grabidad dini sa Maynila

libingan ay nasa lalawigan

habang ako'y narito sa lungsod

at kumikilos para sa bayan

sa isyu't laban nagpatianod

madadalaw sambeses, santaon

at doon na rin ako kakathâ

nitong mga taludtod at saknong

na handog ng makatâ sa mutyâ

kaylayo man ng kanyang libingan

ngunit sa puso ko'y buhay siya

naririto sa kaibuturan

ang diwata't tanging sinisinta

- gregoriovbituinjr.

10.11.2025

Mga gurô ang nasa headline ngayon

MGA GURÔ ANG NASA HEADLINE NGAYON

pawang mga gurô ang headline ngayong araw

sa dalawang diyaryo, gurong dapat tanglaw

magkaibang balitang karima-rimarim

mga suspek ay gurô, biktima'y gurô rin

sa una, dalawang guro'y nangmolestiya

ng mga estudyante, dalawa'y buntis na

sa ikalawa, guro't syota ay nagtalo

dahil daw sa nakawalang alagang aso

bunga nito'y pinaslang ng tibô ang gurô

yaong balat at tinalupan ay naghalò

pawang mga balitang di mo maiisip

dahil pag guro'y respeto agad ang lirip 

hustisya sa mga biktima nawa'y kamtin

at mga suspek ay madakip at litisin

- gregoriovbituinjr.

10.10.2025

* mga ulat mula sa pahayagang Abante Tonite at Pang-Masa, Oktubre 10, 2025, p.1 at 2

Gulay sa hapunan

GULAY SA HAPUNAN

iwas-karne at mag-bedyetaryan

pulos gulay muna sa hapunan

ganyan ang buhay ng badyetaryan

batay sa badyet ang inuulam

sa katawan natin pampalakas

ang mga gulay, wala mang gatas

may okra, kamatis at sibuyas

pulos gulay na'y aking nawatas

iyan ang madalas kong manilay

upang kalamnan nati'y tumibay

payo rin ito ng aking nanay

kaya kalooban ko'y palagay

sa hapunan, ako'y saluhan n'yo

at tiyak, gaganahan din kayo

- gregoriovbituinjr.

10.10.2025

Paglahok sa Black Friday Protest

PAGLAHOK SA BLACK FRIDAY PROTEST

isa lamang ako sa mamamayang galit

ekspresyon ang Black Friday Protest sa paggiit

ng hustisya para sa dukha't maliliit

na tinig ay kayhabang panahong winaglit

panahon nang maparusahan at ikulong

ang mga lingkod bayan daw ngunit ulupong

mga kongresista't senador na nangotong

pati kontratistang ginawa tayong gunggong

kahit ako'y nag-iisa, tiyak lalahok

sa takbo ng kasaysayan nang mailugmok

ang sistemang bulok at pulitikong bugok

nang uring manggagawa'y ilagay sa tuktok

simpleng tibak man ako at abang makata

pag nabago ang sistema'y saka huhupa

ang galit nitong bayan sa trapong kuhila

ngayon, tabak ni Andres muna'y hinahasa

- gregoriovbituinjr.

10.10.2025

Tatlong herbal na inumin

TATLONG HERBAL NA INUMIN

di naman iinumin nang sabay

magkasunod o isang tunggaan

may pagitan itong isang oras

mainit na tubig lang ang sabay

sayang kung tubig ay iinitin

kada oras sa takure namin

kaya tatlong baso'y pagsabayin

ngunit di lang sabay iinumin

isang baso'y salabat o luya

dahon ng guyabano ang isa

isa nama'y sambasong bawang pa

inuming pampalakas talaga

iyan na ang aking iniinom

gabi, umaga, tanghali, hapon

hay, kayrami pang trabaho't misyon

dapat katawa'y malakas ngayon

- gregoriovbituinjr.

10.10.2025    

Baha sa tapat ng bahay

BAHA SA TAPAT NG BAHAY

kaylalaki ng patak ng ulan

dito pa rin ba'y ghost ang flood control?

tingni, nagbaha na sa lansangan

flood control ba'y paano ginugol?

batid na ng bayan ang korapsyon

na likha ng mga lingkodbayan

talagang loko ng mga iyon

ibinulsa ang pera ng bayan

ay, wala ba silang mga budhi

kung meron man, budhi'y sakdal itim

dapat nang lunurin sa pusali

silang budhi'y kakulay ng uling

sa lumalaban, ako'y saludo

upang mabago na ang sistema

itayo'y lipunang makatao

mga kurakot, parusahan na!

- gregoriovbituinjr.

10.10.2025

* mapapanood ang bidyo sa kawing na: https://www.facebook.com/reel/2353627365076958

Dahil sa misyong dakila

DAHIL SA MISYONG DAKILA

parang araw-araw na lang, lagi akong tulala

subalit dapat ipakita kong ako'y masigla

kahit hindi, sapagkat ako'y isang mandirigma

at nalulutas iyon, dahil may misyong dakila

iyon ang bumubuhay sa akin sa araw-gabi

nakapagpapasigla pa ang pagdalo sa rali

kaya sa anumang laban, di ako nagsisisi

na kabilang ako sa mga sa bayan nagsilbi

tulad ko'y ang mandirigmang Ispartang si Eurytus

na hanggang sa huling sandali'y nakibakang lubos

di gaya ng Ispartang duwag, si Aristodemus

kinahiya ng kanyang lipi, di nakipagtuos

kumikilos pa ako't patuloy na lumalaban

upang tuluyang mapawi ang mga kabulukan

ng sistema't itatag ang makataong lipunan

iyan ang dakila kong misyon hanggang sa libingan

- gregoriovbituinjr.

10.09.2025

BOTO, BOGO, BOFO

BOTO, BOGO, BOFO

Buy One, Take One: BOTO

Buy One, Get One: BOGO

Buy One, Free One: BOFO

iba'y ibang daglat

sa bibilhing sukat

iyan nga ba'y sapat

na pawang pakulô

nang tinda'y lumagô

nang sila'y tumubò

pag binili'y isa

may libre pang isa

may kita na sila

ang BOTO ng masa

sana'y di ibenta

sa tusong burgesya

BOTO mo'y butatâ

pag nanalo na ngâ

ay trapong kuhilà 

- gregoriovbituinjr.

10.09.2025

* litrato mulâ kung saan-saan

Ako'y bato

AKO'Y BATO

ako'y bato, apo ni Batute

na pagtula'y tungkulin at mithi

pinaliliwanag anong sanhi

bakit sistema'y nakamumuhi

bagamat bato ay batong buhay

idinaraan na lang sa nilay

ang kinakatha kong tula'y tulay

sa sinapupunan hanggang hukay

ako'y bato ay di naman kalbo

kahit minsan ay nagdedeliryo

pag si misis pinuntahan ako

anong sarap ng pakiramdam ko

pananim niya'y dinidiligan

ng mga luha ko't kalungkutan

na balang araw, lalago naman

upang bunga'y mapakinabangan

- gregoriovbituinjr.

10.09.2025    

Sa tambayan

SA TAMBAYAN

nasa Fiesta Carnival muli ako, O, sinta

doon sa dati, sa tinatambayan ko madalas

muling kumakatha habang naaalala kita

tayo'y nag-usap anong panonooring palabas

oo, madalas, doon mo ako pinupuntahan

agad magkukwento ka pagkagaling sa trabaho

kaytamis ng ngiti mo't agad akong susulyapan

habang ako nama'y nakikinig sa iyong kwento

ako'y nag-iisa na lang sa Fiesta Carnival

habang inaalagata ang nakaraan natin

habang doon sa tabi-tabi ay nagmiminindal

aba'y anong sarap pa ng ating mga kutkutin

hanggang dito na lang muna, O, diwata ko't irog

nagunita ka lang ng pusong nagkalasog-lasog

- gregoriovbituinjr.

10.08.2025

Mukhang Senior na kasi si Junior

MUKHANG SENIOR NA KASI SI JUNIOR

sa dulo ng ngalan ko'y may Junior

aba'y mukha na raw akong Senior

kaya pamasahe imbes kinse

sa minibus, singil nila'y dose

bago mag-Senior, ilang taon pa

ngunit nangalahating siglo na

aba'y dapat wala pang diskwento

ngayon, meron na't ubanin ako

salamat naman at nakatipid

ang mula sektor ng sagigilid

kung may Senior I.D., di nagtanong

na sana'y masasagot ko iyon

di pa ako Senior, sasabihin

ko't diskwento'y tiyak babawiin

- gregoriovbituinjr.

10.08.2025

Tarang mag-almusal

TARANG MAG-ALMUSAL

patibayin ang katawan

at busugin din ang tiyan

kumain na ng agahan

upang di ka panghinaan

mahirap kung walang kain

kung maraming lalakarin

dahil baka ka gutumin

ay baka maging sakitin

tara munang mag-almusal

upang di babagal-bagal

at din rin hihingal-hingal

sa daraanan mang obal

dapat tumatag ang isip

na kayraming nalilirip

busog ay may halukipkip

at lakas ang kahulillip

- gregoriovbituinjr.

10.08.2025

Kami'y mga apo ni Leonidas

KAMI'Y MGA APO NI LEONIDAS

kami'y mga apo ni Leonidas

mandirigmang lumalaban ng patas

mandirigma ang tinahak na landas

marangal, sa labanan ay parehas

katulad ko'y Ispartang si Eurytus

maysakit man ay lumaban ng lubos

nang sa Thermopylae, siya'y inulos

hanggang mga mandirigma'y naubos

di gaya ng isang Ispartang duwag

na ang sariling buntot ay nabahag

si Aristodemus na nangangarag

sa digma'y umuwi, di nakibabag

kami'y mga aktibistang Spartan

na laging handâ sa anumang laban

na misyon ay baguhin ang lipunan

nang ginhawa'y kamtin ng buong bayan

- gregoriovbituinjr.

10.07.2025

* litrato mula sa google

Kwento ng dalawang wish

KWENTO NG DALAWANG WISH

nag-ala-Kara David na si Bishop

ngunit iniba lang ang pangungusap

kay Kara, mamatay lahat ng korap

na birthday wish ko na rin sa hinagap

kay Bishop Soc, kung siya'y mamamatay

mga korap sana'y maunang tunay

kina Kara't Bishop, wish nila'y lantay

mula sa pusò, may galit na taglay

poot sa lahat ng mga kurakot

sa kaban ng bayan, dapat managot

bantayan, dapat walang makalusot

ipakita natin ang ating poot

mamatay lahat ng mga tiwali

trapo't dinastiya'y dapat magapi

- gregoriovbituinjr.

10.08.2025

Magwawakas din ang Nakbâ

MAGWAWAKAS DIN ANG NAKBÂ

mulâ ilog hanggang dagat

lalaya rin ang Palestine

gagapiing walang puknat

ang mga hudyong salarin

magwawakas din ang Nakbâ

mananakop ay iigtad

at magiging isang bansâ

silang malaya't maunlad

kaya nakiisa ako

sa pakikibaka nila

narito't taas-kamao

upang sila'y lumaya na

- gregoriovbituinjr.

10.07.2025

* Nakbâ - sa Arabiko ay catastrophe o malaking kapahamakan

Sino bang modelo sa katha kong tulâ?

SINO BANG MODELO SA KATHA KONG TULA?

sino bang modelo sa katha kong tulâ?

gayong pwede rin namang talagang walâ

minsan, pakikiusapan mo ang madlâ

kung pwede ba silang litratuhang sadyâ

madalas din namang bantulot ang masa

sa rali, malilitratuhan talaga

pag ayaw makuhanan, bakit nandyan ka?

lalo't maraming kamera at masmidya

pag may kinunang may plakard, aba'y gusto

pag ayaw, makata na lang ang modelo

na sa pagtula mismo'y nakalitrato

kaysa maghanap pa ng kung sino-sino

pagkat di na pipilitin ang sarili

"hoy, ikaw muna'y maging modelo rini"

sa litkuran o background na sinasabi

upang agad maparating ang mensahe

walang magawa kundi makata na lang

upang yaring tula ay may katibayan

na pag binasa, totoo pala naman

yaong sa tula'y isinasalarawan

- gregoriovbituinjr.

10.07.2025

Resign All!

RESIGN ALL!

iyan ang tindig namin - Resign All!

bulsa ng korap nga'y bumubukol

dinastiya pa'y pinagtatanggol

ng mga kurakot sa flood control

lahat ng korap, dapat managot

korapsyon nila'y katakot-takot

mag-resign na ang lahat ng sangkot

parusahan lahat ng kurakot

kaya huwag na tayong bumoto

sa walang mapagpiliang trapo

pulos kinatawan ng negosyo,

oligarkiya't burgesyang tuso

pinaglaruan ang mamamayan

sa kalunsuran at lalawigan

ibinulsa ng mga kawatan

ang pondong nakalaan sa bayan

kaya mag-resign na silang lahat

RESIGN ALL! ang sigaw nami't sumbat

gobyerno na'y mapanglaw na gubat

serbisyo'y ninenegosyong sukat

- gregoriovbituinjr.

10.07.2025

Panagimpan

PANAGIMPAN

madaling araw, ako'y nagising

mula sa mahabang pagkahimbing

tila ba may kung anong parating

bumalikwas sa pagkagupiling

ginising ako ng mga hiyaw

ng taumbayang nagsipalahaw:

"ikulong ang mga magnanakaw!"

sa kanila, ako'y nakisigaw

sa korapsyon, tao'y nililipol

ng mga trapo sa ghost flood control

putik ang sa mukha'y kinulapol

ng mga kurakot na masahol

sa hayop, dukha'y pinipilipit

masa'y hustisya ang ginigiit

ay, totoo ang kanilang galit

sa banig tumayo akong pilit

sa aking budhi, ako'y sumumpâ

sasamahan ko ang api't dukhâ

sa kanilang pakay na dakilà

palitan ang sistemang kuhilà

- gregoriovbituinjr.

10.07.2025

Guyabano tea

GUYABANO TEA

dahon ng guyabano

at mainit na tubig

paghaluin lang ito

nang lumakas ang bisig

at buo mong kalamnan

na ang lasa'y kaysarap

tanim lang sa bakuran

di na ako naghanap

guyabano na'y tsaa

inumin nang lumusog

paggising sa umaga

o bago ka matulog

tikman, guyabano tea

madaramang lalakas

at di ka magsisisi

kalusugan mo'y wagas

- gregoriovbituinjr.

10.06.2025